The Phnom Penh Post Search

Search form




Logo of Phnom Penh Post newspaper Phnom Penh Post - Ancelotti សម្រេច​បាន​សមិទ្ធផល​ជា​ពិសេស ខណៈ Real ឈ្នះ​ជើងឯក La Liga លើក​ទី៣៥​

Ancelotti សម្រេច​បាន​សមិទ្ធផល​ជា​ពិសេស ខណៈ Real ឈ្នះ​ជើងឯក La Liga លើក​ទី៣៥​

Content image - Phnom Penh Post
កីឡាករ​របស់​ Real ថត​រូប​ជាមួយពាន​រង្វាន់ នៃ​ក្របខ័ណ្ឌ La Liga ក្រោយ​ចប់​ការ​ប្រកួត ទល់​នឹង​ Espanyol កាល​ពី​ថ្ងៃ​សៅរ៍​។

Ancelotti សម្រេច​បាន​សមិទ្ធផល​ជា​ពិសេស ខណៈ Real ឈ្នះ​ជើងឯក La Liga លើក​ទី៣៥​

ក្រុងម៉ាឌ្រីដ​: ក្រុមអធិរាជស Real Madrid បានគ្រង​ជើង​ឯក​ នៅ​ក្របខ័ណ្ឌ La Liga ជា​លើក​ទី​៣៥ កាល​ពី​ថ្ងៃ​សៅរ៍ ក្រោយ​យក​ឈ្នះ​ក្រុម Espanyol ៤-០ ក្នុង​ទឹក​ដី​ខ្លួន​ឯង ខណៈ​ដែល​លោក Carlo Ancelotti បាន​ក្លាយ​ជា​គ្រូ​បង្វឹក​ដំបូង​គេ ដែល​ឈ្នះ​ពាន​រង្វាន់​ ពី​គ្រប់​លីគ​ធំ​ៗ​​ទាំង​៥ នៅ​អឺរ៉ុប​។

ដោយ​ត្រូវ​ការ​ត្រឹម​តែ ១​ពិន្ទុ​ ពី​ការ​ប្រកួត ៥​លើក​ចុងក្រោយ​របស់​ពួកគេ ក្រុម Rea មាន​គ្រាប់​បាល់​នាំ​មុខ ២​គ្រាប់ តាម​រយៈ​ការ​ស៊ុត​របស់​ខ្សែ​ប្រយុទ្ធ Rodrygo ក្នុង​វគ្គ​ទី ១ នៃ​ហ្គេម នៅ​កីឡដ្ឋាន Santiago Bernabeu នេះ មុន​ពេល​គ្រាប់​បាល់ ដែល​បំប៉ោង​សំណាញ់​ទី​ដោយខ្សែ​បម្រើ Marco Asensio និង​ខ្សែ​ប្រយុទ្ធ Karim Benzema នៅវគ្គទី ២ បានមក​ជួយ​បង្គ្រប់​ជ័យ​ជម្នះ​យ៉ាង​ពេញ​លេញបរិ​បូរណ៍។

ក្រុម​អធិរាជស បាន​ធ្វើ​ពិធី​លើកពាន​រង្វាន់​នោះ នៅ​ចំពោះ​មុខ​មនុស្ស​ចំនួន​ជិត ៨០ ០០០នាក់ ខាង​ក្នុង​កីឡដ្ឋាន ហើយ​ការ​ប្រារព្ធការ​អបអរ​តាម​ទម្លាប់ បាន​បន្តធ្វើ ​​នៅ​ឯ​កន្លែង​បាញ់​​ទឹក Cibeles ក្នុង​រាជ​ធានី​របស់​ប្រទេស​អេស្ប៉ាញ។

«​វា​គឺ​ជា​លើក​ទី ១ ដែល​ខ្ញុំ​បាន​ឈ្នះ​ នៅ​ទឹក​ដី Bernabeu នេះ​។ បរិយាកាស គឺ​ពិត​ជា​ពិសេស​ណាស់​។ ប្រសិន​បើ​ខ្ញុំ​យំ នៅ​ពេល​សំឡេង​កញ្ចែ​ចុង​ក្រោយ​បន្លឺ​ឡើង វា​គឺ​ព្រោះ​តែ​ខ្ញុំ​រីករាយ​សប្បាយ​ចិត្ត​ពេក​»​។ នេះ​ជា​សម្ដី​របស់​លោក Ancelotti ដែល​ប្រាប់​ទៅ​កាន់​ទូរទស្សន៍ Movistar Plus​។

