.jpg)
Capoue (ឆ្វេង) របស់ Villarreal ព្យាយាមជួយរារាំងការស៊ុតពី Jamal Musiala របស់ Bayern កាលពីវគ្គ ៨ ក្រុម។ AFP
ក្រុងវីឡារៀល: «ខ្ញុំនិយាយថា តើក្រុម Villarreal នៅឯណា?»។ នេះជាការពន្យល់របស់កីឡាករ Etienne Capoue ដែលពណ៌នាថា វាដូចជារូបគេកំពុងធ្វើការត្រួតពិនិត្យចំពោះផែនទីពិភពលោក ហើយចង្អុលម្រាមដៃចុះក្រោម។
«ខ្ញុំត្រូវបានប្រាប់ថា មានការងារហើយ ក្បែរៗក្រុង Valencia ពោលគឺគ្រាន់តែប៉ុណ្ណឹង។ អ៊ីចឹង ខ្ញុំក៏និយាយថា ល្អ តោះទៅ»។ នេះជាសម្ដីរបស់កីឡាករ Capoue ដែលការលេង ២ ហ្គេមចុងក្រោយរបស់គេ សម្រាប់ក្រុមចាស់ Watford គឺនៅឯលីគកម្រិតទី២ របស់ប្រទេសអង់គ្លេស ទល់នឹងក្រុម Norwich និង Huddersfield។
រូបគេបានចាកចេញនៅខែមករា ឆ្នាំ ២០២១ ហើយការប្រកួត ២ លើកចុងក្រោយរបស់គេ ក្នុងរដូវកាលនោះ សម្រាប់ក្រុមថ្មី Villarreal គឺការជួបជាមួយក្រុមយក្ស Real Madrid និងក្រុមបិសាចក្រហម Manchester United។ ក្រុម Villarreal បានយកឈ្នះក្រុម Man United ដោយការស៊ុតបាល់ប៉េណាល់ទីកាត់ក្ដី ដើម្បីកា្លយជាជើងឯកនៃក្របខ័ណ្ឌ Europa League នាពេលនោះ ហើយ Capoue ត្រូវបានជ្រើសរើសជាកីឡាករល្អជាងគេប្រចាំការប្រកួត។
នៅថ្ងៃពុធនេះ ក្រុម Villarreal ដែលជាក្លិបរបស់ Capoue អត់ដឹងអ្វីទាំងអស់ ត្រូវជួបជាមួយក្រុមហង្សក្រហម Liverpool សម្រាប់ការប្រកួតជើងទី១ ក្នុងវគ្គពាក់កណ្តាលផ្តាច់ព្រ័ត្រ នៅ Champions League។ ក្រុមនៅទីក្រុងតូចមួយ ដែលមានសភាពស្ងាត់ជ្រងំ នៅឯឆ្នេរសមុទ្រភាគខាងកើតរបស់ប្រទេសអេស្ប៉ាញ ឥឡូវនេះ មិនស្ថិតក្នុងចំណោមក្រុម ដែលត្រូវបានឡើងគ្រងបល្ល័ង្ករបស់អឺរ៉ុបទេ។
«ការឈ្នះជើងឯក នៅ Champions League ឬ? យើងមិនមានភាពគឃ្លើន ក្នុងការនិយាយថា យើងអាចនឹងឈ្នះពាន នៅ Champions League នោះឡើយ។ យើងជាក្លិបតូចតាចជាងគេបំផុត ក្នុងវគ្គពាក់កណ្ដាលផ្ដាច់ព្រ័ត្រនេះ។ យើងជាក្លិបតូចតាចជាងគេបំផុត ក្នុងវគ្គ ៨ ក្រុមចុងក្រោយកន្លងមក។ យើងគ្រាន់តែធ្វើដំណើរដោយរីករាយលើផ្លូវរបស់យើង ព្រោះយើងគ្មានអ្វីត្រូវចាញ់នោះឡើយ»។ ខ្សែបម្រើសញ្ជាតិបារាំង Capoue បាននិយាយប្រាប់មក AFP អមជាមួយនឹងសំណើច។
