ភ្នំពេញៈ កីឡាការិនីជម្រើសជាតិដ៏ឆ្នើមរបស់កម្ពុជា ស្រួង ភាវី ដែលមានភាពល្បីល្បាញខ្លាំងនៅកូរ៉េ លើការលេងប៊ីយ៉ា «ការ៉ុម» នោះ ចង់ផ្លាស់ប្តូរផ្នត់គំនិតយុវជនកម្ពុជា ដោយជំរុញឱ្យពួកគេប្តូរទម្លាប់ពីការលេងប៊ីយ៉ាស្នូកឃ័រ វាយចូលរន្ធ មកលេងប៊ីយ៉ាការ៉ុមវិញ ដើម្បីអាចសាងកេរ្តិ៍ឈ្មោះបានល្បី ហើយអាចប្រើអាជីពនេះ ជួយខ្លួនឯង និងសាងកិត្តិយសជូនប្រទេសជាតិ។
«ខ្ញុំមិននឹកស្មានសោះថា មានប្រជាជនកូរ៉េ មកនៅស្រុកខ្មែរច្រើនបែបនេះទេ ដល់អ៊ីចឹងខ្ញុំសប្បាយចិត្ត ដែលមានកន្លែងហ្វឹកហាត់ប៊ីយ៉ាការ៉ុមនេះ ហើយវាក៏ជាការល្អសម្រាប់ប្រជាពលរដ្ឋខ្មែរយើង ដែលគាត់មានឱកាសអាចហ្វឹកហាត់លេងប៊ីយ៉ាការ៉ុមនេះ ព្រោះនេះជាប្រភេទកីឡាមួយដែលល្អខ្លាំង ទាំងសម្រាប់ខ្លួនឯង គ្រួសារ និងសង្គម ជាពិសេសជួយខ្លួនឯងបានច្រើន ដោយសារកីឡាប្រភេទនេះ មានប្រាក់រង្វាន់ច្រើន អ៊ីចឹងបើយើងពូកែ យើងអាចឈ្នះបានប្រាក់រង្វាន់ទាំងនោះ និងមានអ្នកជួយឧបត្ថម្ភ ដែលនឹងអាចជួយដល់ជីវភាពរបស់យើងបាន»។
ម្ចាស់ពាន LPBA Championship 2021 ស្រួង ភាវី បានលើកឡើងបែបនេះ នៅពេលដែលអ្នកស្រី ត្រូវបានអញ្ជើញដោយប្រជាជនកូរ៉េ រស់នៅកម្ពុជា ឱ្យចូលរួមការប្រកួតលក្ខណៈមិត្តភាពមួយនៅផ្សារទំនើបអ៊ីអនសែនសុខ កាលពីថ្ងៃអង្គារ គឺក្នុងអំឡុងពេលកីឡាការិនីមានដើមកំណើតនៅខេត្តត្បូងឃ្មុំរូបនេះ បានធ្វើដំណើរពីប្រទេសកូរ៉េខាងត្បូង មកលេងស្រុកកំណើត ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំខាល កាលពីពេលថ្មីៗនេះ។
ជាមួយគ្នានេះ ស្រួង ភាវី ដែលមានស្វាមីជាជនជាតិកូរ៉េនោះ បានអះអាងថា ការលេងប៊ីយ៉ាកូរ៉ុម និងអាចជួយឱ្យយើងមានឈ្មោះល្បីល្បាញ ព្រមទាំងអាចជួយផ្សព្វផ្សាយអំពីប្រទេសជាតិយើង នៅលើឆាកអន្តរជាតិ។ «នៅពេលយើងល្បី ហើយប្រកួតឈ្នះ យើងអាចផ្សព្វផ្សាយ និងធ្វើឱ្យគេស្គាល់ប្រទេសកម្ពុជា កាន់តែច្រើន ដូចជាខ្ញុំអ៊ីចឹង ខ្ញុំបានទៅស្ទើរគ្រប់ប្រទេសនៅអឺរ៉ុប ព្រោះពីមុនពួកគាត់មិនសូវជាស្គាល់កម្ពុជាយើងទេ ដោយគាត់សួរខ្ញុំថា អ្នកឯងមកពីណា ប៉ុន្តែពេលខ្ញុំល្បី គឺពួកគាត់បានស្គាល់ ហេតុនេះពេលមានការប្រកួត ពួកគាត់តែងទាក់ទងមកសហព័ន្ធរបស់ខ្ញុំ ដើម្បីឱ្យខ្ញុំទៅប្រកួតនៅប្រទេសរបស់គាត់»។
