The Phnom Penh Post Search

Search form




Logo of Phnom Penh Post newspaper Phnom Penh Post - ៣​ ចំណុច គួរ​ដឹងពី​ការប្រកួតនៅ Premier League ចុងសប្ដាហ៍កន្លងមក

៣​ ចំណុច គួរ​ដឹងពី​ការប្រកួតនៅ Premier League ចុងសប្ដាហ៍កន្លងមក

Content image - Phnom Penh Post
Cristiano Ronaldo របស់ Man United មាន​ទឹកមុខ​ស្រងូតស្រងាត់ អំឡុងការប្រកួត Premier League ទល់​នឹង Brighton កាល​ពី​ថ្ងៃ​សៅរ៍​។

៣​ ចំណុច គួរ​ដឹងពី​ការប្រកួតនៅ Premier League ចុងសប្ដាហ៍កន្លងមក

ក្រុងមេនឆេស្ទ័រ​: ក្រុម​មេឃខៀវ Manchester City មិន​បាន​ឱ្យ​ឃើញ​​នូវ​សញ្ញា​នោះ​ឡើយ នៃផល​ប៉ះ​ពាល់​ពី​ការ​ប្រកួត នៅ​ក្របខ័ណ្ឌ Champions League នា​ចុង​សប្តាហ៍ ដែល​អាច​បង្ហាញ​ពី​ការ​កំណត់ ក្នុង​ការ​ប្រជែង​ដណ្តើម​ពាន​ ក្នុង​ក្របខ័ណ្ឌ Premier League ខណៈ​ដែល​ពួកគេ បាន​បន្លាយ​ការ​នាំមុខ​របស់​ពួកគេ នៅ​ទី​កំពូល​តារាង​រហូត​ដល់ ៣​ ពិន្ទុ​។

ក្រុម Man City បានសំពង​ក្រុម Newcastle ឥត​ត្រា​ប្រណី ៥-០ សម្រាប់​ការប្រកួត ក្នុង​កីឡដ្ឋាន Etihad របស់​ខ្លួន បន្ទាប់​ពី​ក្រុម​ហង្សក្រហម Liverpool របូត​ពិន្ទុ នៅទឹក​ដី Anfield ជា​លើក​ដំបូង គិត​តាំង​ពី​ខែ​តុលា ដោយ​ការ​លេង​ស្មើ ១-១ ជាមួយ​នឹង​ក្រុម Tottenham Hotspur (Spurs)​។

ការរបូត​ពិន្ទុ​របស់​ក្រុម Spurs ក៏​បណ្ដោយ​ឱ្យ​ក្រុម​កាំភ្លើង​ធំ Arsenal បើក​ការ​នាំ​មុខ​កាន់​តែ​ទូលាយ​ដល់​ទៅ ៤ ក្នុង​ការ​ប្រកួត​ប្រជែង​តំណែងលេខ ៤ ដើម្បី​ដណ្ដើម​​សិទ្ធិ​ទៅ​លេង Champions League រដូវកាល​ក្រោយ។ នៅ​ឯ​បាត​តារាង​ឯនោះ​វិញ នេះ​គឺ​ជា​ចុង​សប្ដាហ៍​របស់​ក្រុម Everton ដោយសារ​​ពួកគេ ទទួល​បាន​ជ័យជម្នះ​ដ៏​កម្រ នៅ​ផ្ទះ​របស់​ក្រុម Leicester ខណៈ​ដែល​ក្រុម Burnley និង Leeds សុទ្ធ​តែ​ចាញ់​ដូចគ្នា​។

យ៉ាង​ណា​ក្ដី AFP ផ្នែក​កីឡា សម្លឹង​ឃើញ ៣ចំណុច​គួរ​ឱ្យ​ចាប់​អាម្មណ៍ ពីការ​ប្រកួត​ នៅ​ Premier League នា​ចុង​សប្ដាហ៍​កន្លង​មក​នេះ​។

