ក្រុងម៉ាឌ្រីដ: ម្ចាស់ជើងឯកពានក្នុងកម្មវិធី US Open កីឡាការិនី Emma Raducanu បានធ្វើដំណើរទៅជុំទី៣ នៃការប្រកួតវាយកូនបាល់ក្នុងកម្មវិធី Madrid Open កាលពីថ្ងៃអាទិត្យ ក្រោយទម្លាក់កីឡាការិនី Marta Kostyuk ដោយការយកឈ្នះ ក្នុងលទ្ធផល ៦-២ និង ៦-១ ខណៈដែលកីឡាការិនីសញ្ជាតិអេស្ប៉ាញ Sara Sorribes Tormo បានបញ្ឈប់ដំណើរម្ចាស់ជើងឯកពានធំៗ ៤ សម័យកាល គឺកីឡាការិនី Naomi Osaka ជាមួយនឹងជ័យជម្នះ ៦-៣ និង ៦-១។
កីឡាការិនី Raducanu វ័យ ១៩ ឆ្នាំ បានឈ្នះការប្រកួតដល់ទៅចំនួន ១១ លើក ក្នុងចំណោម ១២ លើកចុងក្រោយ ពីការលេងទល់នឹងកីឡាការិនីអ៊ុយក្រែន Kostyuk ដើម្បីជាការដណ្ដើមជ័យជម្នះជាច្រើនហ្គេមជាប់ៗគ្នាជាលើកទី២ ក្នុងកម្មវិធីប្រកួតផ្សេងៗ នារដូវកាលនេះ។
«ខ្ញុំពិតជាសប្បាយចិត្តខ្លាំងណាស់ ជាមួយនឹងទម្រង់លេងរបស់ខ្ញុំ នៅថ្ងៃនេះ។ Marta (Kostyuk) គឺជាគូប្រកួតដ៏រឹងមាំ យើងប្រកួតជាច្រើនដង កាលពីនៅកម្រិតយុវជន ហើយបន្ទាប់មក ម្តងទៀត កាលពីឆ្នាំមុន»។ ខ្ញុំដឹងថា វាតែងតែជាសមរភូមិ (ការប្រកួតប្រជែង) ដ៏ស្វិតស្វាញជានិច្ច ដូច្នេះហើយ ខ្ញុំបានចេញទៅទីនោះ ដោយព្យាយាមវាយសម្រុកទាំងស្រុង ហើយវាពិតជាទទួលបានផលមែន»។ នេះជាសម្ដីរបស់កីឡាការិនី Raducanu។
កីឡាការិនី Raducanu នឹងឡើងទៅប្រឈមជាមួយគូប្រកួតសញ្ជាតិអ៊ុយក្រែន ១ រូបផ្សេងទៀត គឺកីឡាការិនី Anhelina Kalinina នៅជុំបន្ទាប់ នៃកម្មវិធីប្រកួតលើទីលានដីឥដ្ឋ នៅក្រុងម៉ាឌ្រីដ របស់ប្រទេសអេស្ប៉ាញនេះ បន្ទាប់ពីកីឡាការិនីវ័យ ២៥ ឆ្នាំរូបនោះ បានទម្លាក់គូបដិបក្ខ កីឡាការិនី Garbine Muguruza ដែលមានចំណាត់លេខ ៩ ពិភពលោក ដោយយកឈ្នះ ៦-៣ និង ៦-០។
រីឯកីឡាការិនីសញ្ជាតិជប៉ុន Osaka បានប្រឹងប្រែង ដើម្បីរកឱ្យឃើញចង្វាក់លេងរបស់ខ្លួន ពេលត្រូវបានគ្របសង្កត់ដោយគូបដិបក្ខ Sorribes Tormo ដែលដណ្តើមបានជ័យជម្នះលក្ខណៈអាជីពជាលើកទី២ លើអតីតកីឡាការិនីលេខ ១ ពិភពលោក។
ក្រោយធ្លាក់ពីកម្មវិធីនេះ កីឡាការិនី Osaka មិនសូវជាមានការបារម្ភពេកនោះទេ ចំពោះបញ្ហារបួសម្ដុំកជើងតែអះអាងថា នាងនឹងអាចដោះស្រាយឱ្យមានភាពប្រសើរជាងនេះ ដោយការប្រើថ្នាំបំបាត់ការឈឺចាប់ឱ្យបានលឿនជាងដែលនាងធ្លាប់ធ្វើកន្លងមក។
«ខ្ញុំទទួលអារម្មណ៍ថា ខ្ញុំមិនអាចលេងបានតាមវិធី ដែលខ្ញុំចង់លេងនោះឡើយ ពោលគឺដូចជាខ្ញុំត្រូវបានដាក់ដែនកំណត់។ ដូច្នេះ វាមានចំណុចផ្សេងៗជាច្រើន ដែលខ្ញុំគិតថា ខ្ញុំអាចនឹងធ្វើបានល្អជាងការប្រកួតមុនៗ តែគ្រាន់តែខ្ញុំធ្វើមិនបានប៉ុណ្ណោះ»។ នេះជាការពន្យល់ប្រាប់របស់កីឡាការិនី Osaka៕ AFP/VN