.jpg)
Matthijs De Ligt (ឆ្វេង) របស់ Juve ប្រជែងតែតបាល់ជាមួយ Nicolas Gonzalez របស់ Fiorentina។ AFP
ក្រុងទូរីន: ក្រុមម្ចាស់ជើងឯកចាស់ Juventus បានកក់កៅអី ក្នុងវគ្គផ្តាច់ព្រ័ត្រនៃកម្មវិធី Italian Cup នាខែក្រោយ ដោយត្រូវតទល់នឹងក្រុម Inter Milan រួចហើយ ជាមួយនឹងជ័យជម្នះ ២-០ លើក្រុម Fiorentina ពីការប្រកួតក្នុងវគ្គពាក់កណ្តាលផ្តាច់ព្រ័ត្រ ជើងទី២ នាក្រុងទូរីន (Turin) កាលពីថ្ងៃពុធ ដោយមានប្រៀបជាងក្នុងលទ្ធផលសរុបទាំង ២ ជើង ៣-០។
ក្រុមសេះបង្កង់ Juve បានរបូតបល្ល័ង្ករបស់ក្របខ័ណ្ឌ Serie A របស់ពួកគេ កាលពីរដូវកាលមុន ឱ្យក្រុមពស់ធំ Inter Milan ហើយក៏បានភ្លាត់បរាជ័យ ក្នុងការប្រកួតពានរង្វាន់ ក្នុងកម្មវធី Italian Super Cup ដោយសារក្រុមគូប្រជែង នៅភាគខាងជើងមួយនេះដែរ កាលពីខែមករា។
ដោយកំពុងឈរនៅលេខ ៤ ក្នុងតារាងពិន្ទុ Serie A នោះ ក្ដីសង្ឃឹមរបស់ក្រុម Juve ក្នុងការគេចឱ្យផុតពីការបញ្ចប់រដូវកាល ដោយមិនមានពានរង្វាន់អ្វីមួយក្នុងដៃ ជាលើកដំបូង ចាប់តាំងពីឆ្នាំ ២០១១ នឹងទំនងជាអាចនៅសម្រេចបានពេលត្រូវប្រកួត នៅឯពហុកីឡដ្ឋានអូឡាំពិក ក្នុងទីក្រុងរ៉ូម។
«ខ្ញុំមិនអាចសុំអ្វីពីពួកក្មេងៗ (កីឡាករ) ទាំងនេះបន្ថែមបានទៀតទេ ព្រោះរយៈពេល ៤ ខែចុងក្រោយនេះ ពួកគេជាកីឡាករមានគុណភាពដដែលគ្រប់ពេលទាំងអស់។ ពួកគេកំពុងលេងដោយបេះដូង (លេងដោយមិនខ្វល់ការហត់នឿយ) របស់ពួកគេ។ យើងការពារបានយ៉ាងល្អ នៅល្ងាចនេះ»។ គ្រូបង្វឹករបស់ក្រុម Juve លោក Massimiliano Allegri បាននិយាយទៅកាន់ប្រព័ន្ធផ្សព្វផ្សាយព័ត៌មាន Mediaset។
ក្រុម Juve ដែលមានរហស្សនាមម្យ៉ាងទៀតថា «The Old Lady» (ស្ត្រីវ័យចំណាស់) ធ្វើដំណើរឆ្ពោះមកកាន់ការប្រកួតជើងទី២ នេះ ជាមួយនឹងការមានប្រៀបលើក្រុមគូប្រជែងនៅតំបន់ Tuscany ដោយសារគ្រាប់បាល់តែ ១ គ្រាប់ ដែលកើតឡើងពីការធ្វើឱ្យចូលទីខ្លួនឯងរបស់កីឡាករ Lorenzo Venuti កាលពីហ្គេមជើងទី១ នាក្រុងហ្វ្ល័រ៉ង់។
សម្រាប់ការប្រកួត កាលពីថ្ងៃពុធនេះ កីឡាករ Federico Bernardeschi ដែលជាអតីតខ្សែបម្រើរបស់ក្រុម Fiorentina ផ្ទាល់តែម្ដង បានបំប៉ោងសំណាញ់ទីឱ្យក្រុមម្ចាស់ផ្ទះនាំមុខ នៅនាទីទី៦០ ហើយបន្ទាប់មក កីឡាករ Danilo បន្ថែមគ្រាប់ទី២ ត្រឹមតែប៉ុន្មាននាទី មុនសំឡេងកញ្ចែចុងក្រោយបន្លឺឡើង ដែលលទ្ធផលនេះ នាំឱ្យក្រុម Juve ឡើងទៅប្រជែង ដើម្បីបានឈ្នះពាននេះ ជាកំណត់ត្រាលើកទី១៥។
កាលពីថ្ងៃអង្គារ ខ្សែប្រយុទ្ធ Lautaro Martinez ស៊ុតបញ្ចូលទី ២ គ្រាប់ម្នាក់ឯង ខណៈក្រុម Inter យកឈ្នះក្រុមគូប្រជែងរួមក្រុម AC Milan ៣-០ ក្រោយជើងទី១ ស្មើគ្នាដោយគ្មានគ្រាប់បាល់ ហើយម្ចាស់ជើងឯក ក្នុងកម្មវិធីខាប់នេះចំនួន ៧ សម័យកាល សម្លឹងដល់ការដណ្ដើមពានរង្វាន់នេះមកគ្រប់គ្រងវិញ គិតតាំងពីឈ្នះលើកចុងក្រោយ ក្នុងឆ្នាំ ២០១១៕ AFP/VN
