ក្រុងមីឡាន: ភ្នាក់ងាររបស់កីឡាករបាល់ទាត់ដ៏ល្បីល្បាញសញ្ជតិអ៊ីតាលី កាត់ហូឡង់ លោក Mino Raiola ត្រូវបានបញ្ជូនទៅមន្ទីរពេទ្យ តាំងពីខែមករា ដើម្បីព្យាបាលជំងឺរលាកសួត រហូតដល់ថ្ងៃព្រហស្បតិ៍មុន ប្រព័ន្ធផ្សព្វផ្សាយនៅប្រទេសអ៊ីតាលី បានធ្វើសេចក្ដីរាយការណ៍ថា គាត់បានស្លាប់ តែវាបានក្លាយជាព័ត៌មានមិនពិត ព្រោះគាត់កំពុងតែតស៊ូ ដើម្បីរស់ តាមរយៈការអះអាងបញ្ចាក់ពីមន្ទីរពេទ្យ។
ទោះជាយ៉ាងណាក្ដី ចុងក្រោយនេះ ក្រុមគ្រួសាររបស់លោក Raiola ដែលជាអ្នកមើលថែប្រយោជន៍របស់កីឡាករល្បីៗជាច្រើន ក្នុងនោះរួមមានខ្សែប្រយុទ្ធ Erling Haaland ខ្សែបម្រើ Paul Pogba និងខ្សែប្រយុទ្ធចាស់វស្សា Zlatan Ibrahimovic ឥឡូវនេះ បានបញ្ជាក់ពីមរណភាពរបស់គាត់ហើយ។
ក្រុមគ្រួសាររបស់លោក Raiola បានឱ្យដឹងក្នុងសេចក្តីថ្លែងការណ៍ថា៖ «យើងមានការសោកស្ដាយយ៉ាងខ្លាំង ដែលភ្នាក់ងាររបស់កីឡាករបាល់ទាត់ដ៏អស្ចារ្យបំផុតមួយរូបមិនធ្លាប់មាន បានលាចាកលោកនេះហើយ។ លោក Mino (Raiola) បានតស៊ូប្រយុទ្ធយ៉ាងរឹងមាំ រហូតដល់វិនាទីចុងក្រោយ ដូចដែលគាត់ធ្វើការចរចា ដើម្បីការពារផលប្រយោជន៍របស់កីឡាករអ៊ីចឹង។ លោក Mino បានធ្វើឲ្យយើងមានមោទនភាព ហើយគាត់មិនធ្លាប់រឭកដល់រឿងនេះឡើយ»។
«Mino បានខិតខំប្រឹងប្រែងធ្វើការ ដើម្បីជាប្រយោជន៍ ដល់កីឡាករជាច្រើនរូប ហើយបានសរសេរប្រវត្តិសាស្រ្តថ្មី ក្នុងវិស័យបាល់ទាត់សម័យថ្មី។ គាត់នឹងក្លាយជាបុគ្គល ដែលត្រូវបានចងចាំជារៀងរហូត»។ នេះជាការបន្តឱ្យដឹងពីសេចក្ដីប្រកាសរបស់ក្រុមគ្រួសាររបស់លោក Raiola ដែលលាចាកលោកនេះ ក្នុងវ័យ ៥៤ ឆ្នាំ។
សេចក្ដីប្រកាស បានបន្ថែមចុងក្រោយថា៖ «ភារកិច្ចរបស់លោក Mino ដែលធ្វើឱ្យបាល់ទាត់កាន់តែប្រសើរឡើង សម្រាប់កីឡាករ នឹងត្រូវបានធ្វើបន្ត។ យើងសូមថ្លែងអំណរគុណដល់អ្នកទាំងអស់គ្នា សម្រាប់ការផ្ដល់កម្លាំងចិត្តដ៏លើសលប់ ក្នុងអំឡុងពេលដ៏លំបាកនេះ ហើយយើងសុំនូវភាពឯកជនរបស់ក្រុមគ្រួសារនៃសព និងមិត្តភក្តិជិតស្និទ្ធ ក្នុងអំឡុងពេលដ៏សោកសៅនេះ»៕ AFP/VN