ក្រុងប៊ែរឡាំង: ទោះបីជាកីឡាកររបស់ពួកគេ បានបាញ់ស្រាបៀរដាក់គ្នាទៅវិញទៅមកទទឹកពេញខ្លួន ដើម្បីជាការអបអរ ចំពោះការឈ្នះជើងឯកនៃក្របខ័ណ្ឌ Bundesliga ជាលើកទី១០ រដូវកាលជាប់ៗគ្នា កាលពីថ្ងៃសៅរ៍ក៏ដោយ ក៏ក្រុម Bayern Munich នៅតែមិនទាន់រលុបបាត់ទាំងស្រុង នូវការឈឺចាប់ ដែលចេះតែវិលវល់ក្នុងគំនិត ក្រោយធ្លាក់យ៉ាងគួរឱ្យភ្ញាក់ផ្អើលពីក្របខ័ណ្ឌ Champions League ក្រោមស្នាដៃរបស់ក្រុម Villarreal ឡើយ។
ជ័យជម្នះ ៣-១ លើក្រុមលេខ ២ Borussia Dortmund ក្នុងការប្រកួតនៅកីឡដ្ឋាន Allianz Arena បានធ្វើឱ្យក្រុម Bayern នាំមុខដាច់ ១២ ពិន្ទុ ជាមួយនឹងការប្រកួតនៅសល់ ៣ ដងទៀត ដោយលទ្ធផលនេះ បង្កើតឱ្យមានការងូតស្រាបៀរនៅលើទីលាន ដូចតាមទម្លាប់ដែលធ្លាប់ធ្វើកន្លងមក។
Bayern គឺជាក្លិបដំបូងគេ ដែលឈ្នះជើងឯក ១០ ដងជាប់ៗគ្នា ក្នុងលីគ ១ ក្នុងចំណោមលីគធំៗរបស់អឺរ៉ុប តែអារម្មណ៍ក្នុងរង្វង់នៃគាំទ្ររបស់ក្រុម Bayern គឺថា ការឈ្នះពានលីគកំពូល ១ លើកទៀតនេះ គឺជាការលួងលោមចិត្តបន្តិចបន្តួច សម្រាប់ការខ្ទាតចេញពីកម្មវិធី ២ ផ្សេងទៀត គឺ German Cup និង Champions League។ ការឈ្នះពានរង្វាន់ Bundesliga បានក្លាយជាការរំពឹងដ៏តូចបំផុតរបស់ក្រុម Bayern នៃរដូវកាលនីមួយៗ។
«ពេលយើងបានក្លាយជាជើងឯករបស់អាល្លឺម៉ង់នោះ អ្នកនឹងមានការរីករាយរយៈពេល ១ សប្ដាហ៍។ ខ្ញុំមានការខកចិត្ត ដែលការឈ្នះជើងឯកនេះ បានធ្លាក់តម្លៃយ៉ាងខ្លាំង។ គ្មានអ្នកណាម្នាក់ រីករាយសោះ»។ នេះជាការលើកឡើងរបស់អតីតប្រធានក្លិប លោក Uli Hoeness ដែលប្រាប់កាសែត SZ នៅក្រុងមុយនិច ដោយរឭកឡើងវិញនូវការឈ្នះពាន Bundesliga ចំនួន ៣លើក ជាមួយក្រុម Bayern កាលពីទសវត្សរ៍ឆ្នាំ ១៩៧០។
ការធ្លាក់ដោយសារក្រុម Villarreal ក្នុងវគ្គ ៨ ក្រុមចុងក្រោយនៅ Champions League កាលពី ២ សប្តាហ៍មុន នៅតែតាមលងបន្លាចក្រុម Bayern ដោយគ្រាប់បាល់របស់កីឡាករបម្រុង Samuel Chukwueze នៅចុងម៉ោង បាននាំឱ្យមានលទ្ធផលស្មើគ្នា ១-១ ពីការប្រកួតក្នុងកីឡដ្ឋាន Allianz Arena ដែលធ្វើឱ្យសរុបគ្រាប់បាល់ទាំង ២ ជើង ក្រុមយក្សអាល្លឺម៉ង់ ចាញ់ ២-១។
គ្រូបង្វឹកលោក Julian Nagelsmann គឺជាអ្នកដំបូងគេ ដែលបានធ្វើការអះអាងថា ក្រុមមិនទាន់បង្ហាញឱ្យបានគ្រប់គ្រាន់ ចំពោះការរំពឹងទុក ក្នុងរដូវកាលដំបូងរបស់គាត់នេះ។ លោកបានលើកឡើងថា មិនទាន់ល្អគ្រប់គ្រាន់នោះទេ ដែលនេះជាការវាយតម្លៃរដូវកាលទាំងមូលភ្លាមៗ បន្ទាប់ពីហ្គេមជើងទី២ ទល់នឹងក្រុម Villarreal។
ក្រុម Bayern បានចាញ់ Borussia Moenchengladbach យ៉ាងអាម៉ាស់ ៥-០ ពីការប្រកួត ក្នុងកម្មវិធី German Cup នៅជុំទី២ កាលពីខែតុលា ហើយនៅសប្តាហ៍នេះ លោក Nagelsmann បាននិយាយថា ហេតុការណ៍នៃ ២ សប្តាហ៍ចុងក្រោយនេះ កំពុងធ្វើឱ្យអារម្មណ៍របស់ក្រុមអាប់អួ និងកាត់បន្ថយភាពរីករាយ នៃការឈ្នះពានរង្វាន់ធំដំបូងរបស់គាត់៕ AFP/VN