លោក សេង ប៊ុនសុង (ពីឆ្វេង) ជីដូនរបស់ ខាន់ ចេសា, ខាន់ ចេសា និងឪពុករបស់នាង។ រូបថត ឈន ណន
ភ្នំពេញៈ វីរកីឡាការិនីជឺជីតស៊ូ ខាន់ ចេសា បាននិយាយដោយ ភាពជឿជាក់ថា ការវិលត្រឡប់មកកាន់ប្រទេសកម្ពុជាជាថ្មីកាលពីថ្ងៃព្រហស្បតិ៍ គឺដើម្បីទៅប្រជែងយកមេដាយមាស ពីការប្រកួតស៊ីហ្គេម លើកទី៣១ នៅប្រទេសវៀតណាម ហើយជាមួយគ្នា ឪពុករបស់នាង លោក Peter Khan និងប្រធានសហព័ន្ធកីឡាជឺជីតស៊ូកម្ពុជា សុទ្ធតែជឿជាក់ថា ចេសា នឹងអាចនាំយកមេដាយមាសជូនកម្ពុជាជាថ្មីម្តងទៀត។
កីឡាការិនីកូនកាត់ខ្មែរ-អាមេរិក ខាន់ ចេសា បានបង្ហាញភាពរីករាយខ្លាំង ពេលធ្វើដំណើរមកដល់ព្រលានយន្តហោះអន្តរជាតិភ្នំពេញ ជាមួយលោក Peter Khan និងជីដូន រួមទាំងមិត្តភក្តិរបស់នាង ហើយ ខាន់ ចេសា នឹងបន្តដំណើរទៅកាន់ទីក្រុងហាណូយ ជាទីកន្លែង ដែលកញ្ញាត្រូវប្រកួតលើប្រភេទកីឡាជឺជីតស៊ូ ជាមួយមិត្តរួមក្រុមម្នាក់ទៀត គឺកីឡាការិនី ម៉ាប់ សុខហួយ ដែលត្រូវប្រកួតទម្ងន់ ៥១,៥ គ.ក្រ។
ខាន់ ចេសា បាននិយាយថា៖ «ខ្ញុំពិតជាមានអារម្មណ៍សប្បាយរីករាយ ដែលបានមកប្រទេសកម្ពុជា ជាថ្មីម្តងទៀត ព្រោះខ្ញុំបានខកខានមកទីនេះ ជិត ៣ ឆ្នាំមកហើយ។ ខ្ញុំបានត្រៀមខ្លួនរួចរាល់អស់ហើយ ព្រោះនេះជាលើកទី៣ ដែលខ្ញុំបានប្រកួតតំណាងឱ្យកម្ពុជា និងជាលើកទី២ ដែលខ្ញុំបានចូលរួមប្រកួតនៅស៊ីហ្គេម ហើយការត្រឡប់មកវិញលើកនេះ គឺដើម្បីដណ្តើមមេដាយមាសឱ្យកម្ពុជាម្តងទៀត»។
នៅមុនការធ្វើដំណើរ មកប្រកួតស៊ីហ្គេម លើកនេះ ខាន់ ចេសា ធ្លាប់បានកំណត់ត្រាជាប្រវត្តិសាស្ត្រ សម្រាប់កម្ពុជារួចមកហើយ ដោយកីឡាការិនីធ្លាប់ឈ្នះមេដាយមាសពីការប្រកួតគ្រប់កម្រិតរូបនេះ ដណ្តើមបានមេដាយមាស ពីការប្រកួតកីឡាអាស៊ី នៅឥណ្ឌូនេស៊ី ឆ្នាំ ២០១៨ រួចបានបន្តឈ្នះបានមេដាយមាសស៊ីហ្គេម កាលពីឆ្នាំ ២០១៩ នៅប្រទេសហ្វីលីពីន។
ចំពោះការប្រកួតលើកនេះ ខាន់ ចេសា បានបញ្ជាក់ថា៖ «ខ្ញុំគិតថា ការប្រកួតស៊ីហ្គេមលើកនេះ នឹងមានភាពតានតឹងខ្លាំង ប៉ុន្តែគិតតាំងពីខ្ញុំបានឈ្នះមេដាយមាសស៊ីហ្គេមលើកដំបូង នៅហ្វីលីពីន កាលពីឆ្នាំ ២០១៩ រហូតមកដល់ពេលនេះ គឺខ្ញុំទទួលបានបទពិសោធប្រកួតកាន់តែច្រើន ដែលធ្វើឱ្យសមត្ថភាពរបស់ខ្ញុំ មានភាពប្រសើរជាងលើកមុន ហេតុនេះខ្ញុំជឿជាក់ថា ខ្ញុំនឹងអាចឈ្នះបានមេដាយមាសស៊ីហ្គេម នៅវៀតណាមជាថ្មីម្តងទៀត»។
ចំណែក លោក Peter Khan ដែលជាគ្រូបង្វឹកដ៏ជំនាញផ្នែកកីឡាជឺជិតស៊ូនេះ ក៏មានការជឿជាក់ថា កូនស្រីរបស់លោក នឹងដណ្តើមបានមេដាយមាសផងដែរ។ «ពួកយើងពិតជាសប្បាយរីករាយ សម្រាប់ការវិលមកប្រកួតតំណាងឱ្យកម្ពុជា នៅស៊ីហ្គេមលើកនេះ ហើយវាក៏ជាលើកទី៣ ផងដែរ ដែលកូនស្រីរបស់ខ្ញុំ បានក្លាយជាអត្តពលិកម្នាក់ ប្រកួតតំណាងឱ្យកម្ពុជា ហើយខ្ញុំជឿថា ខាន់ ចេសា នឹងនាំយកមកនូវមោទនភាពជូនដល់កម្ពុជា តាមរយៈការដណ្តើមយកមេដាយមាស សម្រាប់ការប្រកួតនៅវៀតណាមលើកនេះ»។
ជាមួយគ្នានេះលោក សេង ប៊ុនសុង ដែលទើបត្រូវបានតែងតាំងជាប្រធានសហព័ន្ធកីឡាជឺជីតស៊ូកម្ពុជាបានថ្លែងថា៖ «ក្នុងនាមជាប្រធានសហព័ន្ធថ្មី ខ្ញុំពិតជាសប្បាយរីករាយ ដែលកីឡាការិនីឆ្នើមរបស់យើង ខាន់ ចេសា បានមកចូលរួមការប្រកួតស៊ីហ្គេមលើកនេះ ហើយយើងនឹងព្យាយាមឱ្យអស់ពីចិត្ត ដើម្បីដណ្តើមយកមេដាយមាសជូនប្រទេសជាតិរបស់យើង។ ជាមួយគ្នានេះ តាមបទពិសោធ និងជំនាញផ្ទាល់ខ្លួនរបស់ខ្ញុំ និងតាមការសិក្សាស្រាវជ្រាវ ទៅលើក្បាច់គុនទាំងអស់ នៅលើសកលលោកនេះ ខ្ញុំមើលឃើញថា ខាន់ ចេសា ពិតជាមានជំនាញ និងមានថ្វីដៃដ៏ល្អ សម្រាប់ប្រភេទទម្ងន់របស់នាង»៕
