.jpg)
Loftus-Cheek (ស្ដាំ) លោតសម្ដែងការអបអរជាមួយមិត្តរួមក្រុម ក្រោយស៊ុតឱ្យ Chelsea នាំមុខ Palace ១-០។ AFP
ក្រុងឡុងដ៍: លោក Thomas Tuchel បានធ្វើការកោតសរសើរ ចំពោះការផ្តោតអារម្មណ៍ និងភាពនឹងនររបស់ក្រុមតោខៀវ Chelsea ខណៈដែលពួកគេបានយកឈ្នះក្រុម Crystal Palace ក្នុងលទ្ធផល ២-០ កាលពីថ្ងៃអាទិត្យ ដើម្បីកក់កៅអីនៅវគ្គផ្តាច់ព្រ័ត្រ ក្នុងកម្មវិធី FA Cup ដោយត្រូវទល់ជាមួយក្រុមហង្សក្រហម Liverpool ដែលកំពុងប្រឹងប្រែងតាមប្រដេញពានរង្វាន់ ៤។
ក្រុម Chelsea របស់លោក Tuchel ត្រូវខិតខំយ៉ាងខ្លាំង ដើម្បីបំបែកការតស៊ូប្រយុទ្ធដ៏រឹងរូសរបស់ក្រុម Palace សម្រាប់ការប្រកួតក្នុងវគ្គពាក់កណ្តាលផ្តាច់ព្រ័ត្រ នៅឯពហុកីឡដ្ឋាន Wembley នេះ តែការស៊ុត ១ ជើងយ៉ាងសាហាវរបស់កីឡាករ Ruben Loftus-Cheek បានធ្វើឱ្យពួកគេស្ថិតនៅលើផ្លូវ ក្នុងការបានទៅបង្ហាញខ្លួន ក្នុងវគ្គផ្ដាច់ព្រ័ត្រ នៅ FA Cup ជាលើកទី៣ ជាប់ៗគ្នា។
បន្ទាប់មក ខ្សែបម្រើ Mason Mount បានធ្វើឱ្យលទ្ធផលនេះគ្មានអ្វីត្រូវសង្ស័យ ជាមួយនឹងការបញ្ចប់ទីយ៉ាងស្អាត ដោយបច្ចេកទេសផ្ទាល់ខ្លួន ដែលជួយធានាឱ្យក្រុមតោខៀវ ឡើងទៅជួបជាមួយ Liverpool ក្នុងវគ្គផ្ដាច់ព្រ័ត្រ នៅពហុកីឡដ្ឋាន Wembley នាថ្ងៃទី ១៤ ខែឧសភា ខាងមុខនេះ។
វានឹងក្លាយជាការប្រកួត ក្នុងវគ្គផ្តាច់ព្រ័ត្រនៅ FA Cup ជាលើកទី៥ របស់ Chelsea ក្នុងរយៈពេល ៦ ឆ្នាំចុងក្រោយនេះ ខណៈដែលពួកគេកំពុងសម្លឹង ដល់ការប៉ូះប៉ូវឱ្យបានឡើងវិញ សម្រាប់ការចាញ់ក្នុងការប្រកួតជាមួយក្រុម Arsenal និង Leicester ក្នុងឆ្នាំ ២០២០ និង ២០២១ រៀងគ្នា។
វាជាកម្លាំងជំរុញដ៏គួរឱ្យរីករាយមួយ បន្ទាប់ពីការធ្លាក់ដ៏គួរឱ្យឈឺចាប់ចេញពីក្របខ័ណ្ឌ Champions League ក្នុងវគ្គ ១/៤ ផ្តាច់ព្រ័ត្រ កាលពីថ្ងៃអង្គារកន្លងមក នៅឯផ្ទះរបស់ក្រុមអធិរាជស Real Madrid ដោយក្រុមតោខៀវ បានស៊ុតបញ្ចូលទីដល់ទៅ ៣ គ្រាប់ ដែលជាឱកាសក្នុងការអាចកែប្រែលទ្ធផលបរាជ័យ ៣-១ ក្នុងហ្គេម កាលពីជើងទី១ តែត្រូវបញ្ចប់ដំណើរ ក្រោយថែមម៉ោងពិសេស ១៥ នាទី។
«ខ្ញុំគិតថា ទម្រង់លេង គឺមានការគ្រប់គ្រង និងរឹងមាំល្អណាស់។ វាជាការលំបាក ដោយគូបដិបក្ខបានផ្លាស់ប្ដូរប្រព័ន្ធលេង ២ លើក តែយើងដោះស្រាយជាមួយនឹងការវាយបករបស់ពួកគេបានល្អ។ វាជាការប្រកួតប្រជែងទាំងផ្នែករាងកាយ និងផ្លូវអារម្មណ៍។ យើងជាក្រុមដែលមាននាទីលេងច្រើនបំផុតនៅអឺរ៉ុប»។ នេះជាការលើកឡើងរបស់លោក Tuchel។
លោក Tuchel បានឈ្នះពាននៅក្របខ័ណ្ឌ Champions League, Club World Cup និង UEFA Super Cup ក្នុងការធ្វើតួនាទី នៅអង់គ្លេសនេះ តែមិនទាន់ដឹកនាំក្រុម Chelsea ឱ្យលើកពានរង្វាន់ក្នុងស្រុកនៅឡើយទេ។
ដោយមានក្រុមហ៊ុនចំនួន ៣ ដែលកំពុងដំណើរការទិញក្លិប Chelsea បន្ទាប់ពីមានការដាក់ទណ្ឌកម្មរបស់រដ្ឋាភិបាលអង់គ្លេសលើមហាសេដ្ឋីរុស្ស៊ីលោក Roman Abramovich ក្រោយមានការលុកលុយលើប្រទេសអ៊ុយក្រែន ក្រុមតោខៀវអាចនឹងមានម្ចាស់ថ្មី នៅពេលដែលពួកគេវិលមកកាន់ពហុកីឡដ្ឋាន Wembley វិញ ក៏ថាបាន។
ការមានជ័យជម្នះលើក្រុម Palace ធ្វើឱ្យពួកគេស្ថិតក្នុងការប្រកួតប្រជែង ដើម្បីបញ្ចប់រដូវកាលពោរពេញដោយបញ្ហាជាមួយនឹងពានរង្វាន់មួយក្នុងដៃ បើទោះបីជាក្រុម Liverpool ដែលយកឈ្នះក្រុមកំពុងនាំមុខគេ ក្នុងតារាងពិន្ទុរបស់ Premier League គឺក្រុមមេឃខៀវ Manchester City ក្នុងលទ្ធផល ៣-២ កាលពីថ្ងៃសៅរ៍ នឹងក្លាយជាគូប្រជែងរឹងមាំជាង ពោលគឺពិបាកនឹងយកឈ្នះក៏ដោយ៕ AFP/VN
