.jpg)
Fury (ស្ដាំ) ម៉ាត់ចំផ្ទៃមុខរបស់ Whyte អំឡុងការប្រកួតការពារខ្សែក្រវាត់ WBC ក្នុងប្រភេទទម្ងន់ធ្ងន់ កាលពីថ្ងៃសៅរ៍។ AFP
ក្រុងឡុងដ៍: អ្នកប្រដាល់ Tyson Fury នៅតែអាចគ្រងខ្សែក្រវាត់ ក្នុងប្រភេទទម្ងន់ធ្ងន់របស់ស្ថាប័នក្រុមប្រឹក្សាប្រដាល់ពិភពលោក (WBC) ដដែល កាលពីយប់ថ្ងៃសៅរ៍ (ព្រឹកថ្ងៃ-អាទិត្យនៅកម្ពុជា) ដោយការវាយឱ្យគូបដិបក្ខរបស់ខ្លួន Dillian Whyte សន្លប់ក្នុងទឹកទី៦ នៃជំនួបរវាងជនជាតិអង់គ្លេសតែ ១ នៅឯកីឡដ្ឋាន Wembley ដែលពេញដោយភាពរីករាយ មុនពេលដែលរូបគេបានលើកឡើងម្តងទៀតថា ឥឡូវនេះ រូបគេនឹងចូលនិវត្តន៍។
ជ័យជម្នះរបស់កីឡាករ ដែលឱ្យរហស្សនាមខ្លួនថា «Gypsy King» (ស្ដេច Gypsy) និងដែលត្រូវធ្វើនៅលើទឹកដីរបស់ចក្រភពអង់គ្លេសលើកដំបូង រយៈពេល ៤ ឆ្នាំនោះ ត្រូវបានធ្វើសាក្សីដោយអ្នកចូលទស្សនា ៩៤ ០០០ នាក់ ក្នុងក្រុងឡុងដ៍ ដែលជាចំនួនជាប់កំណត់ត្រារបស់ចក្រភពអង់គ្លេស ក្រោយបញ្ចប់សង្គ្រាម។
អ្នកប្រដាល់មិនចាញ់សោះ Fury វ័យ ៣៣ ឆ្នាំ បាននិយាយថា នេះនឹងក្លាយជាឡើងសង្វៀនចុងក្រោយរបស់គេ ហើយបានប្រកាសភ្លាមៗ បន្ទាប់ពីការប្រកួតនោះថា៖ «នេះប្រហែលជា ឆាកចុងក្រោយសម្រាប់ស្តេច Gypsy ហើយ»។
បន្ទាប់ពីបើកឆាក ដោយប្រយ័ត្នប្រយែង ម្ចាស់ខ្សែក្រវាត់ Fury ចាប់ផ្ដើមឆក់ឱកាស ដោយព្យាយាមគ្រប់គ្រងការប្រកួតនេះ និងវាយចេញសំដៅកន្លែងសំខាន់ៗ ដូចជាក្បាល និងដងខ្លួនរបស់គូប្រកួត។
Whyte អាចតវ៉ាតិចតួច ពេលត្រូវបានហៅឱ្យផ្អាក ដោយនៅសល់ ១ វិនាទីទៀត មុនការប្រកួតឈានដល់ពាក់កណ្តាលផ្លូវ ខណៈរូបគេច្បាស់ណាស់ ឈរមិននឹងនោះឡើយ បន្ទាប់ពីត្រូវបានវាយចំយ៉ាងធ្ងន់ជាលើកដំបូង នៃការប្រកួតនេះ ពេល Fury មានឱកាសម៉ាត់សើយស្ដាំយ៉ាងដំណំ។
អ្នកប្រដាល់កម្ពស់ ៦ ហ្វ៊ីត និង ៩ អ៊ិញ (២,០៦ ម៉ែត្រ) Fury អាចប្រើប្រាស់កម្ពស់ដ៏ខ្ពស់មហិមារបស់ខ្លួន ជាប្រយោជន៍ ក្នុងការទប់ឱ្យ Whyte រកច្រកចេញមិនឃើញ ខណៈអ្នកឡើងមកដណ្ដើមខ្សែក្រវាត់រូបនេះ ត្រូវបានធ្វើឱ្យមើលទៅដូចជាវង្វេងវង្វាន់ និងស្មុគស្មាញ។
Whyte ដែលបែកភ្នែកខាងស្តាំ បន្ទាប់ពីមានការប៉ះទង្គិចក្បាលគ្នា ដោយចៃដន្យ ត្រូវបានរៀបចំជាលើកដំបូង ជាគូប្រកួតលេខ ១ របស់ស្ថាប័ន WBC ក្នុងរយៈពេលជិត ៤ ឆ្នាំកន្លងទៅនេះ តែរូបគេមិនអាចឆក់យកឱកាសដ៏ល្អនេះ ដើម្បីបង្ហាញនូវភាពខ្លាំងរបស់ខ្លួនបានឡើយ។
«ខ្ញុំរំភើបយ៉ាងខ្លាំងជាមួយនឹងការគាំទ្រ។ ខ្ញុំមិនអាចជឿបានទេថា សុភាពបុរស និងសុភាពនារី ដែលជាមិត្តរួមជាតិរបស់ខ្ញុំ ចំនួន ៩៤ ០០០ នាក់ បានមកកាន់ទីនេះ ដើម្បីមើលខ្ញុំធ្វើការប្រកួត។ ខ្ញុំគ្រាន់តែចង់និយាយដោយស្មោះអស់ពីចិត្តថា អរគុណខ្លាំងណាស់ដល់អ្នកគ្រប់គ្នា ដែលបានទិញសំបុត្រមកទីនេះ នៅយប់នេះ ឬក៏នៅរហូតដល់យប់ជ្រៅ ដើម្បីមើលតាមកញ្ចក់ទូរទស្សន៍»។ នេះជាសម្ដីរបស់កីឡាករ Fury។
បើ Fury ធ្វើតាមគម្រោង ដែលសម្រេចថា នឹងព្យួរស្រោមដៃប្រដាល់របស់ខ្លួននោះ រូបគេនឹងបាត់បង់ឱកាស ក្នុងការឡើងប្រឈមជាមួយអ្នកប្រដាល់សញ្ជាតិអ៊ុយក្រែន Oleksandr Usyk ដែលបច្ចុប្បន្ន ជាម្ចាស់ខ្សែក្រវាត់របស់ស្ថាប័ន WBA IBF និង WBO ឬក៏ប៉ះជាមួយមិត្តរួមជាតិ Anthony Joshua សម្រាប់ការប្រកួត ដើម្បីប្រមូលខ្សែក្រវាត់ទម្ងន់ធ្ងន់ទាំងអស់។
គ្មានអ្នកប្រដាល់រូបណា បានគ្រងខ្សែក្រវាត់ធំៗទាំងអស់របស់ពិភពលោក ក្នុងប្រភេទទម្ងន់ធ្ងន់នេះឡើយ គិតចាប់តាំងពីអតីតកីឡាករឈាមជ័រអង់គ្លេស Lennox Lewis ដែលបានក្លាយជាជើងឯករបស់ស្ថាប័នធំៗទាំង ៤ ក្នុងឆ្នាំ ១៩៩៩ ហើយ Fury ដែលមិនទាន់បរាជ័យសោះ ក្នុងចំណោមការឡើងសង្វៀនទាំង ៣៣ ដង ទំនងជាបណ្ដោយឱ្យឱកាសនេះរំលងហើយ៕ AFP/VN
