ក្រុងបែលក្រាដ: កីឡាករវាយកូនបាល់ (តិន្នីស) Novak Djokovic បាននិយាយកាលពីថ្ងៃចន្ទថា រូបគេកំពុងមានគម្រោងការ ក្នុងការត្រៀមខ្លួនឱ្យបានរួចជាស្រេចតាមដែលអាចធ្វើបាន សម្រាប់ការប្រកួតក្នុងកម្មវិធី French Open នៅបារាំង ខណៈដែលរូបគេកំពុងរៀបចំខ្លួនសម្រាប់កម្មវិធីប្រកួតដែលទើបតែជាលើកទី៣ របស់ខ្លួន នៃរដូវកាលនេះ ក្នុងក្រុងបែលក្រាដ នាសប្តាហ៍នេះ។
កីឡាករលេខ ១ ពិភពលោក ត្រូវបាននិរទេសខ្លួនចេញពីប្រទេសអូស្ត្រាលី នៅមុនការប្រកួតនៃកម្មវិធី Australian Open កាលពីខែមករា ជុំវិញស្ថានភាពនៃការចាក់វ៉ាក់សាំងការពារជំងឺកូវីដ ១៩ របស់គេ មុនពេលដែលរូបគេ ក៏ខកខានផងដែរ សម្រាប់កម្មវិធី Indian Wells និង Miami Open នៅសហរដ្ឋអាមេរិក។
នៅក្នុងការអវត្តមានរបស់ស៊ុបភើស្តារសញ្ជាតិស៊ែប៊ីនេះ កីឡាករអេស្ប៉ាញ Rafael Nadal បានឈ្នះពានលំដាប់ Grand Slam ក្នុងប្រភេទឯកត្តជន ជាកំណត់ត្រាលើកទី២១ នៅក្រុងមែលប៊ន ដោយធ្វើបានលើសកីឡាករ Djokovic និង Roger Federer ១ លើក។ កីឡាករ Djokovic កំពុងតែមានក្ដីសង្ឃឹម ក្នុងការតាមស្មើជាមួយកំណត់ត្រារបស់គូប្រជែងដ៏ខ្លាំងរូបនេះ នៅឯព្រឹត្តិការណ៍ French Open ដែលចាប់ផ្ដើមដំណើរការ នាថ្ងៃទី ២២ ខែឧសភា។
«ព្រឹត្តិការណ៍ Roland Garros (French Open) គឺជាការប្រកួតលើទីលានដីឥដ្ឋដ៏ធំបំផុត ហើយខ្ញុំកំពុងត្រៀមខ្លួនក្លាយជាផ្នែកមួយនៅទីនោះ តាមការគិតរបស់ខ្ញុំ។ តាមរយៈការត្រៀមខ្លួន និងគ្រប់យ៉ាង ដែលខ្ញុំកំពុងធ្វើ នាពេលនេះ គឺដើម្បីរៀបចំខ្លួនឱ្យបានព្រមតាមដែលអាច»។ នេះជាសម្ដីរបស់កីឡាករ Djokovic ដែលបានប្រាប់អ្នកសារព័តមាន នៅទីក្រុងបែលក្រាដ។
ជាមួយគ្នានេះ កីឡាករវ័យ ៣៤ ឆ្នាំ ក៏បានប្រាប់ផងដែរថា រូបគេកំពុងមានគម្រោងចូលរួមប្រកួតក្នុងកម្មវិធី Madrid Masters នៅអេស្ប៉ាញ និង Italian Open របស់អ៊ីតាលី នៅមុនព្រឹត្តិកាណ៍ Roland Garros នេះ។
កីឡាករ Djokovic បានបញ្ជាក់បន្ថែមថា៖ «គម្រោងផែនការរបស់ខ្ញុំ នាពេលនេះ រួមបញ្ចូលទាំងកម្មវិធី នៅក្រុងម៉ាឌ្រីដ និងក្រុងរ៉ូមផងដែរ។ ពិតមែនហើយ វាអាស្រ័យលើលទ្ធផលរបស់ខ្ញុំ នៅទីនេះ និងសភាពរាងកាយរបស់ខ្ញុំ។ យើងនឹងធ្វើការសម្រេច នាពេលបន្ទាប់»៕ AFP/VN