-ពាន​របស់​ក្រុម Man City នឹងមិន​អាច​ដណ្ដើម​បាន​

ក្រុម Man City អាច​នឹង​បាន​គ្រវែង​កៅអី ក្នុង​វគ្គ​ផ្តាច់ព្រ័ត្រ នៅ Champions League ចោល ដោយ​បាន​បណ្ដោយ​ឱ្យ​ការ​នាំ​មុខ ២​​គ្រាប់ ​លើ​ក្រុម​ Real Madrid រលាយ​បាត់​យ៉ាង​គួរ​ឱ្យ​សោក​ស្ដាយ កាល​ពី​ពាក់​កណ្តាល​សប្តាហ៍ តែ​ពួក​គេ កំពុង​បដិសេធ​ ក្នុងការ​ព្រលែង​ពាន​រង្វាន់ នៅ Premier League របស់​ពួក​គេ​ឱ្យ​របូត​ចេញ​ពី​ដៃ​។

ក្រុម Liverpool អាច​យក​បាន​ដល់​ទៅ ៤០​ពិន្ទុ ពីការ​ប្រកួត​​ ដែល​អាច​បាន ៤២​ពិន្ទុ នៅ Premier League មុននឹង​ត្រូវ​បាន​ទប់​ស្មើ​ដោយ​ក្រុម Spurs នេះ តែ​យ៉ាងណា ពួក​គេ នៅ​មិន​ទាន់ជា​បង្ហាញ​នូវ​ការ​ធ្លាក់​ទម្រង់​លេង​នោះ​ឡើយ​។​

«​ប្រសិន​បើ​មនុស្ស​មួយ​ចំនួន បាន​សង្ស័យ​ពី​ពួកយើង បញ្ជាក់​ថា ពួក​គេ​មិន​ស្គាល់​ក្រុម​នេះ​ច្បាស់​នោះ​ទេ​»​។ នេះ​ជា​ការ​លើក​ឡើង​របស់​លោក Pep Guardiola ចំពោះ​ការ​តប​ត​របស់​ក្រុម Man City។

របៀប​នៃ​ការ​ទទួល​ជ័យជម្នះនេះ ក៏​បានធ្វើ​ឱ្យ​ក្រុម Man City មាន​ប្រៀប​លើ​គ្រាប់​បាល់​ចំណេញ​ផងដែរ ដោយ​ពេល​នេះ លើស​ក្រុម Liverpool ដល់​ទៅ ៤គ្រាប់ ដែល​មាន​ន័យ​ថា ពួកគេ​ប្រហែល​ជា​ត្រូវការ​តែ ៦ពិន្ទុ​ទៀត​ប៉ុណ្ណោះ ពី​ការ​ប្រកួត​ចុងក្រោយ​ចំនួន ៣​លើក​របស់​ខ្លួន ដើម្បី​ធា​នាការ​ឈ្នះ​ពានរង្វាន់​ជាលើក​ទី ៤ ក្នុង​រយៈពេល ៥ឆ្នាំ​។

Content image - Phnom Penh Post
Jamaal Lascelles របស់ Newcastle ព្យាយាម​រារាំង​ការស៊ុត​របស់ Raheem Sterling របស់ Man City​ អំឡុងការប្រកួត Premier League កាល​ពី​ថ្ងៃ​អាទិត្យ​។

-ក្រុម Man United រងការ​អាម៉ាស់​ទៀត​

ដោយក្រឡេក​មើល​ការភាព​ខ្ទេចខ្ទី នៃ​រដូវកាល​ដ៏​វែង​អន្លាយ​​របស់​ក្រុម​បិសាច​ក្រហម Manchester United បន្ទាប់​ពី​រង​ការ​អាម៉ាស់ ជាមួយ​នឹង​បរាជ័យ ៤-០ នៅ​ផ្ទះ​របស់​ក្រុម Brighton កីឡាករ Bruno Fernandes បាន​ទទួល​ស្គាល់​ថា ក្រុមដ៏​គួរ​ខ្មាសអៀន​របស់​ខ្លួន សម​នឹង​ទទួល​បាន​នូវ​ការ​ស្អប់​ខ្ពើម (មិន​ពេញចិត្តយ៉ាង​ខ្លាំង) ពី​អ្នក​គាំ​ទ្រ ដែល​ពេញ​ដោយ​ការ​ខឹង​សម្បា​ឥត​ឧបមា​។