សម្រាប់រយៈពេលជាង ១០ ឆ្នាំមកហើយ ដែល ស្រួង ភាវី បានទៅរស់នៅសាធារណរដ្ឋកូរ៉េជាមួយស្វាមី ដែលជាជនជាតិកូរ៉េ។ បន្ទាប់មកអ្នកស្រី បានចាប់ផ្ដើមអាជីពកីឡាស្នូកឃ័រ ប្រភេទប៊ីយ៉ាការ៉ុមនេះ ហើយបានកសាងកេរ្ដិ៍ឈ្មោះល្បីរន្ទឺ នៅកូរ៉េ និងលើពិភពលោក ក្នុងនាមជាកីឡាការិនីប៊ីយ៉ាការ៉ុមរបស់កម្ពុជាតែម្នាក់គត់ ដែលដណ្តើមបានមេដាយមាស ប្រាក់ សំរឹទ្ធ និងពានពីព្រឹត្តិការណ៍ធំៗ ជាបន្តបន្ទាប់។
ជាក់ស្ដែង កាលពីចុងឆ្នាំ ២០២១ កន្លងមកនេះ ភាវី បានឈ្នះពានរង្វាន់ដ៏ធំ Blue One Resort LPBA Championship ក្រោយផ្ដួលកីឡាការិនីជើងខ្លាំងកូរ៉េ Kim Gayoung នៅវគ្គផ្ដាច់ព្រ័ត្រ ហើយភាពល្បីល្បាញរបស់ ស្រួង ភាវី បានធ្វើឱ្យពិភពលោក ជាពិសេសប្រជាជនកូរ៉េ មានការគាំទ្រ និងឱ្យតម្លៃដល់ស្នាដៃរបស់អ្នកស្រី ព្រមទាំងចូលរួមគ្នាជួយដល់អ្នកស្រី។
«សម្រាប់ការធ្វើដំណើរ មកលេងកម្ពុជាលើកនេះ ខ្ញុំមកដើម្បីការងារមនុស្សធម៌ ហើយដូចបងដឹងហើយថា ខ្ញុំជាបុគ្គលម្នាក់ដែលល្បីខ្លាំង អ៊ីចឹងប្រជាជនកូរ៉េមិនថា លោកទៅដល់ទីណាទេ គឺគាត់តែងស្គាល់ និងរំឭកដល់ខ្ញុំជានិច្ច ដោយប្រជាជនកូរ៉េ តែងជួយ និងគាំទ្រដល់ខ្ញុំ។ ខ្ញុំពិតជាមានក្តីរំភើប និងមានមោទនភាពខ្លាំង ចំពោះខ្លួនឯង ហើយក៏អរគុណដល់ប្រជាជនកូរ៉េ ដែលលោកតែងតែជួយលើកស្ទួយ និងផ្តល់តម្លៃនូវអ្វី ដែលជាសមិទ្ធផលរបស់នាងខ្ញុំ ទោះបីខ្ញុំជាប្រជាជនកម្ពុជាក៏ដោយ»។
ស្រួង ភាវី បានបន្ថែមថា៖ «នៅពេលប្រជាជនកូរ៉េ បានអញ្ជើញឱ្យខ្ញុំមកចូលរួមក្នុងកម្មវិធីនេះ ខ្ញុំមានអារម្មណ៍ថា រំភើប ហើយគិតថា ថ្ងៃខាងមុខពួកគាត់នឹងជួយដល់កីឡាករដូចជារូបខ្ញុំ ហើយឥឡូវ យើងមានកីឡាករកម្ពុជាម្នាក់ដែរ ដែលប្អូនកំពុងតែខំប្រឹងហ្វឹកហាត់ ហើយសង្ឃឹមថា ថ្ងៃមុខកីឡាប៊ីយ៉ាការ៉ុមនៅប្រទេសកម្ពុជា នឹងរីកចម្រើនខ្លាំង»។