ក្រុម Villarreal បានទម្លាក់ក្រុមយក្សអ៊ីតាលី Juventus ក្នុងវគ្គ ១៦ ក្រុមចុងក្រោយ និងក្រុមយក្សអាល្លឺម៉ង់ Bayern Munich ក្នុងវគ្គ ១/៤ ផ្ដាច់ព្រ័ត្រ ដែលការឈ្នះជើងឯករបស់ក្លិបទាំង ២ នៅអឺរ៉ុបនេះ រួមបញ្ចូលគ្នាមានចំនួន ៨ ដង ពោលគឺ ២ ដងស្មើនឹងជ័យជម្នះរបស់ក្រុម Villarreal ក្នុងវគ្គចាញ់ធ្លាក់។
តែការជួបជាមួយក្រុម Liverpool នឹងកា្លយជាបោះជំហានទៅប្រឈមជាមួយឧបសគ្គដ៏ធំបំផុតថ្មីមួយទៀត ខណៈដែលក្រុមយក្សអង់គ្លេស ក្រោមការដឹកនាំលោក Jurgen Klopp កំពុងស្ថិតលើផ្លូវឆ្ពោះទៅរកការឈ្នះជើងឯកជាប្រវត្តិសាស្ត្រចំនួន ៤ ក្នុង ១ រដូវកាល។
ហើយជាពិសេស ក្នុងកីឡដ្ឋាន Anfield ដែលជាការប្រឈម ១ ក្នុងចំណោមការប្រឈមដ៏គួរឱ្យខ្លាចរអាបំផុត ក្នុងការប្រកួត ក្នុងវិស័បាល់ទាត់នោះ គឺជាអ្វីដែលខ្សែបម្រើការពារ Capoue ហួសពីដឹងពេកណាស់ហើយ។ រូបគេធ្លាប់លេងនៅទីនោះ ៤ ដង ដែលរាល់លើក ក្រុម Watford របស់គេចាញ់រហូតជាមួយនឹងគ្រាប់សរុប ១៨-១។
«កីឡដ្ឋាន Anfield គឺជាឋាននរក (កន្លែងគួរឱ្យខ្លាច) ដោយអ្នកត្រូវតែនិយាយថា តើទីនោះមានសភាពយ៉ាងម៉េច។ វាគឺឋាននរក។ វាជាកីឡដ្ឋានដ៏អាក្រក់ (គួរឱ្យខ្លាច) បំផុត ដែលខ្ញុំធ្លាប់បានជួបនៅអង់គ្លេស។ មិនថា វាជាបរិយាកាស ឬក៏វិធីសាស្ត្រ ដែលពួកគេលេងនោះទេ ពោលគឺសម្រាប់រយៈពេល ៩០ នាទី អ្នករស់នៅក្នុងឋាននរក»។ នេះជាការបរិយាយរបស់កីឡាករ Capoue។
កីឡាករសញ្ជាតិបារាំង Capoue បន្ថែមទៀតថា៖ «ពួកគេមានសមត្ថភាពក្នុងការធ្វើឱ្យមានជោគជ័យហួសពីការស្មាន ដោយបង្កបញ្ហាដល់អ្នកគ្រប់ពេល និងគ្រប់ផ្នែកនៃទីលាន។ ពួកគេមិនបញ្ឈប់ ពួកគេធ្វើឱ្យអ្នកនៅមិនស្ងៀមគ្រប់ពេលវេលា ពួកគេគ្រាន់តែចង់ស៊ុតបញ្ចូលទីឱ្យបានច្រើនគ្រាប់ ហើយសូម្បីតែនៅពេលពួកគេមានគ្រាប់បាល់ហើយ ក៏ពួកគេនៅតែបន្តទៀតដែរ។ ពួកគេចង់ផ្ដួលឱ្យអ្នកតដៃមិនរួច»៕ AFP/VN