ខ្សែបម្រើ Fernandes និង​ក្រុម​របស់​ខ្លួន ត្រូវ​បាន​បង្ខំ​ស៊ូទ្រាំ​នឹង​ការ​ស្រែក​ថា អ្នក​មិន​សម​នឹង​ពាក់​អាវនេះ និង​ការ​ប្រមាថ​មើលងាយ​ផ្សេងទៀត​ពី​អ្នកគាំទ្រ​របស់​ក្រុម Man United នៅ កីឡដ្ឋាន Amex កាលពី​ថ្ងៃ​សៅរ៍​។

ក្រុម​បិសាច​ក្រហម​របស់​លោក Ralf Rangnick ត្រូវ​បាន​ធានា​ថា នឹង​បញ្ចប់​រដូវកាល​ជាមួយ​នឹង​ពិន្ទុទាប​បំផុត​របស់ពួកគេ នៃ​យុគសម័យ​របស់ Premier League ហើយ​មិន​អាច​មាន​ឱកាស​ ក្នុង​ការ​ដណ្ដើម​​សិទ្ធិ សម្រាប់ទៅ​លេង​ នៅ Champions League ទៀត​ទេ​។ កីឡាករ Fernandes គឺ​ជា​ប្រធាន​ក្រុម​របស់ Man United សម្រាប់​ការ​បរាជ័យ​ដ៏​អាក្រក់​បំផុត​របស់​ពួកគេ ក្នុង​រដូវកាល​មួយ ដែល​ពោរពេញ​ទៅ​ដោយ​លទ្ធផល​ដ៏​អាម៉ាស់ ហើយ​រូប​គេ​មិន​បាន​លើក​ជា​លេស​អ្វីនោះ​ឡើយ សម្រាប់​បរាជ័យ​នេះរបស់​ពួកគេ​។

«​អ្វី ដែល​យើង​បាន​ធ្វើ​ថ្ងៃ​នេះ អ្វី ដែល​ខ្ញុំ​បាន​ធ្វើ​ថ្ងៃ​នេះ គឺ​មិន​ល្អ​​គ្រប់គ្រាន់​ ក្នុង​ការ​ពាក់​អាវ​របស់​ក្រុម​ Man United នោះ​ឡើយ ហើយ​ខ្ញុំ​ទទួល​យក​ការ​និយាយ​បែប​នេះ​។ អ្នក​គាំ​ទ្រ បាន​មើលឃើញ​នូវ​លទ្ធផល​​មិនល្អ​ជាច្រើន​ ក្នុង​ក្រុម​របស់​ពួក​គេ នា​រដូវកាល​នេះ។ ពួក​គេ​គាំទ្រ​ពួក​យើង​រហូត​ដល់​ទី​បញ្ចប់​ជាមួយ​នឹង​សំឡេង​ស្រែក​ខុស​ៗ​គ្នា​។ អ្វី​ក៏​ដោយ ដែល​ពួកគេ​ចង់​គិត គឺ​ជា​រឿង​ត្រឹម​ត្រូវ​សមរម្យ​ សម្រាប់​ពួកគេ​»​។ នេះ​ជាសម្ដី​របស់​កីឡាករ Fernandes​។

ការ​ដណ្ដើម​បាន​សិទ្ធិ​ទៅ​លេង​ នៅ​ក្រប​ខ័ណ្ឌ​ទី ២ របស់​អឺរ៉ុប Europa League គឺ​ជា​សមិទ្ធផល​ដ៏​ល្អ​បំផុត​របស់​ក្រុម​លេខ ៦ Man United អាចធ្វើ​បាន​ នៅ​មុន​ការ​មក​ដល់​របស់​អ្នក​ការ​ថ្មី លោក Erik ten Hag ដែល​ចែក​ផ្លូវ​ជាមួយ​ក្រុម Ajax នៅ​បញ្ចប់​រដូវកាល​នេះ​។

