.jpg)
ខ្សែប្រយុទ្ធឆ្នើម Gerard Moreno របស់ក្រុម Villarreal។ រូបថត AFP
ក្រុងម៉ាឌ្រីដ: ខ្សែប្រយុទ្ធឆ្នើម Gerard Moreno របស់ក្រុម Villarreal អាចនឹងអវត្តមាន សម្រាប់ការប្រកួតជើងទី១ ក្នុងវគ្គពាក់កណ្តាលផ្តាច់ព្រ័ត្រ នៅក្របខ័ណ្ឌ Champions League ទល់នឹងក្រុម Liverpool បន្ទាប់ពីរូបគេបានស៊ុតបញ្ចូលទី ហើយបន្ទាប់មករងរបួស អំឡុងពេលមានជ័យជម្នះ ២-១ លើក្រុមម្ចាស់ផ្ទះ Getafe កាលពីថ្ងៃសៅរ៍។
កីឡាករ Moreno ធ្វើបានសម្រេច ១ គ្រាប់ ហើយបន្ទាប់មក បង្កើតឱកាសឱ្យមិត្តរួមក្រុម ស៊ុតសម្រេច ១ គ្រាប់ទៀត ក្នុងហ្គេមទល់នឹងក្រុម Getafe នេះ មុនពេលរូបគេត្រូវបានប្តូរចេញ ក្នុងវគ្គទី២ ដោយសារមានរបួសភ្លៅខាងស្តាំ។
កីឡាករសញ្ជាតិអេស្ប៉ាញវ័យ ៣០ ឆ្នាំ នឹងត្រូវឆ្លងការត្រួតពិនិត្យ ដើម្បីវាយតម្លៃបញ្ហារបួសនេះ ខណៈក្រុម Villarreal មានពេល ១០ ថ្ងៃ មុនការធ្វើដំណើររបស់ពួកគេទៅទឹកដី Anfield របស់ក្រុម Liverpool សម្រាប់ជំនួបជើងទី១ នៅ Champions League។
Moreno បានស៊ូទ្រាំនឹងឆ្នាំដ៏លំបាកជាមួយរបួស ដោយបានជួបបញ្ហារួចហើយ កាលពីខែតុលា និងខែកុម្ភៈ នៅពេលដែលរូបគេត្រូវនៅក្រៅទីលានម្ដងៗ រយៈពេលជាង ១ ខែ។
«យើងនឹងបានដឹងថា តើវាមានកម្រិតធ្ងន់ធ្ងរប៉ុនណា តែវាជាឆ្នាំដ៏អាក្រក់ សម្រាប់រូបគេ។ វាជាការធ្វើឱ្យគ្រប់គ្នាមានការសោកស្ដាយ ដែលបានឃើញការមានរបួសរបស់គេ។ រង់ចាំមើលថា តើរបួសនោះ គឺធ្ងន់ ឬស្រាលយ៉ាងណា»។ នេះជាសម្ដីរបស់គ្រូបង្វឹកក្រុម Villarreal លោក Unai Emery។
ក្រោយទម្លាក់ក្រុម Bayern Munich ពី Champions League ក្នុងវគ្គ ១/៤ ផ្តាច់ព្រ័ត្រ ដោយស្មើ ១-១ នៅជើងទី២ នាក្រុងមុយនិច Villarreal យកឈ្នះទៀតលើក្រុម Getafe ដែលកំពុងប្រយុទ្ធ ដើម្បីបន្តរស់ក្នុងក្របខ័ណ្ឌកំពូលរបស់អេស្ប៉ាញ៕ AFP/VN
