ក្រុងមីឡាន: ក្រុម Inter Milan មិនអាចដណ្តើមចំណាត់ថ្នាក់កំពូលតារាងនៃក្របខ័ណ្ឌ Serie A បាននោះឡើយ កាលពីថ្ងៃពុធ បន្ទាប់ពីកំហុសដ៏ធំមិនគួរកើតមានរបស់អ្នកចាំទីបម្រុង Ionut Radu បានធ្វើឱ្យក្រុមរបស់គេ រងបរាជ័យ ២-១ នៅទឹកដីរបស់ក្រុម Bologna។
ដោយក្រុមទាំង ២ ជាប់គាំងក្នុងលទ្ធផលស្មើគ្នា នៅនាទីទី៨១ អ្នកចាំទី Radu មិនដឹងយ៉ាងម៉េច បានកៀសបាល់ប្លាតតម្រង់ទៅរកទីខ្លួនឯង នៅពេលព្យាយាមទាត់ផ្ដាច់ចេញពីតំបន់គ្រោះថ្នាក់ ខណៈដែលកីឡាករ Nicola Sansone រត់ទៅទាត់បន្ថែមតែបន្តិចបញ្ចូលទី ដែលជាគ្រាប់បាល់ជួយផ្ដល់ផលចំណេញដល់ក្រុម AC Milan ក្នុងការប្រកួតប្រជែងជើងឯក។
កីឡាករសញ្ជាតិរូ៉ម៉ានីរូបនេះ បានចាកចេញពីទីលាន អមដោយការខកចិត្ត បន្ទាប់ពីការប្រកួតនៅលីគលើកដំបូងនៃរដូវកាលរបស់រូបគេ បានបញ្ចប់ដោយភាពអាម៉ាស់ ដោយសារកំហុស ដែលអាចប៉ះពាល់ដល់យុទ្ធនាការការពារតំណែងជើងឯកពាន Scudetto (Serie A) របស់ក្រុម Inter យ៉ាងធ្ងន់ធ្ងរ។
តែគ្រូបង្វឹករបស់ក្រុម Inter លោក Simone Inzaghi នៅតែនិយាយការពារកំហុសរបស់អ្នកចាំទីរូបនេះថា៖ «វាជាកំហុស ដោយសារសំណាងមិនល្អ តែរឿងបែបនេះ ត្រូវតែកើតមានឡើង។ Radu គឺជាអ្នកចាំទីដ៏ល្អម្នាក់ ដោយអនាគតភ្លឺស្វាង កំពុងរង់ចាំរូបគេ»។
ក្រុម Inter ដែលបាននាំមុខ តាំងពីនាទីទី៣ ដោយការស៊ុតយ៉ាងពេញកម្លាំងពីខ្សែប្រយុទ្ធ Ivan Perisic កំពុងមានគម្លាត ២ ពិន្ទុ តាមពីក្រោយក្រុមកំពូលតារាង Milan ជាមួយនឹងការនៅសល់ ៤ ហ្គេមទៀត។
បរាជ័យសម្រាប់ក្រុមរបស់លោក Inzaghi កាលពីរាត្រីថ្ងៃពុធនេះ អាចនឹងក្លាយជាចំណុចសំខាន់ដល់ការប្រជែងពាន Scudetto ខណៈដែលការប្រកួតនេះ គឺជាការសល់ ១ ហ្គេម ក្នុងដៃរបស់ក្រុម Inter ដែលមិនបានលេងក្នុងខែមករា ក្រោយមានការផ្ទុះឡើងជាគំហុកនូវការឆ្លងវីរុសកូរ៉ូណា នៅ Serie A និងប្រទេសអ៊ីតាលី ទាំងមូល៕ AFP/VN