ជាមួយចក្ខុវិស័យនេះ ស្រួង ភាវី ពិតជាចង់ពង្រីកការយល់ដឹងរបស់ប្រជាជនកម្ពុជា ជាពិសេសយុវជន ដើម្បីឱ្យងាកពីការលេងប៊ីយ៉ាស្នូកឃ័រវាយចូលរន្ធ ជាលក្ខណៈកម្សាន្ត មកចាប់យកការលេងប៊ីយ៉ាការ៉ុមនេះវិញ ព្រោះអ្នកស្រីបានអះអាងថា វិស័យកីឡាប្រភេទនេះ មិនត្រូវតែជួយឱ្យយើងមានកេរ្តិ៍ឈ្មោះ និងអាចរកចំណូលជួយដល់ខ្លួនឯងប៉ុណ្ណោះទេ ប៉ុន្តែវាបានជួយអភិវឌ្ឍយើង ឱ្យក្លាយជាមនុស្ស ដែលមានភាពរឹងមាំ។
«ពីមុន ខ្ញុំក៏ធ្លាប់ឭគេនិយាយដែរថា ល្បែងប៊ីយ៉ាការ៉ុម មិនល្អប៉ុន្មានទេ ប៉ុន្តែយើងត្រូវខំប្រឹងកម្ចាត់ការគិតមិនល្អនេះចោល ហើយព្រោះពេលនេះ ប៊ីយ៉ាការ៉ុម ត្រូវបានគេចាត់ទុកថា ជាប្រភេទកីឡាមួយដ៏ល្អ ព្រោះវាអាចលេងបានតាំងពីក្មេងដល់ចាស់ ពិសេសកីឡានេះ ធ្វើឱ្យយើងមានស្មារតីនឹងនរ ជាមួយការផ្តិតផ្ចង់នឹងកីឡានេះ។ ជាក់ស្តែងពីមុន កាលខ្ញុំមិនទាន់ហាត់កីឡានេះ ខ្ញុំជាមនុស្សផ្សេង ប៉ុន្តែពេលខ្ញុំបានហាត់កីឡានេះ ខ្ញុំមានអារម្មណ៍ថា ខ្លួនឯងជាមនុស្សម្នាក់ ដែលចេះអត់ធ្មត់ ចេះគិត ព្រមទាំងយកឈ្នះលើចិត្តខ្លួនឯង និងឈ្នះលើដៃគូបាន។ និយាយទៅវាជួយឱ្យមានការអភិវឌ្ឍឱ្យយើងក្លាយជាមនុស្ស ដែលមានភាពរឹងមាំម្នាក់»។
ទន្ទឹមនឹងនេះ ស្រួង ភាវី ក៏បានបង្ហាញពីមហិច្ឆតា ធ្វើឱ្យកីឡានេះ មានភាពល្បីល្បាញនៅកម្ពុជាផងដែរ ដើម្បីកំុឱ្យចាញ់ប្រទេសវៀតណាម។ អ្នកស្រីបានបញ្ជាក់ថា៖ «វិស័យកីឡាប៊ីយ៉ាការ៉ុមនេះ នៅក្នុងប្រទេសកូរ៉េ មានការរីកចម្រើនខ្លាំង ហើយប្រទេសវៀតណាម ជាអ្នកជិតខាងយើង ក៏រីកចម្រើនដូចប្រទេសកូរ៉េដែរ អ៊ីចឹងពេលឃើញរូបភាពបែបនេះ ខ្ញុំមានការច្រណែនខ្លាំង ដោយគិតថា ប្រជាជនរបស់យើងក៏ពូកែលេងប៊ីយ៉ា ស្នូកឃ័រដែរ គ្រាន់តែជំនាញប៊ីយ៉ាការ៉ុមនេះ មិនទាន់មានការយល់ដឹងបានទូលំទូលាយ ប៉ុន្តែខ្ញុំសង្ឃឹមថា ពីថ្ងៃនេះ ឬតទៅ ប្រជាជនខ្មែរយើង នឹងចាប់អារម្មណ៍ប៊ីយ៉ាការ៉ុមនេះ ហើយងាកមកព្យាយាមហ្វឹកហាត់ទាំងអស់គ្នា ដើម្បីសាងភាពល្បីល្បាញ»៕