ក្រុងលីវើរភូល: លោក Jurgen Klopp បានព្រមានថា ក្រុមហង្សក្រហម Liverpool របស់លោកត្រូវតែប្រុងប្រយ័ត្ន ទោះបីជាកំពុងដាក់ជើងម្ខាងចូលទៅក្នុងវគ្គផ្តាច់ព្រ័ត្រ នៃក្របខ័ណ្ឌ Champions League ជាមួយនឹងជ័យជម្នះ ២-០ លើក្រុម Villarreal ពីការប្រកួតជើងទី១ ក្នុងវគ្គពាក់កណ្តាលផ្តាច់ព្រ័ត្ររបស់ពួកគេនៅកីឡដ្ឋាន Anfield កាលពីថ្ងៃពុធក៏ដោយ។
គ្រាប់បាល់ ២ គ្រាប់ ក្នុងរយៈពេល ២ នាទី បានបំផ្លាញគម្រោងផែនការ នៃការលេងការពាររបស់គ្រូបង្វឹកក្រុម Villarreal លោក Unai Emery ខណៈដែលខ្សែការពារ Pervis Estupinan បានយកជើងរារាំងបាល់ ពីការបញ្ជូនកាត់ចូលក្នុងតំបន់គ្រោះថ្នាក់របស់កីឡាករ Jordan Henderson ហើយបាល់ប្លាតចូលទីខ្លួនឯង នៅមុនពេលខ្សែប្រយុទ្ធ Sadio Mane បន្ថែមគ្រាប់ទី២ នៅប្រមាណជា ១ នាទីក្រោយពីនោះមក។
ក្រុមហង្សក្រហមនៅតែស្ថិតលើផ្លូវនៃការឈ្នះពានរង្វាន់ ៤ ជាកំណត់ត្រាប្រវត្តិសាស្ត្រ ដូចជាពានរង្វាន់របស់ក្របខ័ណ្ឌ Champions League, Premier League, FA Cup និង League Cup។
ហើយប្រសិនបើមិនមានជួបនូវការខកចិត្តដ៏ធំ នៅពេលដែលក្រុមទាំង ២ ជួបគ្នាម្តងទៀត នៅភាគខាងត្បូងប្រទេសអេស្ប៉ាញ ក្នុងរយៈពេល ៦ ថ្ងៃខាងមុខ នោះរដូវកាលរបស់ក្រុម Liverpool នឹងបញ្ចប់ជាមួយនឹងការប្រកួតក្នុងវគ្គផ្តាច់ព្រ័ត្រនៅ Champions League ជាលើកទី៣ ក្នុងរយៈពេល ៥ រដូវកាល នៅទីក្រុងប៉ារីស ប្រទេសបារាំង នាថ្ងៃទី ២៨ ខែឧសភា។
«វាដូចជាការនាំមុខ ២-០ នៅវគ្គទី១ អ៊ីចឹង។ អ្នកត្រូវតែមានការប្រុងប្រយ័ត្នឱ្យមែនទែន ពោលគឺ ១០០ ភាគរយ ក្នុងចង្វាក់ពេលវេលាដ៏ស័ក្ដិសម ហើយលេងក្នុងវគ្គទី២ ឱ្យដូចដែលយើងបានលេងក្នុងវគ្គទី១។ យើងដឹងច្បាស់ថា វានឹងមានបរិយាកាសតានតឹងសម្រាប់ពួកយើងជាមិនខាន»។ គ្រូបង្វឹករបស់ក្រុម Liverpool លោក Klopp។
ផ្ទុយស្រឡះពីភាពរំជើបរំជួលនៃការប្រកួតដ៏ស្វិតស្វាញដែលក្រុមមេឃខៀវ Manchester City មានជ័យជម្នះ ៤-៣ លើក្រុមអធិរាជស Real Madrid ក្នុងវគ្គពាក់កណ្តាលផ្តាច់ព្រ័ត្រ ១ គូផ្សេងទៀត កាលពីថ្ងៃអង្គារ ក្រុមរបស់លោក Emery បានកូពីតាមតាក់ទិកដែលបានឃើញថា ពួកគេបានទម្លាក់ទាំងក្រុម Juventus និងក្រុម Bayern Munich ដោយការលេងបែបការពារបែបនេះ។
តែយ៉ាងណាក្ដី ក្រុមដែលមានរហស្សនាម «Yellow Submarine» (នាវាមុជទឹក ពណ៌លឿង) ស្ទើរតែអាចធ្វើឱ្យក្រុមរបស់លោក Klopp ជួបបញ្ហាទៅហើយ ខណៈដែលក្រុម Liverpool ត្រូវរង់ចាំឱកាសពេលវេលាទម្រាំទទួលបានផលជាវិជ្ជមាននៅទីបំផុត ជាមួយនឹងទម្រង់លេងគ្របសង្កត់របស់ពួកគេ។
គ្រូបង្វឹករបស់ក្រុម Villarreal លោក Emery បាននិយាយថា៖ «២-០ គឺច្បាស់លាស់ណាស់ ពោលគឺជាលទ្ធផលដ៏សមរម្យ។ វាអាចនឹងមានលទ្ធផលអាក្រក់ជាងនេះទៀត តែយើងនៅមានឱកាស។ ខ្ញុំចង់បង្ហាញថា យើងមានសមត្ថភាព ក្នុងការលេងហ្គេមដ៏ប្លែកមួយនៅទឹកដីរបស់យើង»។
ជាមួយនឹង ២ គ្រាប់នេះ ក្រុមហង្សក្រហម ឥឡូវនេះបានទម្លុះសំណាញ់ទីរបស់ក្រុមគូបដិបក្ខនានាចំនួន ១៣៥ គ្រាប់ហើយ តែសម្រាប់ការប្រកួតនេះ រាងដូចជាតឹងចិត្តបន្តិចដែរ ពេលដែលបញ្ចប់ ៤៥ នាទីដំបូង ដោយមិនមានគ្រាប់បាល់៕ AFP/VN