.jpg)
កីឡាករ Dillian Whyte (ឆ្វេង) ក្នុងអំឡុងពេលប្រកួតជាមួយកីឡាការ Tyson Fury កាលពីពេលថ្មីៗនេះ។ រូបថត AFP
ក្រុងឡុងដ៍: កីឡាករ Dillian Whyte បានចោទប្រកាន់មិត្តរួមជាតិអង់គ្លេស Tyson Fury ពីការមានកលល្បិចដ៏អាក្រក់ អំឡុងពេលដណ្ដើមបានជ័យជម្នះ ពីការប្រកួតដាក់ខ្សែក្រវាត់ទម្ងន់ធ្ងន់របស់ស្ថាប័នក្រុមប្រឹក្សាប្រដាល់ពិភពលោក (WBC) នៅឯពហុកីឡដ្ឋាន Wembley កាលពីថ្ងៃសៅរ៍។
កីឡាករ Fury ការពារខ្សែ-ក្រវាត់ពិភពលោករបស់ខ្លួនបានសម្រេច ដោយការវាយឱ្យគូបដិបក្ខ Whyte ត្រូវបញ្ឈប់ ក្នុងទឹកទី៦ ជាមួយនឹងការម៉ាត់សើយដ៏គ្រោះថ្នាក់ពីដៃស្ដាំរបស់ខ្លួន។ តែយ៉ាងណាក្ដី អ្នកឡើងដណ្ដើមខ្សែក្រវាត់អត់សម្រេច Whyte យល់ថា អាជ្ញាកណ្ដាល គួរតែពិន័យ Fury ចំពោះការរុញរូបគេ មុនពេលរូបគេ ដួលបោកក្បាលទៅលើកម្រាល។
«ខ្ញុំមានអារម្មណ៍ច្របូកច្របល់ តែជាក់ស្តែង ខ្ញុំកំពុងព្យាយាមប្រមូលសតិស្មារតីរបស់ខ្ញុំឡើងវិញ ហើយគាត់បានរុញខ្ញុំ ហើយខ្ញុំក៏ដួល ហើយក្បាលរបស់ខ្ញុំបានបោកនឹងកម្រាល ដែលជាការខុសច្បាប់។ នេះមិនមែនជាកីឡាបោកចំបាប់ទេ វាជាកីឡាប្រដាល់។ ខ្ញុំគួរតែទទួលបានពេលវេលាបន្ថែម ដើម្បីសម្រួលសតិស្មារតីឡើងវិញ ហើយបន្ទាប់មក បន្តការប្រកួត»។ នេះជាការលើកឡើងរបស់ Whyte ពេលនិយាយទៅកាន់ទូរទស្សន៍ Sky Sports កាលពីថ្ងៃចន្ទ។
Whyte បានបន្តថា៖ «ខ្ញុំចាប់បាន (តាមទាន់) ពោលគឺគ្មានអ្វីត្រូវសង្ស័យឡើយ។ ខ្ញុំចាប់បានដោយសាររូបភាពដ៏ច្បាស់ល្អ។ ខ្ញុំមានរបួស ខ្ញុំបានព្យាយាមប្រមូលសតិស្មារតីឡើងវិញ ហើយគាត់ (Fury) មានកម្លាំងពេញ ដោយប្រើដៃ ២ រុញខ្ញុំ។ វាមិនដូចជាដៃម្ខាងនោះឡើយ។ ខ្ញុំគួរមានពេល ដើម្បីបានពង្រឹងស្មារតីឡើងវិញ ដោយដល់ពេលត្រូវឱ្យទឹកហើយ តែ Fury បានរួចខ្លួន ដោយសារចំណុចជាច្រើន»។
Whyte បានអះអាងថា Fury ទង្គិចក្បាលរបស់គេ បន្ទាប់មករូបគេរងរបួសរយះត្របកភ្នែកស្តាំ ជាលើកដំបូងដែលអ្នកប្រដាល់វ័យ ៣៤ ឆ្នាំ រងរបួសបែបនេះ ក្នុងចំណោមការឡើងសង្វៀនប្រកួតអាជីពចំនួន ៣១ លើក។
«គាត់បានបន្តឱនចុះទៅចំហៀង ហើយដាក់ក្បាលចូល ហើយក៏ធ្វើបែបនោះ។ គាត់ផ្អៀងខ្លួនមក ហើយគាត់ផ្អឹបក្បាល។ គាត់ទង្គិចជាមួយខ្ញុំ ហើយខ្ញុំមានការបែករយះ ហើយប្រាកដណាស់ លោកអាជ្ញាកណ្ដាល បានប្រាប់ខ្ញុំឱ្យបញ្ឈប់»។ Whyte បានបញ្ជាក់បន្ថែម៕ AFP/VN
