ក្រុងប៉ារីស: Dorna ដែលជាក្រុមហ៊ុនផ្សព្វផ្សាយរបស់កម្មវិធីប្រណាំងម៉ូតូពិភពលោក MotoGP កាលពីថ្ងៃអង្គារ បានឆ្លើយតបទៅនឹងសេចក្ដីរាយការណ៍ដែលថា ក្រុមប្រណាំង Suzuki កំពុងគិតគូរពីការចាកចេញ ដោយប្រាប់ថា ក្រុមហ៊ុនផលិតថា ពួកគេត្រូវតែប្រកាន់ខ្ជាប់តាមកិច្ចសន្យារបស់ខ្លួន។
«ក្រុមហ៊ុន Dorna Sports បានទាក់ទងទៅរោងចក្រផលិតជាផ្លូវការ ដើម្បីរំឭកពួកគេថា លក្ខខណ្ឌនៃកិច្ចសន្យារបស់ពួកគេ ដើម្បីប្រណាំងក្នុងកម្មវិធី MotoGP មិនអនុញ្ញាតឱ្យពួកគេ ធ្វើការសម្រេចជាឯកតោភាគីនោះទេ»។ នេះជាការឱ្យដឹងពីក្រុមហ៊ុនរៀបចំតាមរយៈសេចក្ដីប្រកាសរបស់ខ្លួន។
ការព្រមាននេះ កើតមានឡើង បន្ទាប់ពីមានសេចក្ដីរាយការណ៍នៅលើគេហទំព័រឯកទេស Motorsports.com ដែលថា ប្រធានក្រុម Suzuki បានធ្វើការជួបជុំសមាជិកទាំងអស់នៃក្រុមប្រណាំង MotoGP កាលពីថ្ងៃចន្ទ ហើយបាននិយាយពីការសម្រេចរបស់ក្រុម ក្នុងការចាកចេញពីការប្រកួតប្រជែងជាបន្តបន្ទាប់នៅចុងឆ្នាំនេះ។
Suzuki ធ្លាប់បានចាកចេញពីការប្រណាំង MotoGP រួចហើយ នៅបញ្ចប់ឆ្នាំ ២០១១ មុនត្រឡប់មកចូលរួមប្រកួតវិញ ក្នុងឆ្នាំ ២០១៥។ យ៉ាងណាក្ដី Dorna មិនបានច្រានចោលពីលទ្ធភាព ដែលក្រុមប្រណាំងរបស់ជប៉ុនមួយនេះ នឹងដើរចេញម្ដងទៀតនោះទេ។
ក្នុងសេចក្ដីប្រកាសដដែលនោះ Dorna បានបន្តទៀតថា៖ «ក្រុម Suzuki គួរតែដកខ្លួន បន្ទាប់ពីមានការព្រមព្រៀង រវាងភាគីទាំង ២។ Dorna នឹងសម្រេចជ្រើសរើសចំនួនអ្នកប្រណាំង និងក្រុមប្រណាំងដ៏ល្អបំផុត ដើម្បីចូលរួមក្នុងកម្មវិធី MotoGP ចាប់ពីឆ្នាំ ២០២៣ តទៅ»។
Dorna បានឱ្យដឹងទៀតថា នៅបន្តទទួលបានការចាប់អារម្មណ៍ខ្ពស់ពីក្រុមផលិតផ្លូវការ និងក្រុមប្រណាំងឯករាជ្យមួយចំនួន ដែលកំពុងរង់ចាំចូលរួមបើកបរលើផ្លូវប្រណាំង ក្នុងកម្មវិធី MotoGP ហើយក្រុមហ៊ុនផ្សព្វផ្សាយមួយនេះ បានបន្ថែមថា ចំណាប់អារម្មណ៍ពីភាគីទាំងនេះ ត្រូវបានបញ្ជាក់អះអាងឡើងវិញ នៅ ២៤ ម៉ោងកន្លងមកនេះ។
ក្នុងយុគសម័យការប្រណាំងកម្លាំងម៉ាស៊ីន ៥០០ សេសេនេះ អតីតអ្នកបើកបរ ដូចជាលោក Barry Sheene, Marco Lucchinelli, Franco Uncini, Kevin Schwantz និង Kenny Roberts Jr. សុទ្ធតែធ្លាប់ឈ្នះជើងឯក ពេលកំពុងកាច់ចង្កូតឱ្យក្រុម Suzuki។
ចាប់តាំងពីក្រុមហ៊ុនបានវិលមកវិញ ក្នុងឆ្នាំ ២០១៥ ពួកគេបានឈ្នះជើងឯកម្ដងក្នុងឆ្នាំ ២០២០ នៅពេលដែលអ្នកបើកបរ Joan Mir ឈរនៅទីកំពូលតារាងពិន្ទុសរុប ដោយមិត្តរួមក្រុម Alex Rins ជាប់លេខ ៣។
នៅក្នុងតារាងចំណាត់ថ្នាក់រដូវកាលនេះ ក្រោយឆ្លងកាត់ ៦ ដំណាក់កាល កីឡាករ Rins នៅលេខ ៤ ខណៈ Mir ដែលត្រូវបានឱ្យដឹងថា ទំនងជាអាចចូលរួមជាមួយក្រុម Honda ឈរនៅលេខ ៦៕ AFP/VN