.jpg)
Hugo Lloris (ឆ្វេង) របស់ Spurs ព្យាយាមដោលបាល់ចេញពីការស៊ុតរបស់ Mohamed Salah (ស្ដាំ) អំឡុងការប្រកួត នៅ Premier League កាលពីថ្ងៃសៅរ៍។
ក្រុងឡុងដ៍: ការព្យាយាមប្រជែងជើងឯក នៃក្របខ័ណ្ឌ Premier League របស់ក្រុម Liverpool បានរងនូវផលប៉ះពាល់យ៉ាងធ្ងន់ធ្ងរ ដោយសារស្មើជាមួយក្រុម Tottenham Hotspur (Spurs) ១-១ ក្នុងទឹកដីខ្លួនឯង កាលពីថ្ងៃសៅរ៍ ហើយលទ្ធផលនេះ ក៏ធ្វើឱ្យការតាមប្រដេញរបស់ក្រុមហង្សក្រហម ដើម្បីបានឈ្នះពានរង្វាន់ចំនួន ៤ ក្នុង ១ រដូវកាល អាចនិយាយបានថា រលាយបាត់ស្ទើរទាំងស្រុងហើយ ខណៈដែលក្រុមបិសាចក្រហម Manchester United ឯនោះវិញ ត្រូវក្រុមម្ចាស់ផ្ទះ Brighton បំបាក់យ៉ាងចាស់ដៃ ៤-០។
ក្រុម Liverpool របស់លោក Jurgen Klopp ក្នុងនាមជាម្ចាស់ផ្ទះ បានភ្លាត់តាមពីក្រោយក្រុមភ្ញៀវដោយសារគ្រាប់បាល់របស់ខ្សែប្រយុទ្ធ Son Heung-min នៅដើមវគ្គទី ២ មុនពេលខ្សែប្រយុទ្ធ Luis Diaz ជួយឱ្យតាមស្មើវិញ នៅដំណាក់កាលចុងក្រោយ នៃការប្រកួត នៅកីឡដ្ឋាន Anfield នេះ។
ក្រុម Liverpool ដែលបានលើកពានរង្វាន់ ១ កម្មវិធីរួចហើយ គឺ League Cup និងដែលបានឡើងដល់វគ្គផ្ដាច់ព្រ័ត្រ ក្នុងក្របខ័ណ្ឌ Champions League និងកម្មវិធី FA Cup បានរំកិលឡើងទីឈរទីកំពូល នៃតារាងពិន្ទុរបស់លីគ ជាមួយនឹងគ្រាប់បាល់ចំណេញលើសក្រុមគូប្រជែង Manchester City ដែលត្រូវប្រកួត នៅថ្ងៃអាទិត្យនេះ ទល់នឹងក្រុម Newcastle ក្នុងកីឡដ្ឋាន Etihad របស់ខ្លួន។
លទ្ធផល នៃការរបូតពិន្ទុរបស់ក្រុម Liverpool នេះ នឹងក្លាយជាការជំរុញដ៏មហាសាលដល់ក្ដីសង្ឃឹមរបស់ក្រុមមេឃខៀវ Man City ក្នុងការអាចរក្សារតំណែងជើងឯករបស់ខ្លួនបាន ដ្បិតនៅសល់តែ ៣ហ្គេមទៀតប៉ុណ្ណោះ សម្រាប់ក្រុមទាំង ២ បន្ទាប់ពីចុងសប្ដាហ៍នេះកន្លងទៅ។
Cristiano Ronaldo របស់ Man United មានទឹកមុខស្រងូតស្រងាត់ អំឡុងការប្រកួត នៅ Premier League ទល់នឹង Brighton កាលពីថ្ងៃសៅរ៍។
«វាពិតជាមានការលំបាកខ្លាំងណាស់ ក្នុងការលេងទល់នឹងគូប្រកួតមួយ ដែលមានកីឡាករកម្រិតពិភពលោក និងអ្នកចាត់ការលំដាប់ពិភពលោក ខណៈដែលពួកគេ មានពេលត្រៀមខ្លួន ១សប្ដាហ៍ ស្របពេលដែលពួកយើង ធ្វើការប្រកួតរៀងរាល់ ៣ថ្ងៃម្ដង»។ នេះជាការលើកឡើងរបស់លោក Klopp។
អ្នកចាត់ការសញ្ជាតិអាល្លឺម៉ង់ បានបន្ថែមថា៖ «បន្ទប់ផ្លាស់សម្លៀកបំពាក់ មិនអាចឆ្លងកាត់ចំពោះការខកចិត្តនេះយ៉ាងឆាប់រហ័សនោះឡើយ តែយ៉ាងណា មានហ្គេមផ្សេងទៀត ដែលត្រូវលេង។ អ្វី ដែលត្រូវធ្វើ គឺយើងត្រឹមតែបន្តដំណើរទៅមុខប៉ុណ្ណោះ»។
ដោយឡែកក្រុម Man United ត្រូវបន្តស៊ូទ្រាំនឹងភាពអាម៉ាស់ជាច្រើន ក្នុងរដូវកាល ១ នៃរដូវកាលដ៏គួរឱ្យអាប់ឱនជាច្រើនរបស់ពួកគេ ក្នុងរយៈពេលជាច្រើនទសវត្សរ៍មកនេះ ហើយការបរាជ័យរបស់ពួកគេ នៅឯផ្ទះរបស់ក្រុម Brighton គឺស្ថិតក្នុងចំណោមរឿងដ៏អាក្រក់បំផុតទាំងនោះ។
ក្រុមបិសាចក្រហមរបស់លោក Ralf Rangnick ត្រូវបានធ្វើឱ្យបែកខ្ញែក ដោយសារគ្រាប់បាល់របស់កីឡាករ Moises Caicedo, Marc Cucurella, Pascal Gross និង Leandro Trossard សម្រាប់ការប្រកួត នៅកីឡដ្ឋាន Amex នេះ ហើយប្រាកដណាស់ ជាមួយនឹងការឈរនៅចំណាត់ថ្នាក់ទី ៦ ក្រុមយក្ស នៅក្រុងមេនឆេស្ទ័រ នឹងបាត់មុខពី Champions League ជាលើកទី ៥ ក្នុងចំណោម ៣០ រដូវកាល។
ដោយមាន ៥៨ពិន្ទុ និងនៅសល់តែ ១ហ្គេមទៀត ការរងបរាជ័យ នៅក្រៅទឹកដី ជាលើកទី ៥ បន្តបន្ទាប់គ្នារបស់ក្រុម Man United មានន័យថា ពួកគេនឹងបញ្ចប់ជាមួយនឹងការមានពិន្ទុសរុបទាបបំផុត ក្នុងយុគសម័យរបស់ Premier League។
«វាគឺជាការមានទម្រង់លេងដ៏អាក្រក់មើលបំផុត។ ពីនាទីដំបូង រហូតដល់នាទីចុងក្រោយ វាអត់គ្រប់គ្រាន់នោះទេ យើងអាចត្រឹមតែសុំអភ័យទោស ចំពោះទម្រង់លេងនេះ និងបរាជ័យដ៏អាម៉ាស់នេះប៉ុណ្ណោះ»។ លោក Rangnick បានលើកឡើង៕ VN
