ក្រុងឡុងដ៍: ក្រុមមេឃខៀវ Manchester City ដណ្តើមចំណាត់ថ្នាក់នៅទីកំពូល ក្នុងតារាងពិន្ទុ នៃក្របខ័ណ្ឌ Premier League ពីក្រុម Liverpool បានវិញ ជាមួយនឹងជ័យជម្នះ ៣-០ លើក្រុមភ្ញៀវ Brighton កាលពីថ្ងៃពុធ ខណៈដែលក្រុមកាំភ្លើងធំ Arsenal បានធ្វើឱ្យការប្រជែងតំណែង ១ ក្នុងចំណោមក្រុមនៅទីកំពូលទាំង ៤ (Top4) ដោយការយកឈ្នះក្រុមតោខៀវ Chelsea ៤-២ នៅកីឡដ្ឋាន Stamford Bridge។
ក្រុមហង្សក្រហម Liverpool ស្ទុះឡើងទៅឈរទី១ នៃតារាងពិន្ទុ ដោយការធ្វើឱ្យក្រុមគូប្រជែងស្លាប់រស់បិសាចក្រហម Manchester United បែកខ្ញែកខ្ចាត់ខ្ចាយ ដោយយកឈ្នះ ៤-០ ក្នុងទឹកដី Anfield កាលពីថ្ងៃអង្គារ។
ក្រុម Man City មិនសូវជាមានភាពប្រញាប់ប្រញាល់ប៉ុន្មានទេ តែបានទប់ទល់ ចំពោះក្ដីកង្វល់របស់ខ្លួន ដើម្បីវិលទៅដើរលើផ្លូវ នៃការនាំមុខ ១ ពិន្ទុវិញ សម្រាប់ការប្រកួតប្រជែងដណ្តើមជើងឯកលីគកំពូល ជាមួយនឹងគ្រាប់បាល់ ដែលធ្វើបានសម្រេចដោយខ្សែបម្រើប្រយុទ្ធទាំង ៣ រូប គឺ Riyad Mahrez, Phil Foden និង Bernardo Silva។
«យើងកំពុងប្រឈមជាមួយក្រុម ១ ក្នុងចំណោមក្រុមដ៏ល្អបំផុតមិនធ្លាប់មាន។ ប្រសិនបើយើងភ្លាត់របូតពិន្ទុនោះ ពួកគេនឹងកា្លយជាជើងឯកភ្លាម តែបើយើងឈ្នះគ្រប់ហ្គេមរបស់យើងនោះ យើងនឹងក្លាយជាជើងឯក»។ នេះជាការលើកឡើងរបស់គ្រូបង្វឹករបស់ក្រុម Man City លោក Pep Guardiola ដែលនិយាយយោងដល់ការប្រឈមជាមួយក្រុម Liverpool។
ដោយឡែកក្រុម Arsenal នៅមិនទាន់ខ្ទាតចេញពីការប្រជែងតំណែង Top4 ដើម្បីបានសិទ្ធិទៅលេងនៅក្របខ័ណ្ឌ Champions League នៅឡើយទេ បើទោះជានៅមុននេះ បានជួបនូវបរាជ័យ ៣ ដងបន្តបន្ទាប់គ្នាក៏ដោយ ដោយពេលនេះ ពួកគេឡើងទៅមានពិន្ទុស្មើជាមួយក្រុមលេខ ៤ Tottenham បន្ទាប់ពីឆ្លងកាត់ការប្រកួតមួយ ដែលមានការទម្លុះសំណាញ់ទីគ្នាទៅវិញទៅមក ៦ គ្រាប់។
«វាជាយប់ដ៏ពិសេសអស្ចារ្យ ហើយកីឡាករទាំងអស់សមនឹងទទួលបានវា។ វាមាននូវភាពតានតឹងចំនួន ២ សប្ដាហ៍ តែអ្នកត្រូវតែធ្វើឱ្យប្រសើរឡើងវិញ ហើយបង្ហាញឱ្យឃើញនូវស្មារតីតស៊ូ»។ នេះជាសម្ដីរបស់គ្រូបង្វឹកក្រុម Arsenal លោក Mikel Arteta។
ការស៊ុតបាល់បញ្ចូលទីបានក្លាយជាបញ្ហា សម្រាប់ក្រុមរបស់លោក Arteta តាំងពីមានការចាកចេញរបស់កីឡាករ Pierre-Emerick Aubameyang តែកីឡាករ Eddie Nketiah ឆក់យកឱកាសនេះ ជាមួយនឹងការចាប់ផ្ដើមក្នុងជម្រើសដំបូងដ៏កម្រ ដើម្បីស៊ុតបញ្ចូលទីគ្រាប់ដំបូងរបស់ខ្លួននៅ Premier League ក្នុងរយៈពេលជាង ១ ឆ្នាំ។
កីឡាកររកគ្រាប់បាល់បានច្រើនជាងគេជាកំណត់ត្រា សម្រាប់ក្រុមជម្រើសជាតិអង់គ្លេសអាយុក្រោម ២១ ឆ្នាំ បានដាក់ទោសក្រុមម្ចាស់ផ្ទះ ដោយការរត់ទៅយកបាល់ ដែលខ្សែការពារ Andreas Christensen បញ្ជូនភ្លាត់ រួចបណ្ដើរទៅស៊ុតផុតដៃអ្នកចាំទី Edouard Mendy ចូលទីយ៉ាងស្អាត។
ក្រុម Chelsea បានតាមស្មើវិញត្រឹមតែ ៤ នាទី បន្ទាប់ពីនោះ នៅពេលដែលខ្សែប្រយុទ្ធ Timo Werner ស៊ុតប៉ះខ្សែបម្រើការពារ Granit Xhaka ហើយបាល់ប្លាតចូលទី តែកីឡាករ Emile Smith ជួយឱ្យក្រុមកាំភ្លើងធំ នាំមុខម្ដងទៀត មុនពេលខ្សែការពារ Cesar Azpilicueta កៀសបាល់បញ្ចូលទី ពីការបញ្ជូនបាល់កាត់ចូលក្នុងតំបន់គ្រោះថ្នាក់របស់កីឡាករ Mason Mount ដើម្បីឱ្យមានលទ្ធផលស្មើគ្នា ២-២ មុនចប់វគ្គទី១។
មានការកាត់បន្ថយចំនួនមនុស្សនៅកីឡដ្ឋាន Stamford Bridge ជាលើកដំបូង ចាប់តាំងពីការមានដាក់កំហិត ចំពោះក្លិបក្នុងការរារាំងពួកគេមិនឱ្យលក់សំបុត្រ ដែលមិនបានទិញទុកមុនការដាក់ទណ្ឌកម្មរបស់រដ្ឋាភិបាលចក្រភពអង់គ្លេស លើម្ចាស់ក្លិប លោក Roman Abramovich។
តែចូលដល់វគ្គទី២ ក្រុម Arsenal គឺជាអ្នកដែលស៊ុតបញ្ចូលទីតែម្ខាង ២ គ្រាប់ផ្ទួនៗ ដែលធ្វើបាននៅដើមតង់ ១ គ្រាប់ ដោយកីឡាករ Nketiah និងនៅចុងតង់ដោយខ្សែបម្រើប្រយុទ្ធ Bukayo Saka៕ AFP/VN