ក្រុងប៊ែរឡាំង: ក្រុម Borussia Dortmund បានពង្រឹងតំបន់ការពាររបស់ខ្លួន សម្រាប់រដូវកាលក្រោយ ដោយការប្រកាសពីការចុះហត្ថលេខា កាលពីថ្ងៃចន្ទ យកខ្សែការពារកណ្តាលសញ្ជាតិអាល្លឺម៉ង់ Nico Schlotterbeck លើកិច្ចសន្យារយៈពេល ៥ឆ្នាំ ពី Freiburg ដែលក្រុមគូប្រជែង នៅក្របខ័ណ្ឌ Bundesliga ជាមួយគ្នា។
កីឡាករវ័យ ២២ឆ្នាំ បានចូលលេង ក្នុងក្រុមជម្រើសជាតិអាល្លឺម៉ង់ នៅរដូវកាលនេះ ដោយផ្អែកលើទម្រង់លេងដ៏គួរឱ្យចាប់អារម្មណ៍ ក្នុងក្រុម Freiburg នៅក្របខ័ណ្ឌកំពូលរបស់អាល្លឺម៉ង់នេះ។
ក្លិបទាំង ២ មិនបានបញ្ជាក់អះអាងពីតម្លៃ នៃការផ្ទេរនេះទេ តែកាសែតប្រចាំថ្ងៃ «Bild» នៅអាល្លឺម៉ង់ បានឱ្យដឹងថា មានតម្លៃប្រហែល ២០លានអឺរ៉ូ ($២១ លាន)។
«Nico Schlotterbeck គឺជាកីឡាករវ័យក្មេងជម្រើសជាតិអាល្លឺម៉ង់ ដែលបានអភិវឌ្ឍខ្លួនកាន់តែប្រសើរឡើងៗ។ ទម្រង់លេងរបស់គេសមនឹងក្រុម Borussia Dortmund យ៉ាងល្អឥតខ្ចោះ»។ នេះជាការលើកឡើងពីនាយកកីឡាកររបស់ក្លិប លោក Michael Zorc។
Schlotterbeck គឺជាខ្សែការពារសញ្ជាតិអាល្លឺម៉ង់ចុងក្រោយបង្អស់ ដែលផ្លាស់ទៅក្លិប Dortmund សម្រាប់រដូវកាលក្រោយ បន្ទាប់ពីកីឡាករ Niklas Suele បានមកចូលរួមជាមួយលក្ខខណ្ឌឥតតម្លៃខ្លួន ពីក្រុម Bayern Munich ក្នុងខែកុម្ភៈ ហើយទាំង ២នាក់ ត្រៀមធ្វើជាដៃគូនឹងគ្នា នៅតំបន់ការពារកណ្ដាល នារដូវកាលក្រោយ។
គ្រូបង្វឹកលោក Marco Rose បានបញ្ជាក់យ៉ាងច្បាស់ថា តំបន់ការពារ ត្រូវតែកែលម្អ បន្ទាប់ពីរងបរាជ័យ ក្នុងលទ្ធផល ៤-៣ កាលពីថ្ងៃសៅរ៍ ក្នុងទឹកដីខ្លួនឯង ដោយសារក្រុម Bochum ដែលលទ្ធផលនោះ បានឃើញថា ក្រុម Dortmund របូតគ្រាប់បាល់ដល់ទៅ ៥០គ្រាប់ សម្រាប់ការប្រកួត ក្នុងលីគ នារដូវកាលនេះ៕ VN