លោក Ancelotti បាន​វិល​មក​កាន់​ក្លិប Real វិល កាល​ពី​រដូវ​ក្ដៅ​កន្លង​ទៅ ដើម្បី​ទទួល​តំណែង​ជំនួស​លោក Zinedine Zidane ដែល​ជាលើក​ទី ២ ក្រោយ​សម្រេច​ចែក​ផ្លូវ​ជាមួយក្រុម Everton​។

Content image - Phnom Penh Post
លោក Ancelotti (ស្ដាំ) និង Benzema របស់ Real លើក​ដៃ​ស្វាគមន៍​ទៅ​កាន់​អ្នក​គាំទ្រ ក្រោយ​ចប់​ការ​ប្រកួត ទល់​នឹង​ Espanyol កាល​ពី​ថ្ងៃ​សៅរ៍​។​

អ្នក​ចាត់​ការ​សញ្ជាតិ​អ៊ីតាលី ក៏​បាន​ឈ្នះ​ផង​ដែរ​សម្រាប់​ជើងឯកលីគ​ធំៗ ៤​ផ្សេង​ទៀត​ ដូច​ជា Premier League (អង់គ្លេស) ជាមួយ​ក្រុម​តោខៀវ Chelsea, Serie A (អ៊ីតាលី) ជាមួយ​ក្រុមបិសាច​ក្រហម​ខ្មៅ AC Milan, Ligue 1 (បារាំង) ជាមួយ​ក្រុម​អ្នក​មាន Paris Saint-Germain និង Bundesliga (អាល្លឺម៉ង់) ជាមួយ​ក្រុម​ខ្លា​ភាគ​ខាង​ត្បូង Bayern Munich។

ដោយ​ពួកគេ​បាន​ឈរ​នៅ​កំពូល​តារាង តាំង​ពី​ខែ​វិច្ឆិកា​មក ដូច្នេះ វា​មិន​មែន​ជា​រឿង​ភ្ញាក់​ផ្អើល​ទេ ដែល​ក្រុម Real បាន​ឈ្នះ​ពាន ក្នុង​លីគ ដែល​ពួកគេ​បាន​មាន​ប្រៀប​អស់​រយៈ​ពេល​ជា​ច្រើន​ខែ តែ​ទម្រង់​លេង​ធ្លាក់​ចុះ​ពី​ក្រុម Barcelona និង Sevilla ក៏​ជា​ការ​រួម​ចំណែក ក្នុង​ការ​ផ្តល់​ឱកាស​សម្រាប់​ការ​ឡើងបាន​គ្រង​ជើង​ឯក​ដ៏​លឿន​នេះ​។

ក្រុម Real បាន​នាំ​មុខ​ដាច់ ១៧​ពិន្ទុ លើ​ក្រុម​លេខ ២ Sevilla ជាមួយ​នឹង​ការ​នៅសល់ ៤​ប្រកួត​ទៀត​។ ក្រុម​អ្នក​មាន​បុណ្យ Barcelona ដែល​ឈរ​នៅ​ទី ៣ មាន ១​ហ្គេម ក្នុង​ដៃ​ តែ​មាន​គម្លាត​ដល់​ទៅ ១៨​ពិន្ទុ​។
វា​ជា​ការ​ឈ្នះ​ជើង​ឯក​លីគ​កំពូល​ដ៏​លឿន​បំផុត​របស់​ក្រុម Real ចាប់តាំង​ពួក​គេ​ ធ្លាប់​សម្រេច​បាន ជាមួយ​នឹង​ការ​នៅ​សល់​ការ​ប្រកួត ៤លើក​ទៀត កាល​ពីរដូវកាល ១៩៨៩-១៩៩០​។

សម្រាប់ Benzema បើ​ទោះ​ជា​បង្ហាញ​ខ្លួន ក្នុង​នាម​ជា​កីឡាករ​បម្រុង ក៏​កីឡាអន្តរជាតិ​បារាំង នៅ​ធ្វើ​សម្រេច​គ្រាប់​បាល់​ទី ៤២ របស់​ខ្លួន​បាន ពី​ការ​ចូល​លេង​ជាច្រើ​ន​ហ្គេម នា​រដូវកាល​នេះ គិត​ក្នុង​ការ​ប្រកួត នៅ​គ្រប់​កម្មវិធី​ទាំង​អស់ ដើម្បី​បញ្ចប់​ជ័យ​ជម្នះ​ដាច់​ភឹង (ដាច់​ឆ្ងាយ) តែ​ម្ដង​សម្រាប់​ក្រុម Real និង​នៅ​ថ្ងៃ​ជា​ប្រវត្តិសាស្ត្រ សម្រាប់​លោក Ancelotti​៕ AFP/VN

អត្ថបទគួរចាប់អារម្មណ៍