Content image - Phnom Penh Post
លោក Lampard សម្ដែង​ការ​រីក​រាយ​យ៉ាង​ខ្លាំង ក្រោយ Everton ឈ្នះ Leicester ២-១ អំឡុងការប្រកួត Premier League កាល​ពី​ថ្ងៃ​អាទិត្យ។

-ក្រុម Everton បញ្ចប់​ឧបសគ្គ​រា​រាំង​ផ្លូវ​របស់​ពួក​គេ

ក្រុម Everton ឈ្នះ​ការ​ប្រកួត​ក្រៅ​ផ្ទះលើក​ចុង​ក្រោយ នៅ Premier League គឺ​នៅ​ក្នុង​ខែ​សីហា ដែល​នៅ​ពេល​នោះ​លោក Rafael Benitez ចាប់​ផ្ដើម​ធ្វើ​តួនាទី​ដោយ​ជ័យ​ជម្នះ ដើម្បី​យក​ឈ្នះ​លើ​ការ​សង្ស័យ ចំពោះ​ការ​តាំង​តាំង​គាត់ តែ​រយៈ​ពេល ៩​ខែ ជាមួយអ្នក​ចាត់​ការ​សញ្ជាតិ​អេស្ប៉ាញ ​ដែល​គិត​ចាប់​តាំង​ពី​ត្រូវ​បាន​ដក​តំណែង​ជាយូរ​មក​ហើយ និងការ​ដណ្ដើម​បាន​ត្រឹម​តែ​ ២ពិន្ទុ ក្នុង​ដំណើរ​ផ្លូវ នៃ​ការ​លេង ១៤​ហ្គេម ទី​បំផុត​ ក្រុម​ស្ករតាំង​ម៉ែ បាន​យក​ឈ្នះ​ឧបសគ្គ​ ដែល​មក​រាំង​ផ្លូវ​ពួក​គេ មិន​ឱ្យ​ឡើង​ផុត​ពី​តំបន់​គ្រោះ​ថ្នាក់​។​​

ខ្សែការ​ពារ Vitalii Mykolenko និង Mason Holgate គឺ​ជាអ្នក​ស៊ុត​បញ្ចូល​ទី​ដ៏​មិន​គួរ​ឱ្យ​ជឿ​សោះ ក្នុង​ជ័យ​ជម្នះ ២-១ លើ​ក្រុម Leicester ដែល​លទ្ធផល​នេះ ​​ជួយ​ឱ្យ​ក្រុម​​ Everton ឥឡូវ​នេះ នាំ​មុខ ១ពិន្ទុ​លើ​ក្រុម នៅ​តំបន់​ត្រូវ​កាត់​ចោល ជាមួយ​នឹង​ការ​សល់ ១ហ្គេម ក្នុង​ដៃ​។

ក្រុម​ Everton របស់​លោក Frank Lampard ក៏​នឹង​មាន​ទំនុក​ចិត្ត​កាន់​តែ​ខ្ពស់​ផងដែរ ក្នុង​ការ​បន្លាយ​ការ​នាំ​មុខ​នោះ ជាមួយ​នឹង​ការ​ធ្វើ​ដំណើរ​ទៅ​សួរសុខទុក្ខ​ក្រុម​ដែល​​ធ្លាក់​រួច​ហើយ Watford នៅ​ពាក់​កណ្ដាល​សប្ដាហ៍​នេះ មុន​ពេល​បើក​ទ្វារ​របស់​កីឡដ្ឋាន Goodison Park​ស្វាគមន៍​ក្រុម Brentford និង Crystal Palace​៕ AFP/VN

អត្ថបទគួរចាប់អារម្មណ៍