.jpg)
លោកឧកញ៉ា ឬទ្ធី សំណាង ប្រធានក្លិបបាល់ទាត់ភ្នំពេញក្រោន បានទទួលអនិច្ចកម្ម នាថ្ងៃទី ១១ ខែឧសភានេះ។ រូបថត សហការី
ភ្នំពេញ៖ «យើងខ្ញុំទាំងអស់គ្នាជាថ្នាក់ដឹកនាំ ក្រុមការងារគ្រូបង្វឹក បុគ្គលិក ក៏ដូចជាកីឡាករ កីឡាការិនីទាំងអស់ នៃក្លិបបាល់ទាត់ភ្នំពេញក្រោន មានក្តីសោកសង្រេង ព្រមទាំងក្តីសោកស្តាយជាខ្លាំង ចំពោះមរណភាពរបស់ លោកឧកញ៉ា ឬទ្ធី សំណាង ប្រធានក្លិបបាល់ទាត់ភ្នំពេញក្រោន ដែលបានទទួលអនិច្ចកម្ម នាថ្ងៃទី ១១ ខែ ឧសភា ឆ្នាំ ២០២២ នេះ ដោយរោគាពាធ»។
នេះជាសេចក្តីប្រកាសដំណឹង របស់ក្លិបបាល់ទាត់ភ្នំពេញក្រោន កាលពីព្រឹកថ្ងៃពុធនេះ ហើយដំណឹងដ៏រន្ធត់ នៃកាស្លាប់របស់លោកឧកញ៉ា ឬទ្ធី សំណាង ដោយរោគាពាធ ក្នុងអាយុត្រឹម៤១ឆ្នាំ បានធ្វើឱ្យគ្រប់គ្នា នៅក្នុងវិស័យបាល់ទាត់កម្ពុជា ពិសេសក្រុមគ្រួសារបាល់ទាត់ភ្នំពេញក្រោន មានការសោកសង្វេគខ្លាំង ដែលបានបាត់បង់ថ្នាក់ដឹកនាំ និងជាមនុស្សម្នាក់ ដែលបានលះបង់យ៉ាងច្រើន ដើម្បីបណ្តុះបណ្តាលយុវជនថ្នាក់ថ្នាលជាច្រើននាក់ សម្រាប់ទ្រទ្រង់ដល់វិស័យបាល់ទាត់ នៅកម្ពុជា រូបនេះ។
សេចក្តីប្រកាសនេះ បានបន្តថា៖ «យើងខ្ញុំទាំងអស់គ្នា សូមចូលរួមរំលែកមរណទុក្ខដ៏សែនក្រៀមក្រំ និងសោកស្តាយអាឡោះអាល័យបំផុតជាមួយ លោកជំទាវ ភូ ឈាលីន និងក្រុមគ្រួសារនៃសព ដែលបានបាត់បង់ស្វាមី កូនប្រុស កូនប្រសារ និងឪពុក ដែលជាទីគោរពស្រឡាញ់បំផុត»។
ក្រុមគ្រួសារបាល់ទាត់ភ្នំពេញក្រោន បានបន្ថែមថា៖ «សម្រាប់គ្រប់ៗគ្នា នៅក្លិបភ្នំពេញក្រោន មរណភាពរបស់លោកឧកញ៉ា ឬទ្ធី សំណាង គឺជាការបាត់បង់ នូវឥស្សរជនមួយរូបដែលប្រកបដោយគុណធម៌ ព្រហ្មវិហាធម៌ ព្រមទាំងភាពជាអ្នកដឹកនាំ ដែលបានបន្សល់ទុកនូវស្នាដៃជាច្រើន ចំពោះសង្គមជាតិ ជាពិសេសការរួមចំណែកកសាងនូវសមិទ្ធផលជាបន្តបន្ទាប់ក្នុងវិស័យកីឡាបាល់ទាត់ជាតិ វិស័យអប់រំ និងមនុស្សធម៌ជាដើម ដែលលោកឧកញ៉ា តែងតែងចូលរួមយ៉ាងសកម្ម នាពេលកន្លងមក»។
«អស់រយៈកាលជាង ១០ឆ្នាំ ក្រោមការដឹកនាំរបស់ លោកឧកញ៉ា ឬទ្ធី សំណាង ភ្នំពេញក្រោន បានក្លាយជាគ្រួសារមួយរបស់លោក ហើយលោកតែងតែទូន្មាន និងចង្អុលបង្ហាញនូវមាគ៌ាល្អៗ ដល់យើងទាំងអស់គ្នា ជាមួយនិងទស្សនាទានថា យើងជាគ្រួសារតែមួយ ដែលមានគោលដៅដូចគ្នា ឆន្ទៈដូចគ្នា ហើយត្រូវតែរួមចិត្ត រួមកម្លាំងគ្នា ដើម្បីឈានទៅសម្រេចគោលដៅដែលយើងប្រាថ្នាចង់បាន»។
សេចក្តីប្រកាសរបស់ក្លិបភ្នំពេញក្រោន បានបញ្ជាក់ថា៖ «ក្នុងស្មារតីនេះ យើងខ្ញុំទាំងអស់គ្នា សូមប្តេជ្ញាថែរក្សានូវទស្សនវិស័យ និងបន្តវីរភាព ដែលលោកឧកញ៉ា ឬទ្ធី សំណាង សម្រេចបាន ចំពោះក្លិបបាល់ទាត់ភ្នំពេញក្រោន ជាទីដែលលោកបានចំណាយនូវកម្លាំងកាយចិត្ត រួមទាំងធនធានជាច្រើន ដើម្បីកសាងជាប្រយោជន៍ សម្រាប់វិស័យបាល់ទាត់ និងជាពិសេស សម្រាប់អ្នកគាំទ្រក្លិបភ្នំពេញក្រោន ជាទីស្រឡាញ់របស់លោក។ យើងខ្ញុំ សូមបួងសួងដល់ដួងវិញ្ញាណក្ខន្ធ លោកឧកញ៉ា ឬទ្ធី សំណាង សូមបានបដិសន្ធិក្នុងសុគតិភពកុំបីឃ្លៀងឃ្លាតឡើយ»៕
