ក្រុងប៉ារីស: អតីតអត្តពលិកវាយកូនបាល់លំដាប់លេខ ១ ពិភពលោកផ្នែកបុរស Roger Federer ដែលត្រូវញាំញីដោយបញ្ហារបួសជង្គង់ម្ដងហើយម្ដងទៀត ក្នុងរយៈពេល ២ឆ្នាំចុងក្រោយនេះ នឹងចូលរួមលេងការប្រកួតឯកត្តជនក្នុងកម្មវិធី ATP Basel ដែលធ្វើក្នុងសាល នាខែតុលានេះ។ គណៈកម្មការរៀបចំ ការប្រកួតបានបង្ហើបឱ្យដឹងដូច្នេះ។
Federer ដែលមិនបានលេងលក្ខណៈប្រកួតប្រជែងសោះ ចាប់តាំងពីការរងបរាជ័យ នៅខែកក្កដា ក្នុងវគ្គ ៨ នាក់ចុងក្រោយ ក្នុងកម្មវិធី Wimbledon ក្រោមថ្វីដៃរបស់កីឡាករ Pole Hubert Hurkacz បានឆ្លើយតបនឹងការប្រកាសលើបណ្ដាញសង្គម Instagram របស់អ្នករៀបចំដោយសរសេរសារថា៖ «ទន្ទឹងរង់ចាំការវិលមកលេង ក្នុងការប្រកួតនៅផ្ទះ (ក្នុងប្រទេសកំណើត) វិញ»។
កម្មវិធីប្រកួត ដែលដូចគ្នានឹងម្ចាស់ជើងឯក ១០ ដងនេះដែរ នឹងត្រឡប់មកមានសកម្មភាពឡើងវិញ បន្ទាប់ពីត្រូវបង្ខំផ្អាករយៈពេល ២ ឆ្នាំ ដោយសារការរាតត្បាតនៃជំងឺកូវីដ ១៩។
«បន្ទាប់ពីផ្អាក ២ ឆ្នាំ ដោយសារជំងឺរាតត្បាត ការប្រកួតវាយកូនបាល់ក្នុងសាល Swiss Indoors Basel នឹងត្រឡប់មកជាចំណែកនៃកម្មវិធីរបស់ ATP Tour វិញ ក្នុងរដូវស្លឹកឈើជ្រុះ នៃឆ្នាំ២០២២។ ម្ចាស់ជើងឯកឯកត្តជន ១០ សម័យកាល និងវីរបុរសរបស់ស្វ៊ីស កីឡាករ Roger Federer បានប្រកាសវិលមកកាន់ទីលានក្នុងកីឡដ្ឋាន St. Jakobshalle។ ការចាប់អារម្មណ៍ពេញពិភពលោករំពឹងថា នឹងខ្លាំងកា្លមិនខាន»។ នេះជាការប្រកាសពីគណៈកម្មការរៀបចំការប្រកួតនេះ។
ជាមួយគ្នានេះ Federer ដែលត្រូវមានវ័យ ៤១ ឆ្នាំ ក្នុងខែសីហា ក៏គ្រោងលេង ក្នុងព្រឹត្តិការណ៍ប្រកួតជាក្រុមកម្មវិធី Laver Cup ដែលមានរយៈពេល ៣ ថ្ងៃ ជាមួយនឹងគូប្រជែងដ៏យូរអង្វែង Rafael Nadal នៅទីក្រុងឡុងដ៍ ក្នុងខែកញ្ញាផងដែរ ដោយកីឡាករឆ្នើមទាំង ២ រូប បានលេងជាដៃគូជាមួយគ្នា កាលពីព្រឹត្តិការណ៍នេះ កកើតដំបូងក្នុងឆ្នាំ ២០១៧។
Federer បានដកខ្លួនចេញពីព្រឹត្តិការណ៍កីឡាអូឡាំពិកឆ្នាំមុន និងវះកាត់ជង្គង់ជាលើកទី៣ ក្នុងរយៈពេល ១៨ ខែ ហើយរូបគេលេងបានតែ ១៣ ប្រកួតប៉ុណ្ណោះ ក្នុងឆ្នាំ ២០២១ ហើយឆ្នាំ ២០២០ បាន ៦ ដង។
Federer ឈ្នះពាន Grand Slam ២០ ដង ដោយស្មើជាមួយ Novak Djokovic និងតាមពីក្រោយ Nadal ដែលលើស ១ លើក ក្រោយឈ្នះកម្មវិធីទី១ ប្រចាំរដូវកាល Australian Open៕ AFP/VN