ក្រុងឡុងដ៍: ក្រុមមេឃខៀវ Manchester City និងហង្សក្រហម Liverpool មើលទៅទំនងជាធ្លាក់ចូលទៅក្នុងការប្រកួតប្រជែងដ៏តានតឹង ដើម្បីបានកា្លយជាជើងឯក បន្ទាប់ពីមានជ័យជម្នះរៀងៗខ្លួន កាលពីចុងសប្ដាហ៍កន្លងមក។
ជាមួយគ្នានេះ ក្រុមកាំភ្លើងធំ Arsenal បានបង្កើនក្ដីសង្ឃឹមរបស់ខ្លួន សម្រាប់ការរង់ចាំដ៏យូរ ក្នុងការបានវិលទៅលេង នៅក្របខ័ណ្ឌ Champions League វិញ ខណៈក្រុម Burnley កំពុងមានក្ដីសុបិន ក្នុងការបានរួចខ្លួនពីការធ្លាក់ដ៏សែនអស្ចារ្យ។
AFP ផ្នែកកីឡា មើលឃើញរឿងរ៉ាវ ៣ ចំណុច ពីការប្រកួត នៅក្របខ័ណ្ឌ Premier League កាលពីចុងសប្ដាហ៍កន្លងទៅនេះ។
-Man City រះឡើងយ៉ាងត្រចះ-ត្រចង់ ខណៈដែល Liverpool បង្ហាញភាពក្លាហាន
ខណៈពេលដែលក្រុមកំពុងមានពិន្ទុនាំមុខ Manchester City បានបង្ហាញនូវទេពកោសល្យប្រយុទ្ធរបស់ពួកគេ ដោយការបំបាក់ក្រុម Watford ឥតប្រណី ៥-១ នោះ ក្រុម Liverpool ឯណោះវិញ ត្រូវប្រើអស់កម្លាំងកាយចិត្ត ក្នុងរយៈពេល ២៤ ម៉ោងក្រោយមក ដើម្បីបញ្ចប់ជំនួប «Merseyside Derby» (ការប៉ះគ្នារវាងក្រុម នៅក្រុងតែ ១) ជាមួយនឹងជ័យជម្នះ ២-០ លើក្រុម Everton។
ក្រុម Man City របស់លោក Pep Guardiola បានបង្កើតបញ្ហាប្រឈមឱ្យក្រុម Liverpool ជាមួយនឹងជោគជ័យកាលពីថ្ងៃសៅរ៍ ដោយនាំមុខដាច់បណ្ដោះអាសន្ន ៤ ពិន្ទុ នៅទីកំពូលតារាង ហើយសម្រាប់ ៦២ នាទី នៃការប្រកួត នៅឯកីឡដ្ឋាន Anfield កាលពីថ្ងៃអាទិត្យ វាទំនងហាក់ដូចជាក្រុម Everton អាចនឹងជួយផ្ដល់ភាពចំណេញយ៉ាងធំឱ្យក្រុមមេឃខៀវ ខណៈដែលពួកគេធ្វើឱ្យក្រុមម្ចាស់ផ្ទះហង្សក្រហម ចាប់ផ្ដើមមិនស្រួលក្នុងចិត្ត ដោយសារមិនអាចបំបែក រនាំងការពារបាន។
តែក្រុមរបស់លោក Jurgen Klopp ចុងក្រោយ ក៏បានទម្លុះទម្រង់ការពារដ៏រឹងរបស់ក្រុមភ្ញៀវសម្រេច ដោយសារខ្សែការពារ Andrew Robertson មានឱកាសតែតបញ្ចូលទី ពេលខ្សែប្រយុទ្ធ Mohamed Salah លើកបាល់កាត់ចូលមកតំបន់គ្រោះថ្នាក់ ហើយនៅប្រមាណជា ៥ នាទី ដែលហ្គេមត្រូវចប់ កីឡាករបម្រុង Divock Origi បំប៉ោងសំណាញ់ទីគ្រាប់ទី៦ របស់ខ្លួន ទល់នឹងក្រុម Everton ដើម្បីជួយឱ្យក្រុម Liverpool ឈ្នះ ១២ លើក ក្នុងចំណោម ១៣ ហ្គេមចុងក្រោយ នៅលីគរបស់ខ្លួន។
ជាមួយនឹងការនៅសល់ ៥ ហ្គេម ក្រុម Man City នាំមុខ ១ ពិន្ទុ លើក្រុមលេខ ២ Liverpool។ មនុស្សតិចតួចណាស់នឹងមានការជំទាស់ថា ក្រុមទាំង ២ នេះ គឺជាក្រុមកំពូលជាងគេលើលោក នាពេលនេះ ដូច្នេះវាជារឿងសមហេតុផលណាស់ ដែលពួកគេកំពុងបង្កើតឱ្យមាននូវការប្រកួតប្រជែងដ៏តឹងចង្អៀតមួយ ក្នុងរយៈកាលជាច្រើនឆ្នាំមកនេះ។
