ក្រុងប៊ែរឡាំង: ក្រុម Bayern Munich អាចធានាបាននូវការឈ្នះជើងឯកក្របខ័ណ្ឌ Bundesliga ជាលើកទី១០ ជាប់ៗគ្នាបានហើយនៅចុងសប្តាហ៍ក្រោយ បន្ទាប់ពីពួកគេ ប្រសើរឡើងវិញ ក្រោយធ្លាក់ចេញពីការប្រកួតប្រជែងនៅក្របខ័ណ្ឌ Champions League ដោយដណ្ដើមបានជ័យជម្នះ ៣-០ នៅឯទឹកដីរបស់ក្រុម Arminia Bielefeld កាលពីថ្ងៃអាទិត្យ។
គ្រាប់បាល់ដែលបានពីការធ្វើឱ្យចូលទីខ្លួនឯង ដោយខ្សែការពារ Jacob Laursen របស់ក្រុម Bielefeld និងដែលបានពីការស៊ុតបញ្ចូលទីរបស់កីឡាករ Serge Gnabry និង Jamal Musiala ធ្វើឱ្យក្រុម Bayern នាំមុខដាច់ ៩ ពិន្ទុ។
«ការខកចិត្ត ត្រូវបានរំសាយតិចតួចដែរ ជាមួយនឹងជ័យជម្នះនេះ បន្ទាប់ពីយើងបានធ្លាក់ពីអឺរ៉ុប»។ នេះជាសម្ដីរបស់កីឡាករ Gnabry របស់ក្រុម Bayern។
Bayern បានវិលមកកាន់ផ្លូវនៃជ័យជម្នះវិញ រយៈពេល ៥ ថ្ងៃ បន្ទាប់ពីត្រូវបានក្រុម Villarreal តាមស្មើ នៅនាទីចុងក្រោយ ក្នុងផ្ទះខ្លួនឯង ដែលនាំឱ្យពួកគេធ្លាក់ចេញពីក្របខ័ណ្ឌ Champions League ត្រឹមវគ្គ ៨ ក្រុមចុងក្រោយ ជាមួយនឹងការបរាជ័យពីការប្រកួតទាំង ២ ជើង ២-១។
ខ្សែបម្រើ Joshua Kimmich របស់ក្រុម Bayern បាននិយាយថា៖ «ខ្ញុំមានពេលដ៏លំបាកក្នុងការដោះស្រាយជាមួយនឹងអារម្មណ៍នេះ។ វានៅតែវិលវល់ក្នុងគំនិតរបស់អ្នកជានិច្ច»។
វានៅសល់ការប្រកួតចំនួន ៤ លើកទៀត តែក្រុម Bayern អាចកា្លយជាម្ចាស់ពានរង្វាន់ភ្លាមៗ ដោយការយកឈ្នះក្រុមលេខ ២ Borussia Dortmund ក្នុងជំនួបក្រុមកំពូលតារាង នៅក្រុងមុយនិច នាថ្ងៃសៅរ៍ចុងសប្ដាហ៍នេះ។
«ប្រាកដណាស់ យើងចង់ឈ្នះពាន ពេលតទល់នឹងក្រុម Dortmund»។ នេះជាការបន្ថែមរបស់ Kimmich។
ក្រុម Bayern ចាប់ផ្ដើមនាំមុខ នៅនាទីទី១០ មុនពេលកីឡាករ Gnabry បន្ថែម ២-០ នៅនាទីទី៤៥+៧ ហើយនៅប្រមាណជា ៥ នាទី មុនចប់ការប្រកួតនៃសប្ដាហ៍ទី៣០ នេះ កីឡាករបម្រុង Musiala ក៏ជួយធានានូវជ័យជម្នះឱ្យក្រុមភ្ញៀវដោយឥតសង្ស័យជាមួយនឹងការបន្ថែមគ្រាប់ទី៣។
សម្រាប់ការប្រកួត ១ គូទៀត ក្រុម Eintracht Frankfurt បានរងបរាជ័យយ៉ាងមិនគួរឱ្យជឿ ២-០ នៅផ្ទះរបស់ក្រុម Union Berlin ដោយលទ្ធផលនេះ កើតមានឡើងរយៈពេល ៣ ថ្ងៃ បន្ទាប់ពីពួកគេដណ្ដើមបានជ័យជម្នះដ៏គួរភ្ញាក់ផ្អើលលើក្រុមយក្សអេស្ប៉ាញ Barcelona រហូតបានឡើងទៅវគ្គ ៤ ក្រុមចុងក្រោយ នៅក្របខ័ណ្ឌ Europa League ជាមួយនឹងលទ្ធផលទាំង ២ ជើង ៤-៣។
ក្រោយចប់ការប្រកួតគ្រូបង្វឹករបស់ Frankfurt លោក Oliver Glasner បាននិយាយថា៖ «ជាក់ស្ដែងណាស់ ក្រុមរបស់យើងហាក់មានការនឿយហត់ខ្លាំង។ កីឡាករទាំងអស់បានប្រឹងប្រែងគ្រប់យ៉ាងខ្លាំង តែគ្រាន់តែយើងមិនស្ថិតក្នុងស្ថានភាព ក្នុងការអាចមានជ័យជម្នះនៅទីនេះ។ វាពិតជាសមនឹងទទួលបានបរាជ័យមែនហើយ»៕ AFP/VN