ក្រុងឡុងដ៍: ក្រុមហង្សក្រហម Liverpool ឡើងទៅវគ្គផ្តាច់ព្រ័ត្រ ក្នុងកម្មវិធី FA Cup ដោយសារការទម្លុះសំណាញ់ទី២ ដងរបស់កីឡាករ Sadio Mane បានជួយជំរុញឱ្យមានជ័យជម្នះ ៣-២ លើក្រុមមេឃខៀវ Manchester City (City) ដោយលទ្ធផលនេះ កំពុងបន្តរក្សាការប្រឹងប្រែងរបស់ពួកគេ ក្នុងការបានគ្រងពានរង្វាន់ ៤ និងបានបំផ្លាញក្តីសង្ឃឹមរបស់ក្រុមគូប្រជែង ដែលចង់កា្លយជាជើងឯកក្នុង ៣ កម្មវិធីផ្សេងគ្នា។
ក្រុម Liverpool របស់លោក Jurgen Klopp កំពុងតាមប្រដេញការប្រមូលយកទាំងអស់មិនធ្លាប់មានពីមុន ក្នុងការបានឈ្នះពានរង្វាន់សំខាន់ៗទាំង ៤ ក្នុង ១ រដូវកាល ហើយពេលនេះ ពួកគេកំពុងស្ថិតនៅលើផ្លូវ ក្នុងការសម្រេចបាននូវគោលដៅអស្ចារ្យនោះ បន្ទាប់ពីមានទម្រង់លេងគួរឱ្យស្ងើច ក្នុងវគ្គទី១ សម្រាប់ការប្រកួតនៃវគ្គ ៤ ក្រុមចុងក្រោយ នៅឯពហុកីឡដ្ឋាន Wembly។
ខ្សែការពារកណ្ដាល Ibrahima Konate ជួយឱ្យក្រុម Liverpool នាំមុខយ៉ាងលឿន ហើយខ្សែប្រយុទ្ធ Mane បន្ថែមពីលើគ្រាប់បាល់នោះ បន្ទាប់ពីមានឱកាសរត់ទៅស្កាត់បាល់បញ្ចូលទី ដោយសារការបង្កើតនូវកំហុសដ៏ធំពីអ្នកចាំទី Zack Steffen របស់ក្រុម City ខណៈដែលមុនចប់វគ្គទី១ កីឡាករអន្តរជាតិសេណេហ្គាល់ ស៊ុតសម្រេចគ្រាប់ទី២ របស់ខ្លួនដើម្បីឱ្យក្រុមហង្សក្រហមនាំមុខកាន់តែឆ្ងាយ ៣-០។
ហើយទោះខ្សែប្រយុទ្ធ Jack Grealish និងខ្សែបម្រើ Bernardo Silva មានឱកាសបំប៉ោងសំណាញ់ទីម្នាក់ ១ គ្រាប់ ដើម្បីកាត់បន្ថយការនាំមុខនោះក៏ដោយ ក៏ចុងក្រោយ ក្រុមមេឃខៀវ មិនអាចធ្វើការវាយបកបានសម្រេច ដើម្បីបន្តក្ដីសង្ឃឹមបានឡើយ។
ក្រុម Liverpool នឹងធ្វើការបង្ហាញខ្លួន ក្នុងវគ្គផ្ដាច់ព្រ័ត្រនៃកម្មវិធី FA Cup ជាលើកដំបូង គិតតាំងពីឆ្នាំ ២០១២ នាថ្ងៃទី ១៤ ខែឧសភា ដោយត្រូវប្រឈមជាមួយក្រុម ដែលឈ្នះរវាងគូក្នុងវគ្គ ១/២ ផ្ដាច់ព្រ័ត្រ ១ ទៀត គឺក្រុម Chelsea និង Crystal Palace ដែលត្រូវតទល់គ្នានៅថ្ងៃអាទិត្យ។
