ក្រុងឡុងដ៍: ក្រុម Everton រក្សាក្តីសង្ឃឹមរបស់ពួកគេ ក្នុងការបានរស់រាននៅក្របខ័ណ្ឌ Premier League បន្តទៀត ដោយការធ្វើឱ្យក្រុមតោខៀវ Chelsea ស្រឡាំងកាំង ជាមួយនឹងការយកឈ្នះ ១-០ កាលពីថ្ងៃអាទិត្យ ខណៈដែលក្រុមកាំភ្លើងធំ Arsenal នៅតែនាំមុខ ២ ពិន្ទុ លើក្រុមមាន់ខ្នាយមាស Tottenham Hotspur (Spurs) ក្នុងការប្រជែងដណ្ដើមសិទ្ធិទៅលេង នៅក្របខ័ណ្ឌ Champions League នារដូវកាលក្រោយ។
ក្រុម Arsenal បានដំណើរទៅយក ៣ពិន្ទុពីក្រុមម្ចាស់ផ្ទះ West Ham ជាមួយនឹងជ័យម្នះ ២-១ ដើម្បីត្រលប់ឡើងទៅនៅចំណាត់ថ្នាក់លេខ ៤ វិញ បន្ទាប់ពីត្រូវក្រុម Spurs ដណ្ដើមយក នៅមុនហ្នឹង ដោយសារឈ្នះក្រុមភ្ញៀវ Leicester ៣-១ ក្នុងនោះខ្សែប្រយុទ្ធអន្តរជាតិកូរ៉េខាងត្បូង Son Heung-min ស៊ុតបញ្ចូលទីបាន ២ គ្រាប់។
ការទទួលបានជ័យជម្នះដ៏មានសារសំខាន់របស់ក្រុម Everton ដោយសារគ្រាប់បាល់របស់ខ្សែប្រយុទ្ធ Richarlison នៅដើមវគ្គទី ១ ក្នុងកីឡដ្ឋាន Goodison Park ដែលពេញដោយសំឡេងខ្ញៀវខ្ញារនោះ មានន័យថា ក្រុមរបស់លោក Frank Lampard មានគម្លាតត្រឹមតែ ២ពិន្ទុប៉ុណ្ណោះ ពីក្រុមនៅទីសុវត្ថិភាព ហើយមានសល់ការប្រកួត ១លើក ក្នុងដៃ ដែលជាឱកាស ដើម្បីរំកិលឡើងទៅនៅពីលើក្រុម Leeds និង Burnley។
អតីតគ្រូបង្វឹករបស់ក្រុម Chelsea ផ្ទាល់ លោក Lampard ដែលចូលមកជំនួសតំណែងលោក Rafael Benitez នៅចុងខែមករា បានប្រឹងប្រែងយ៉ាងលំបាក ក្នុងការស្ដារឡើងវិញនូវជោគជតារបស់ក្រុមយក្ស នៅតំបន់ Merseyside ដែលលេងលើកចុងក្រោយ ខាងក្រៅលីគកំពូល កាលពីរដូវកាល ១៩៥៣-១៩៥៤។ តែលោកមានការពេញចិត្តនឹងភាពក្លៀវក្លា ដែលបង្ហាញចេញពីកីឡាករ និងអ្នកគាំទ្រ។
«អ្នកគាំទ្រ កំពុងស្ថិតនៅក្នុងចំណោម នៃរឿងនេះ (ការប្រឹងប្រែងដើម្បីគេចពីការកាត់ចោល)។ ខ្ញុំមានការរីករាយ ដែលកីឡាករទាំងអស់ អាចមើលរកឃើញផ្លូវ ដែលមានន័យចំពោះអ្នកគាំទ្រ។ ពួកគេដឹងច្បាស់ពីរឿងនោះ និងយល់ពីវាច្បាស់។ ពួកគេនៅពីក្រោយពួកយើង ពោលគឺទីនេះ នឹងត្រូវជាកន្លែងដ៏ពិបាកមួយ នាពេលខាងមុខជាមិនខាន»។ លោក Lampard បាននិយាយប្រាប់ប្រព័ន្ធផ្សព្វផ្សាយ Sky Sports។
ដោយឡែកក្រុម Arsenal កំពុងស្ថិតនៅលើផ្លូវ ក្នុងការបានបញ្ចប់ការអវត្តមាន រយៈពេល ៥ ឆ្នាំ ពី Champions League បន្ទាប់ពីមានជ័យជម្នះ ជាមួយនឹងគ្រាប់បាល់ ២គ្រាប់ ដែលធ្វើបានសម្រេចដោយខ្សែការពារកណ្ដាលទាំង ២ រូប គឺ Rob Holding និង Gabriel Magalhaes។
តែយ៉ាងណាក្ដី គោលបំណងរបស់ក្រុមកាំភ្លើងធំនោះ មិនដឹងត្រូវបានសម្រេចឬយ៉ាងនោះទេ នៅពេលដែលក្រុម Spurs ឯនោះ ក៏តាមមកប្រកៀកៗ ដែលធ្វើឱ្យការប្រជែងកៅអី ដើម្បីទៅប្រកួតប្រជែង នៅអឺរ៉ុប កាន់តែមានភាពតានតឹងឡើងៗ ខណៈដែលក្រុមគូប្រជែងរួមក្រុងឡុងដ៍ទាំង ២ ត្រូវប្រឈមគ្នានៅថ្ងៃទី ១២ ខែឧសភានេះ។
គ្រាប់បាល់នាំមុខ ដែលទម្លុះសំណាញ់ទីដោយខ្សែប្រយុទ្ធ Harry Kane និង ២គ្រាប់បន្ថែមដោយកីឡាករ Son បានធ្វើក្រុមរបស់លោក Antonio Conte មានប្រៀបទាំងស្រុងលើក្រុម Leicester ដែលស៊ុតបាន ១ គ្រាប់ដោយខ្សែប្រយុទ្ធ Kelechi Iheanacho និងដែលធ្វើការផ្លាស់ប្ដូរកីឡាករជម្រើសដំបូងយ៉ាងច្រើន ដោយសារត្រៀមខ្លួនសម្រាប់ហ្គេមជើងទី ២ នៅក្របខ័ណ្ឌ Europa Conference League វគ្គ ៤ក្រុមចុងក្រោយ ទល់នឹងក្រុមម្ចាស់ផ្ទះ Roma នៅអ៊ីតាលី។
«គ្មាននរណាម្នាក់ អាចធ្វើការស្រមៃបាននោះទេ នៅពេលដែលខ្ញុំបានមកដល់ ក្នុងខែវិច្ឆិកា ដែលពួកយើង អាចនៅក្នុងការប្រជែងនេះនៅឡើយ តែកីឡាករទាំងអស់ ស័ក្ដិសមនឹង ប្រយុទ្ធ ដើម្បីបានចំណាត់ថ្នាក់ដ៏សំខាន់បែបនេះ។ វាមិនមែនរឿងស្រួលនោះឡើយ ក្នុងការដណ្ដើមសិទ្ធិ សម្រាប់ Champions League នៅប្រទេសអង់គ្លេស»។ នេះជាការលើកឡើងរបស់លោក Conte ដែលប្រាប់ទៅប្រព័ន្ធផ្សព្វផ្សាយ BBC៕ AFP/VN