.jpg)
Rooney របស់ Derby ឈរច្រត់ចង្កេះទាំងស្រងូតស្រងាត់ ក្នុងហ្គេមកន្លងមក។ AFP
ក្រុងឡុងដ៍: លោក Wayne Rooney និយាយថា គាត់ចង់សាងក្រុម Derby County ឡើងវិញ តែការមានម្ចាស់ថ្មី ត្រូវតែកើតឡើងឱ្យបានឆាប់ៗ ដើម្បីអាចរក្សាគ្រូបង្វឹករូបនេះឱ្យបន្តស្នាក់នៅទឹកដី Pride Park បន្ទាប់ពីក្លិបត្រូវបានកាត់ចេញពីក្របខ័ណ្ឌ Championship កាលពីថ្ងៃចន្ទ។
ការប៉ុនប៉ងដ៏ក្លាហានរបស់ក្រុម Derby ក្នុងការបន្តស្នាក់នៅលីគកម្រិតទី២ នេះ បើទោះបីជាត្រូវបានកាត់ចំនួន ២១ ពិន្ទុក៏ដោយនោះ បានដល់ទីបញ្ចប់ជាមួយនឹងបរាជ័យ ១-០ នៅផ្ទះរបស់ QPR។
ការវាយបកដ៏អស្ចារ្យរបស់ក្រុម Reading ដែលតាមពីក្រោយ ៤-១ រហូតបានស្មើ ៤-៤ នៅផ្ទះរបស់ក្រុម Swansea បានភ្ជាប់ជោគវាសនារបស់ Derby និងក្រុម Barnsley និង Peterborough នៅមាត់ជ្រោះនៃការធ្លាក់ចុះទៅលីគកម្រិតទី៣។
Derby បានពន្យារពេល សម្រាប់ការធ្វើពិធីជប់លៀងអបអរ ក្នុងការបានឡើងទៅក្របខ័ណ្ឌ Premier League របស់ក្រុម Fulham ដោយការយកឈ្នះ ២-១ កាលពីថ្ងៃសុក្រ តែត្រូវការការកើតមាននូវអព្ភូតហេតុ ដើម្បីបានទាញខ្លួនចេញឱ្យផុតពីស្ថានភាពអាក្រក់ ដែលបណ្តាលមកពីបញ្ហាហិរញ្ញវត្ថុ។
«ខ្ញុំចង់សាងក្រុមឡើងវិញ។ តែការមានម្ចាស់ថ្មី ត្រូវតែកើតមាន។ បើមិនមានទេនោះ ខ្ញុំមិនប្រាកដពីអនាគតរបស់ខ្ញុំ និងរបស់ក្លិបនោះឡើយ។ ការមានម្ចាស់ថ្មីនេះ ត្រូវតែកើតឡើងឱ្យបានឆាប់»។ នេះជាការលើកឡើងរបស់លោក Rooney។
Derby អាចនឹងឈរនៅពាក់កណ្ដាលតារាងស្រួលៗ បើកុំតែមានការកាត់ពិន្ទុ ដោយសារការជាប់ពិន័យរដ្ឋបាល និងការរំលោភលើច្បាប់ស្ថិរភាពផ្នែកហិរញ្ញវត្ថុ កាលពីរដូវកាលមុនៗទេនោះ៕ AFP/VN
