ក្រុងប៊ើមិងហេម: លោក Jurgen Klopp បាននិយាយថា ក្រុមហង្សក្រហម Liverpool របស់លោក នៅតែដេញតាមដូចមនុស្សវក់ស្មារតី (មិនគិតអ្វីទាំងអស់) ពីក្រោយក្រុម Manchester City នៅទីកំពូលតារាងនៃក្របខ័ណ្ឌ Premier League បន្ទាប់ពីអាចវាយបកពីការនាំមុខ ១ គ្រាប់ រហូតយកឈ្នះក្រុម Aston Villa ២-១ កាលពីយប់ថ្ងៃអង្គារ។
បច្ចុប្បន្ន ក្រុមកំពូលតារាងទាំង ២ មាន ៨៦ ពិន្ទុស្មើគ្នា តែក្រុម Man City នៅតែឈរទី ១ ដោយសារមានគ្រាប់បាល់ចំណេញច្រើនជាង ហើយព្រមទាំងនៅសល់ ១ ហ្គេម ក្នុងដៃដែលត្រូវប៉ះជាមួយក្រុម Wolverhampton នាយប់ថ្ងៃពុធ។
Liverpool អាចនឹងមានការភ្លាត់ស្នៀត ១ ផ្សេងទៀត បន្ទាប់ពីត្រូវបានក្រុម Tottenham ទប់ស្មើ ១-១ ក្នុងទឹកដី កាលពីចុងសប្តាហ៍ ហើយបានចាប់ផ្តើម ដែលអាចអាក្រក់បំផុតនៅពេលដែលកីឡាករ Douglas Luiz បានស៊ុតបញ្ចូលទីឱ្យក្រុមម្ចាស់ផ្ទះ Villa នាំមុខ បន្ទាប់ពីហ្គេម ដំណើរការបាន ៣ នាទី។
តែខ្សែការពារ Joel Matip បានជួយឱ្យក្រុម Liverpool តាមស្មើវិញយ៉ាងលឿន ហើយការតែតយ៉ាងស្អាតរបស់ខ្សែប្រយុទ្ធ Sadio Mane នៅប្រមាណជា ២៥ នាទី មុនចប់ការប្រកួតបានស្រោចស្រង់ក្រុមហង្សក្រហមឱ្យនៅតែមានសិទ្ធិក្នុងការតាមប្រដេញ ចំពោះការឈ្នះពានរង្វាន់ ៤ ជាប្រវត្តិសាស្ត្រដដែល។
«យើងនៅតែតាមប្រដេញ ដូចមនុស្សវក់ស្មារតី។ យើងត្រឹមតែដឹងថា យើងត្រូវតែឈ្នះ រឿងនោះមិនផ្លាស់ប្ដូរជាដាច់ខាត ហើយឥឡូវនេះ យើងត្រូវប្រសើរជាងនេះ ដើម្បីប្រកួតនៅវគ្គផ្ដាច់ព្រ័ត្រក្នុងកម្មវិធី FA Cup។ គ្មានត្រាប្រណីអ្វីទាំងអស់»។ លោក Klopp លើកឡើង។
យ៉ាងណាក្ដី ជ័យជម្នះបានកើតឡើង ជាមួយនឹងការខាតបង់នៅពេលខ្សែបម្រើ Fabinho ដើរខ្ញើចៗចេញពីទីលាន ដោយសាររបួសសាច់ដុំ ដែលធ្វើឱ្យមានការសង្ស័យយ៉ាងខ្លាំង ចំពោះរូបគេសម្រាប់ការប្រកួតក្នុងវគ្គផ្តាច់ព្រ័ត្រនៅ FA Cup ជាមួយក្រុម Chelsea នាថ្ងៃសៅរ៍ និងនៅក្របខ័ណ្ឌ Champions League ទល់នឹងក្រុម Real Madrid នៅថ្ងៃទី ២៨ ខែឧសភា។
ពាក់ព័ន្ធនឹងរបួសរបស់ Fabinho លោក Klopp ប្រាប់ថា៖ «រូបគេមានអារម្មណ៍ថា មានបញ្ហាសាច់ដុំ តែមិនធ្ងន់ពេកនោះទេ។ រូបគេមានទំនុកចិត្តគួរសម តែខ្ញុំមិនប្រាកដពីអ្វីដែលខ្ញុំអាចដោះស្រាយចំពោះបញ្ហានេះបានយ៉ាងម៉េចទេ និយាយដោយត្រង់»៕ AFP/VN
