ក្រុងបាសេឡូណា: ចំណាត់ថ្នាក់របស់ក្រុមអ្នកមានបុណ្យ Barcelona ក្នុងចំណោមក្រុមនៅទីកំពូលទាំង ៤ (Top4) របស់ក្របខ័ណ្ឌ La Liga មើលទៅមិនសូវជាមានសុវត្ថិភាពនោះឡើយ បន្ទាប់ពីបានរងបរាជ័យយ៉ាងគួរឱ្យភ្ញាក់ផ្អើល ក្នុងលទ្ធផល ១-០ កាលពីថ្ងៃចន្ទ ក្នុងទឹកដីរបស់ខ្លួនឯង ដោយសារក្រុម Cadiz ដែលកំពុងតស៊ូ ដើម្បីគេចឱ្យផុតពីការត្រូវកាត់ចោល ។
ការបញ្ចប់ទី ក្នុងរយៈចម្ងាយកៀកនឹងទីរបស់កីឡាករ Lucas Perez នៅដើមវគ្គទី២ បានផ្ដល់ឱ្យក្រុម Barca នូវបរាជ័យជាលើកទី២ ជាប់ៗគ្នា ពោលគឺក្រោយការធ្លាក់ចេញដ៏គួរឱ្យភ្ញាក់ផ្អើល ក្រោមស្នាដៃរបស់ក្រុម Eintracht Frankfurt ពីក្របខ័ណ្ឌ Europa League កាលពីថ្ងៃព្រហស្បតិ៍សប្ដាហ៍កន្លងមក។
ក្រុម Barca នៅតែឈរក្នុងចំណាត់ថ្នាក់លេខ ២ តែមាន ៦០ ពិន្ទុ ស្មើជាមួយក្រុមលេខ ៣ Sevilla និងក្រុមលេខ ៤ Atletico Madrid ខណៈក្រុមលេខ ៥ Real Betis តាមពីក្រោយតែ ៣ ពិន្ទុប៉ុណ្ណោះ។ យ៉ាងណាក្ដី ក្រុមរបស់លោក Xavi Hernandez ប្រកួតតិចជាងក្រុមនៅពីក្រោមទាំង ៣ នេះ ១ លើក។
តែបរាជ័យនេះ មានន័យថា ក្រុម Barca ឈ្នះម្ដងគត់ ក្នុងចំណោម ៤ ហ្គេមចុងក្រោយ ដោយ ១ លើកនោះ កើតមានតាមរយៈគ្រាប់បាល់់ជ័យជម្នះ ក្នុងម៉ោងបន្ថែមមានរបួស ទល់នឹងក្រុមលេខ ១៩ Levante ហើយច្បាស់ណាស់ គោលបំណងដែលពួកគេចង់បង្កភាពមិនស្រួលអារម្មណ៍ដល់ក្រុមកំពូលតារាង Real Madrid បានចប់សព្វគ្រប់ទាំងស្រុងហើយ ដ្បិតក្រុមអធិរាជស នាំមុខដាច់ដល់ទៅ ១៥ ពិន្ទុ ទោះប្រកួតលើស ១ លើក។
«យើងត្រូវតែរិះគន់ខ្លួនឯង។ យើងត្រូវតែនិយាយរឿងនានាចំពោះមុខគ្នាទៅវិញទៅមក។ នេះគឺក្រុម Barca ហើយយើងត្រូវតែប្រសើរជាងនេះ។ ក្នុងទឹកដីខ្លួនឯង យើងត្រូវតែបង្ហាញនូវការស្រេកឃ្លានជាងនេះ ការជឿជាក់ជាងនេះ និងបុគ្គលិកលក្ខណៈប្រសើរជាងនេះ។ នេះគឺជាលើកចុងក្រោយ ហើយយើងមិនត្រូវលេងបែបនេះទៀតទេ»។ គ្រូបង្វឹករបស់ក្រុម Barca លោក Xavi បានលើកឡើង។
ការបរាជ័យ ក្រោមថ្វីជើងរបស់ក្រុម Frankfurt គឺជាការលេបថ្នាំគ្រាប់ដ៏ល្វីង ដោយសារក្រុមនៅតំបន់កាតាឡាន់ បានព្រមចុះញ៉មជាមួយនឹងការមានប្រៀបក្នុងទឹកដីខ្លួន ដោយបានអនុញ្ញាតឱ្យអ្នកគាំទ្រចំនួនជាង ២០ ០០០ នាក់ របស់ក្រុមភ្ញៀវ ចូលកីឡដ្ឋាន Camp Nou។
លោក Xavi បាននិយាយកាលពីថ្ងៃសៅរ៍ថា ក្រុម Barca មានអារម្មណ៍ថា ត្រូវបានប្លន់នៅផ្ទះផ្ទាល់តែម្ដង ហើយអ្នកគាំទ្រ ១ ក្រុម ក្នុងចំណោមអ្នកគាំទ្រដ៏ស្មោះស្ម័គ្រ អត់មកចូលមើលហ្គេមជាមួយក្រុម Cadiz នេះ ដើម្បីជាការតវ៉ាដោយផ្នែកខាងក្រោយបង្គោលទីម្ខាង មានភាពទទេស្អាត៕ AFP/VN