ក្រុងសេវីល: ក្រុម Real Betis បានកា្លយជាម្ចាស់ពានរង្វាន់នៃកម្មវិធី Copa del Rey របស់អេស្ប៉ាញ កាលពីថ្ងៃសៅរ៍ ដោយការយកឈ្នះលើក្រុម Valencia ក្នុងលទ្ធផល ៥-៤ ពីការទាត់បាល់ប៉េណាល់ទីកាត់ក្ដី បន្ទាប់ពីការប្រកួតដ៏គួរឱ្យរំជើបរំជួល ក្នុងវគ្គផ្ដាច់ព្រ័ត្រ នាក្រុងសេវីល (Seville) ទាំងក្នុងម៉ោងធម្មតា និងម៉ោងបន្ថែមពិសេស ១៥ នាទី ២ ដង បញ្ចប់ទៅដោយលទ្ធផល ១-១។
កីឡាករ Yunus Musah របស់ក្រុម Valencia បានស៊ុតបាល់ហោះរំលងរបារទី ក្នុងវគ្គកាត់ក្ដីនេះ ដែលធ្វើឱ្យកីឡាករ Juan Miranda មានឱកាសស៊ុតបាល់ជ័យជម្នះ ក្នុងវគ្គប៉េណាល់ទី នៅកីឡដ្ឋាន La Cartuja ខណៈក្រុម Betis បានឈ្នះពានធំទី៤ ក្នុងប្រវត្តិសាស្ត្ររយៈពេល ១១៥ ឆ្នាំរបស់ក្លិប។
ខ្សែប្រយុទ្ធ Borja Iglesias បានតែតបញ្ចូលទីឱ្យក្រុម Betis នាំមុខ តែខ្សែប្រយុទ្ធ Hugo Duro បានទម្លុះសំណាញ់ទីឱ្យក្រុម Valencia តាមស្មើវិញ មុនចប់វគ្គទី១ ហើយក្រុមទាំង ២ មិនអាចរកឱ្យឃើញគ្រាប់ជ័យជម្នះបានឡើយ មិនថានៅវគ្គទី២ ឬក៏ម៉ោងបន្ថែមពិសេស។
តែការទាត់ប្លាតពីកីឡាករ Musah និងការបញ្ចប់ទីដោយចិត្តត្រជាក់ៗរបស់កីឡាករ Miranda បានធ្វើឱ្យពានរង្វាន់ធ្លាក់ក្នុងដៃរបស់ក្រុម Betis ដែលជាការឈ្នះលើកទី៣ នៅក្នុងទឹកដីរបស់ខ្លួន បន្ទាប់ពីបានលើកពាន ២ ដង ក្នុងឆ្នាំ ១៩៧៧ និងឆ្នាំ ២០០៥។
កីឡាករ Joaquin ដែលជាប្រធានក្រុម Betis បានលើកពានរង្វាន់នេះ បន្ទាប់ពីត្រូវបានប្រគល់ឱ្យដោយព្រះមហាក្សត្រនៃប្រទេសអេស្ប៉ាញ គឺព្រះអង្គម្ចាស់ Felipe VI ហើយខ្សែបម្រើស្លាបវ័យ ៤០ ឆ្នាំរូបនេះ បាននិយាយដោយរំជួលចិត្តថា៖ «ខ្ញុំមានអារម្មណ៍រំជួលចិត្តរហូតដល់ស្រក់ទឹកភ្នែក។ វាគឺជាអ្វី ដែលយើងទាំងអស់គ្នាចង់បាន ពោលគឺចង់ឈ្នះពាននេះម្ដងទៀត ពានរង្វាន់ Copa del Rey ដែលមានភាពស្រស់ស្អាត ដូចដែលយើងទាំងអស់គ្នាបានដឹងរួចហើយ»។
Joaquin ដែលចូលលេងលើកដំបូង ឱ្យក្រុម Betis ក្នុងវ័យ ១៩ ឆ្នាំ និងបានលេងក្នុងវគ្គនេះ កាលពី ១៧ ឆ្នាំមុននោះ ដើរចូលក្នុងទីលាន នៅនាទីទី៨៦ និងស៊ុតបាល់ប៉េណាល់ទី។ វានៅតែត្រូវមើលថា តើរូបគេសម្រេចថា នេះគឺជាការបញ្ចប់ដ៏សមរម្យហើយ ពេលនេះចំពោះអ្វី ដែលជាអាជីពដ៏ពិសេសអស្ចារ្យនេះ។
«ខ្ញុំនឹងរីករាយជាមួយពេលវេលានេះ។ យើងគឺជាជើងឯក Copa del Rey ហើយយើងសូមប្រគល់ពាននេះឱ្យដល់មនុស្ស ដែលតែងនៅជាមួយពួកយើងរហូតមក ដូចជាបុគ្គលិក គ្រូបង្វឹក អ្នកម៉ាស្សា ចុងភៅ អ្នករត់តុដោយការងាររបស់អ្នកទាំងអស់នោះ មិនត្រូវបានមើលឃើញឡើយ តែសមនឹងទទួលបានការសរសើរយ៉ាងច្រើន ដូចពួកយើងអ៊ីចឹង»។ នេះជាការបន្ថែមរបស់កីឡាករ Joaquin។
វាទើបតែជាវគ្គផ្ដាច់ព្រ័ត្រលើកទី២ ប៉ុណ្ណោះ រយៈពេល ១៤ ឆ្នាំ ដែលគ្មានក្រុមណាមួយ ដូចជា Real Madrid, Barcelona ឬក៏ Atletico Madrid ហើយខណៈ Betis និង Valencia គឺស្ទើរតែក្រុមតូច នៅអេស្ប៉ាញនោះ គ្មានអ្វីត្រូវឆ្ងល់ទេថា ឱកាសរបស់ក្លិបទាំង ២ មានកម្រិតណា៕ AFP/VN