ក្រុងប៉ារីស: លោក Erik ten Hag ដែលត្រូវបានគេចាត់ទុកដោយបើកចំហថា ជាអ្នកចាត់ការបន្ទាប់របស់ក្រុមបិសាចក្រហម Manchester United នោះ បានជួបប្រទះនូវបរាជ័យ កាលពីថ្ងៃអាទិត្យ នៅពេលដែលក្រុម Ajax របស់គាត់បានចាញ់ក្រុម PSV Eindhoven ២-១ ក្នុងការប្រកួតនៅវគ្គផ្តាច់ព្រ័ត្រនៃកម្មវិធី Dutch Cup។
ក្រុម Ajax បានស៊ុតគ្រាប់បាល់បើកឆាក តាមរយៈកីឡាករ Ryan Gravenberch នៅនាទីទី២៣ នៅមុនពេលគ្រាប់បាល់របស់កីឡាករ Dusan Tadic ត្រូវបានបដិសេធមិនយកជាការ មុនចប់វគ្គទី១ ប្រមាណជា ១ នាទី។
បន្ទាប់មក ក្រុម PSV បានស៊ុតបញ្ចូលទីសងវិញ ២ គ្រាប់ផ្ទួនៗ ក្នុងរយៈពេលប្រមាណជា ២ នាទីប៉ុណ្ណោះ ដែលគ្រាប់ទី១ ដោយកីឡាករ Erick Gutierrez នាទីទី៤៨ និងគ្រាប់ទី២ ដោយកីឡាករ Cody Gakpo នៅនាទីទី៥០។
គួរឱ្យសោកស្ដាយសម្រាប់ Ajax ដោយគ្រាប់បាល់ ១ គ្រាប់ទៀត ដែលធ្វើបានសម្រេចដោយកីឡាករ Davy Klaassen នៅនាទីទី៥៧ ត្រូវបានលុបចោលដោយ VAR (វីដេអូជំនួយការអាជ្ញាកណ្ដាល)។
សម្រាប់ PSV នេះជាការឈ្នះជើងឯកខាប់លើកដំបូង គិតពីឆ្នាំ ២០១២ តែជាការឈ្នះរួមលើកទី១០ ខណៈក្រុមការពារជើងឯក Ajax ដែលធ្លាប់គ្រងពាន ក្នុងកម្មវិធីខាប់នេះ ចំនួន ២០ ដង កំពុងស្ថិតលើផ្លូវ នៃការឈ្នះជើងឯកលីគកំពូលរបស់ហូឡង់នៅឡើយទេ ដោយពេលនេះពួកគេកំពុងនាំមុខលើក្រុមលេខ ២ PSV ៤ ពិន្ទុ។
លោក Ten Hag មានសិទ្ធិខ្ពស់ ក្នុងការបានទៅធ្វើអ្នកចាត់ការក្រុម Man Utd រដូវកាលក្រោយ ហើយគ្រូបង្វឹកវ័យ ៥២ ឆ្នាំរូបនេះ ត្រូវបានមើលឃើញថា ស័ក្ដិសមតាមបំណងរបស់ក្រុមប្រឹក្សា នៃក្លិបយក្សអង់គ្លេស ដែលចង់ស្ដារសម័យកាលជោគជ័យមកវិញ ក្រោមការដឹកនាំរបស់លោក Alex Ferguson៕ AFP/VN