-Arsenal ដើរលើផ្លូវ Top4 ដោយទំនុកចិត្ត
ក្រុម Arsenal បានបោះជំហានដ៏ធំឆ្ពោះទៅរកការបានបង្ហាញខ្លួនជាលើកដំបូងនៅក្របខ័ណ្ឌ Champions League គិតចាប់តាំងពីឆ្នាំ ២០១៦-២០១៧ ខណៈក្រុមរបស់លោក Mikel Arteta បានពឹងលើសំណាងរបស់ខ្លួន ដើម្បីយកឈ្នះក្រុមបិសាចក្រហម Manchester United ៣-១។
បន្ទាប់ពីមានដំណើរផ្លូវដ៏ឈឺចាប់ ដោយការចាញ់ ៣ ដងបន្តបន្ទាប់គ្នា Arsenal បានឡើងត្រឡប់ទៅកាន់ចំណាត់ថ្នាក់លេខ ៤ វិញ ជាមួយនឹងជ័យជម្នះ ៤-២ លើក្រុម Chelsea និងការដណ្ដើមបាន ៣ ពិន្ទុ ពីក្រុម Man United ដែលកំពុងប្រជែងចំណាត់ថ្នាក់ ១ ក្នុងចំណោមក្រុម នៅទីកំពូលទាំង ៤ (Top4) ជាមួយគ្នា។
ក្រុម Arsenal កំពុងនាំមុខ ២ ពិន្ទុ លើក្រុមគូប្រជែងរួមក្រុងឡុងដ៍ Tottenham Hotspur ដែលបានធ្លាក់មកនៅលេខ ៥ វិញ បន្ទាប់ពីប្រកួតស្មើដោយគ្មានគ្រាប់បាល់ជាមួយក្រុមម្ចាស់ផ្ទះ Brentford។
«យើងបានចាញ់ ៣ ដងបន្តបន្ទាប់គ្នា ដែលធ្វើឱ្យមនុស្សជាច្រើន បានចាប់ផ្ដើមនិយាយពីយើងម្ដងទៀត។ តែសប្ដាហ៍នេះ បានជួយពួកយើងច្រើនណាស់ ការបាន ៦ ពិន្ទុ ពីការប្រកួតទល់នឹងក្រុម Chelsea និង Man United បានផ្ដល់នូវទំនុកចិត្ត និងថាមពលយ៉ាងច្រើន សម្រាប់ហ្គេមបន្ទាប់»។ នេះជាសម្ដីរបស់កីឡាករ Granit Xhaka ដែលបាញ់ ១ ជើង (ស៊ុតយ៉ាងពេញកម្លាំង) ពីចម្ងាយយ៉ាងស្អាត ដើម្បីបំផ្លាញក្ដីសង្ឃឹមរបស់ក្រុមបិសាចក្រហម ក្នុងការប្រជែងតំណែង Top4។
-Burnley រំកិលឡើងផុតពីតំបន់ ដែលត្រូវធ្លាក់ពីលីគកំពូល
ក្រុម Burnley បានរំកិលឡើងផុតពីតំបន់ ដែលត្រូវកាត់ចោលជាមួយនឹងជ័យជម្នះ ១-០ លើក្រុម Wolverhampton (Wolves) ដែលនាំឱ្យគ្រូបង្វឹកបណ្ដោះអាសន្នលោក Mike Jackson និយាយបែបលេងសើចថា គាត់នឹងធ្វើពិធីអបអរ ដោយផឹកស្រាបៀរ ១ យប់ពេញ។
នៅពេលដែលលោក Jackson ចូលមកជំនួសតំណែងលោក Sean Dyche ក្រុម Burnley មើលទៅទំនងជាគ្មានសង្ឃឹមរួចផុតពីការត្រូវធ្លាក់លីគទីកម្រិតទី២ នោះឡើយ តែការប្រឹងប្រែងរហូតដល់ស្មើជាមួយនឹងក្រុម West Ham ១-១ ហើយបន្ទាប់មក ជ័យជម្នះ ២-០ លើក្រុម Southampton និងមុនពេលគ្រាប់បាល់នៅវគ្គទី២ របស់កីឡាករ Matej Vydra ជួយឱ្យឈ្នះក្រុម Wolves បាននាំឱ្យពួកគេ នាំមុខ ២ ពិន្ទុ លើក្រុមបាតតារាងទី៣ Everton ដែលនៅសល់ ១ ហ្គេមក្នុងដៃ។
លោក Jackson បានពោលថា៖ «វាជាលទ្ធផលដ៏អស្ចារ្យ ដែលពិតជាការមាននូវទម្រង់លេងដ៏រឹងមាំម្ដងទៀត។ វាជាហ្គេមទី៣ ក្នុង ១ សប្ដាហ៍ ដូច្នេះ យើងត្រូវតែប្រែងទាំងកម្លាំងកាយ និងចិត្ត។ វាគឺការជំរុញដ៏ធំ សម្រាប់ក្រុម»៕ AFP/VN