.jpg)
ក្រុងហាំប៊ើក: ក្រុម Freiburg បានធ្វើដំណើរទៅវគ្គផ្តាច់ព្រ័ត្រក្នុងកម្មវិធី German Cup ជាលើកដំបូង ក្នុងប្រវត្តិសាស្ត្ររបស់ក្លិប ជាមួយនឹងជ័យជម្នះ ៣-១ នៅឯទឹកដីរបស់ក្រុម Hamburg សម្រាប់ការប្រកួត ក្នុងវគ្គពាក់កណ្តាលផ្តាច់ព្រ័ត្រ កាលពីថ្ងៃអង្គារ ដោយគ្រាប់បាល់ទាំងអស់របស់ពួកគេកើតមានឡើងនៅក្នុងវគ្គទី១។
Freiburg របស់ក្របខ័ណ្ឌ Bundesliga បានគ្របសង្កត់លើក្រុម Hamburg ដែលបានចំណាយពេល ៤ រដូវកាលចុងក្រោយ នៅលីគកម្រិតទី២ ដោយគ្រាប់បាល់របស់កីឡាករ Nils Petersen, Nicolas Hoefler និង Vincenzo Grifo ដែលស៊ុតបញ្ចូលទីក្នុងរយៈពេល ៣៥ នាទី។
ក្រុម Hamburg អាចតបតបាន ១ គ្រាប់វិញ ជាមួយនឹងការនៅសល់ ២ នាទីទៀតប៉ុណ្ណោះ ដោយគ្រាប់បាល់នោះ បានមកពីការតែតរបស់កីឡាករ Robert Glatzel។
«វាគឺពិតជាពិបាកបរិយាយណាស់ ពោលគឺពួកយើងបានបង្កើតប្រវត្តិសាស្ត្រ។ ក្រុម Freiburg មិនធ្លាប់សម្រេចបានបែបនេះនោះឡើយពីពេលមុន។ យើងនៅអាចសម្រេចបានច្រើនជាងនេះទៀត ហើយខ្ញុំមិនខ្វល់ខ្វាយច្រើនឡើយ ចំពោះក្រុមដែលយើងត្រូវប្រឈមជាមួយក្នុងវគ្គផ្ដាច់ព្រ័ត្រ ព្រោះយើងគ្រាន់តែចង់ឈ្នះការប្រកួតប៉ុណ្ណោះ»។ នេះជាសម្ដីរបស់កីឡាករ Hoefler។
ដូច្នេះ វានឹងមានក្រុមគ្រងពានក្នុងកម្មវិធី German Cup ថ្មីសន្លាងមួយ នៅពេលដែលការប្រកួតផ្ដាច់ព្រ័ត្រត្រូវបានធ្វើឡើង នៅពហុកីឡដ្ឋានអូឡាំពិក (Olympic Stadium) ក្នុងក្រុងប៊ែរឡាំង នាថ្ងៃទី ២១ ខែឧសភា ដោយមិនថា ក្រុម Freiburg ឬក៏ក្រុម Union Berlin និងក្រុម RB Leipzig ដែលជាគូត្រូវតទល់គ្នា នៅថ្ងៃពុធ ក្នុងវគ្គ ១/២ ផ្ដាច់ព្រ័ត្រនេះ សុទ្ធតែមិនធ្លាប់បានលើកពានរង្វាន់នេះឡើយ៕ AFP/VN
