ក្រុងឡុងដ៍: ក្រុមមេឃខៀវ Manchester City នៅបន្តរក្សាការនាំមុខ ១ ពិន្ទុ ក្នុងតារាងនៃក្របខ័ណ្ឌ Premier League លើក្រុមហង្សក្រហម Liverpool ដដែល ជាមួយនឹងការប្រកួតនៅសល់ ៤ លើក បន្ទាប់ពីបានយកឈ្នះក្រុម Leeds ៤-០ កាលពីថ្ងៃសៅរ៍ រីឯក្រុម Norwich ត្រូវបានទម្លាក់ទៅលីគទី២ ហើយ ក្រោយរងបរាជ័យ ២-០ នៅទឹកដីរបស់ក្រុម Aston Villa។
ការប្រកួត នៅមុននេះ ក្រុម Liverpool បានឡើងមកឈរនៅទីកំពូលតារាង ជាមួយនឹងជ័យជម្នះ ១-០ នៅឯទឹកដីរបស់ក្រុម Newcastle ដោយសារគ្រាប់បាល់របស់ខ្សែបម្រើ Naby Keita ក្នុងវគ្គទី១។
ក្រុមគូប្រជែងដណ្តើមជើងឯកទាំង ២ ធ្វើការផ្លាស់ប្តូរកីឡាករចំនួន ៥ រូប រៀងៗខ្លួនសម្រាប់ការប្រកួតនៅសប្ដាហ៍ទី៣៤ របស់ពួកគេនេះ ខណៈការធ្វើដំណើរដ៏លំបាកឆ្ពោះទៅហ្គេមជើងទី២ នៅក្របខ័ណ្ឌ Champions League ក្នុងវគ្គពាក់កណ្តាលផ្តាច់ព្រ័ត្ររបស់ពួកគេមានគម្លាតឆ្ងាយប៉ុន្មានឡើយ។
គ្រូបង្វឹករបស់ក្រុម Man City លោក Pep Guardiola នៅអាចផ្ដល់នូវភាពល្អឥតខ្ចោះ បានដោយមិនចាំបាច់ដាក់កីឡាករ Kevin De Bruyne ឡើយ ខណៈក្រុមជើងឯក បានរក្សាគវាសនា នៃការប្រជែងពាននៅក្នុងដៃរបស់ពួកគេ។
«វាមិនពាក់ព័ន្ធនឹងសម្ពាធអ្វីទេ ពោលគឺវាជាធម្មតា។ យើងត្រូវតែឈ្នះគ្រប់ហ្គេមទាំងអស់របស់យើង ដើម្បីក្លាយជាជើងឯក។ ប្រសិនបើយើងមិនអាចសម្រេចបានទេ Liverpool នឹងក្លាយជាជើងឯក»។ នេះជាការលើកឡើងរបស់លោក Pep។
គ្រាប់បាល់ទាំង ៤ គ្រាប់របស់ក្រុម Man City នេះ គ្រាប់ដំបូងកើតឡើងក្នុងនាទីទី១៣ ដោយខ្សែបម្រើ Rodri គ្រាប់ទី២ នៅនាទីទី៥៤ ដោយខ្សែការពារ Nathan Ake គ្រាប់ទី៣ នាទីទី៧៨ ដោយខ្សែប្រយុទ្ធ Gabriel Jesus និងគ្រាប់ទី៤ នៅនាទីទី៩០+៣ ដោយខ្សែបម្រើការពារ Fernandinho។
ចំណែកក្រុម Norwich កំពុងធ្វើដំណើរត្រឡប់ទៅក្របខ័ណ្ឌ Championship វិញហើយ ក្រោយឡើងមកលីគកំពូលបានតែ ១ រដូវកាល ដោយសារគ្រាប់បាល់ពីខ្សែប្រយុទ្ធ Ollie Watkins និង Danny Ings បានសម្រេចអនាគតរបស់អ្នកចាត់ការ លោក Dean Smith នៅថ្ងៃវិលមកទឹកដី Villa Park។
«ខ្ញុំខកចិត្តនឹងលទ្ធផលរបស់ពួកយើង។ យើងធ្វើមិនបានល្អគ្រប់គ្រាន់ឡើយ នារដូវកាលនេះ»។ នេះជាសម្ដីរបស់ប្រធានក្រុម Norwich កីឡាករ Grant Hanley៕ AFP/VN