ក្រុមហង្សក្រហម ដែលឆ្លងចូលវគ្គផ្ដាច់ព្រ័ត្រ FA Cup ជាលើកទី១៥ មិនធ្លាប់បានលើកពាននេះនោះឡើយ គិតតាំងពីឆ្នាំ ២០០៦ មក ខណៈដែលលោក Klopp នៅមិនទាន់បានដឹកនាំក្រុមឱ្យគ្រងជើងឯក ក្នុងកម្មវិធី នៃការប្រកួតប្រជែងបែបចាញ់ធ្លាក់ ក្នុងស្រុកនេះម្ដងណាឡើយ។
ក្រោយក្រុមធ្លាក់ លោក Pep Guardiola បានអះអាងថា ក្រុម City របស់លោកអស់កម្លាំងកំហែងហើយ ដែលធ្វើឱ្យលោកគ្មានជម្រើស ក្រៅពីធ្វើការផ្លាស់ប្ដូរកីឡាករខ្លះប៉ុណ្ណោះ ដោយខ្សែបម្រើស្នូល Kevin De Bruyne ត្រូវទុកឱ្យអង្គុយកៅអីកីឡាករបម្រុងជាមួយអ្នកចាំទីដៃទី១ Ederson, ខ្សែការពារ Ruben Dias និងខ្សែបម្រើ Rodri ខណៈដែលខ្សែការពារ Kyle Walker ត្រូវនៅក្រៅទីលានតែម្ដង ដោយសាររបួស។
ដោយក្រុម Liverpool កំពុងតាមក្រុម City ត្រឹមតែ ១ ពិន្ទុ សម្រាប់ការប្រកួតប្រជែង នៅក្របខ័ណ្ឌ Premier League ជាមួយនឹងការនៅសល់ ៧ ហ្គេមទៀត ហើយត្រូវប្រឈមជាមួយក្រុម Villarreal ក្នុងវគ្គ ៤ ក្រុម នៅក្របខ័ណ្ឌ Champions League កីឡាករ Mane ដឹងច្បាស់ថា ក្រុមរបស់ខ្លួន អាចនឹងស្ថិតនៅលើគែមនៃភាពអមតៈ (គ្មានក្រុមណាបំបែកបាន) របស់បាល់ទាត់។
«យើងនឹងឃើញ។ យើងនឹងប្រឹងឱ្យអស់លទ្ធភាពរបស់ពួកយើង។ ពិតមែន វាគឺជាក្ដីស្រមៃ ហើយយើងនឹងប្រឹងប្រែង ដើម្បីសម្រេចឱ្យបាន។ វាគឺពិសេសណាស់។ វាជាជោគជ័យដ៏ធំ ដែលបានឈ្នះ ក្នុងវគ្គ ១/២ ផ្ដាច់ព្រ័ត្រ ហើយយើងមានក្ដីរីករាយ ក្នុងការបានឡើងទៅវគ្គផ្ដាច់ព្រ័ត្រ»។ នេះជាសម្ដីរបស់កីឡាករ Mane ដែលនិយាយទៅកាន់ប្រព័ន្ធផ្សព្វផ្សាយ BBC។
កីឡាករ Mane បានបន្ថែមថា៖ «យើងចាប់ផ្ដើមបានល្អ យើងបានធ្វើការដាក់សម្ពាធលើពួកគេយ៉ាងខ្លាំង ហើយអ្នកចាំទីរបស់ពួកគេ បានបង្កកំហុស។ ខ្ញុំសប្បាយចិត្តណាស់ ដែលស៊ុតបញ្ចូលទីបាន ២ គ្រាប់ តែទម្រង់លេងរបស់ក្រុមទាំងមូល គឺអស្ចារ្យមែនទែន។ កីឡាកររបស់ក្រុម Liverpool គ្រប់រូប រីករាយជាមួយនឹងជ័យជម្នះនេះ ព្រោះពួកយើងសម្រេចបាននូវកិច្ចការដ៏ត្រឹមត្រូវ ក្នុងពេលវេលាដ៏ត្រឹមត្រូវ»៕ AFP/VN