ភ្នំពេញៈ ការប្រណាំងកង់ភ្នំ WURKZ Mountain Bike Series ជុំទី១ រដូវកាលឆ្នាំ ២០២២ ដែលត្រូវបានធ្វើនៅលើទីលាន មានស្ថានភាពផ្លូវលំបាក ស្ថិតនៅលើភ្នំកកេស ក្នុងទឹកដីខេត្តកំពតនោះ បានក្លាយជាបទពិសោធ នៃការប្រកួតប្រជែងដ៏មានសារៈសំខាន់ ចំពោះក្រុមជម្រើសជាតិប្រណាំងកង់ភ្នំកម្ពុជា នៅមុនពេលពួកគេ ត្រូវធ្វើដំណើរទៅប្រកួតស៊ីហ្គេម លើកទី៣១ នៅវៀតណាម ខែឧសភានេះ។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន បានប្រាប់ ភ្នំពេញ ប៉ុស្តិ៍ថា៖ «កីឡាករជម្រើសជាតិកង់ភ្នំ ទាំង ៦ នាក់របស់យើង សុទ្ធតែបានចូលរួម ក្នុងការប្រកួតនេះ អ៊ីចឹងការប្រកួតជុំទី១ នេះ បានផ្តល់សារប្រយោជន៍យ៉ាងសំខាន់ដល់ពួកគាត់ ក្នុងការវាស់ស្ទង់កម្រិតបច្ចេកទេស និងបានពង្រឹងសមត្ថភាពបន្ថែមទៀត សម្រាប់ត្រៀមទៅចូលរួមការប្រកួតស៊ីហ្គេមលើកនេះ ហើយតាមការវាយតម្លៃពីក្រុមគ្រូបង្វឹកជម្រើសជាតិរបស់យើងបានឱ្យដឹងថា ការប្រកួតកង់ភ្នំជុំទី១ នេះ កីឡាកររបស់យើងធ្វើបានល្អ និងមានកម្រិតបច្ចេកទេសកើនឡើង គួរឱ្យកត់សម្គាល់»។
វាមិនមែនមានត្រឹមតែកីឡាករជម្រើសជាតិកង់ភ្នំ សាំង សីហា, ហួត លយរស្មី, លឹម វិវឌ្ឍន៍, ចាន់ ឆៃហ្វុង, ឃឹម ម៉េងឡុង និង ឃួន បណ្ឌិតបុត្រា ប៉ុណ្ណោះទេ ដែលទទួលបានប្រយោជន៍ពីការប្រកួតកង់ភ្នំ ដែលបានធ្វើឡើង កាលពីថ្ងៃអាទិត្យ កន្លងមកនេះ ប៉ុន្តែកីឡាករទាំងអាជីព និងមិនអាជីពជាង ៣០០ នាក់ទៀត ក៏បានពង្រឹងសមត្ថភាព និងបច្ចេកទេសរបស់ខ្លួន នៅក្នុងព្រឹត្តិការណ៍នេះដែរ ហើយអ្នករៀបចំ និងតំណាងអ្នកឧបត្ថម្ភផ្តាច់មុខ ពីភេសជ្ជៈប៉ូវកម្លាំងវើក (WURKZ) បានអះអាងថា ការប្រកួតជុំទី១ នេះ បានដំណើរការទៅយ៉ាងរលូន និងបញ្ចប់ដោយជោគជ័យ។
លោក Pierre Yves Catry ស្ថានិកកម្មវិធីប្រណាំងកង់ភ្នំ និងជាតំណាងអ្នករៀបចំកម្មវិធី FLYING BIKES2 បានឱ្យដឹងថា ការប្រកួតជុំទី១ នេះ បានទាក់ទាញក្រុមជម្រើសជាតិ និងមហាជន ដែលស្រឡាញ់ការជិះកង់ ទាំងក្មេង ចាស់ និងបុគ្គលិកក្រុមហ៊ុនជីបម៉ុង បានចូលរួមជាច្រើន សរុបចំនួន ៣២៨ នាក់ ធ្វើឱ្យការប្រណាំងនេះ មានភាពស្វិតស្វាញ និងពោរពេញដោយថាមពល។
លោកបានបន្ថែមថា៖ «ទីលានប្រណាំង នៅកំពតនេះ មានស្ថានភាពផ្លូវលំបាក មានផ្លូវទួល ផ្លូវថ្ម ដែលទាមទារការប្រើប្រាស់កម្លាំងខ្លាំង និងត្រូវមានបច្ចេកទេសជំនាញជិះកង់ខ្លាំង នៅពេលប្រណាំង។ តែទោះបីជាស្ថានភាពផ្លូវលំបាកបែបនេះក៏ដោយ ប៉ុន្តែក្រុមអត្តពលិកជាច្រើន បានចូលរួម ប្រណាំងយ៉ាងសប្បាយរីករាយ ហើយថែមទាំងអាចស្វែងយល់គន្លឹះ ក្នុងការជិះកង់ភ្នំ និងអាចពង្រឹងបទពិសោធបច្ចេកទេសរបស់ខ្លួនឱ្យកាន់តែល្អ»។
ចំណែកអ្នកស្រី គង់ កុសល នាយិកាទីផ្សារក្រុមហ៊ុនខ្មែរប៊ែវើរីជីសបានថ្លែងថា៖ «ទីលានប្រណាំង ជុំទី១ នេះ ស្ថិតក្នុងតំបន់ទេសចរណ៍ធម្មជាតិដ៏គួរឱ្យទាក់ទាញ ធ្វើឱ្យព្រឹត្តិការណ៍ប្រណាំងកង់ភ្នំ ទទួលបានការចាប់អារម្មណ៍ជាខ្លាំង ជាពិសេសមានពលរដ្ឋរស់នៅក្នុងតំបន់ និងនៅតាមបណ្តាខេត្តនានា បានអញ្ជើញមកទស្សនាផ្ទាល់ភ្នែកយ៉ាងច្រើនកុះករ ដែលធ្វើឱ្យជុំទី១ មានភាពអ៊ូអរ និងសប្បាយជាខ្លាំង»។
គួរបញ្ជាក់ថា ការប្រណាំងកង់ភ្នំ ឆ្នាំ ២០២២ នេះ មានការប្រកួតនៅលើវិញ្ញាសាចំនួន ១៤ ហើយការប្រកួតរដូវកាលនេះ ត្រូវធ្វើឡើង ៥ ជុំ ដោយបានចាប់ផ្តើម នៅខេត្តកំពតនេះ រួចបន្តទៅធ្វើជុំទី២ នៅខេត្តកំពង់ស្ពឺ នាថ្ងៃទី ៣ ខែកក្កដា ហើយជុំទី៣ ធ្វើនៅខេត្តសៀមរាប នាថ្ងៃទី ១៦ ខែតុលា រីឯជុំទី៤ នឹងត្រូវធ្វើនៅព្រែកលៀប នាថ្ងៃទី ២០ ខែវិច្ឆិកា ខណៈការប្រកួតផ្តាច់ព្រ័ត្រ ជុំទី៥ ត្រូវធ្វើនៅគិរីរម្យដដែល នាថ្ងៃទី ១៨ ខែ ធ្នូ ឆ្នាំ ២០២២៕