The Phnom Penh Post Search

Search form




Logo of Phnom Penh Post newspaper Phnom Penh Post - សិង្ហបុរី បាន​បង្អាក់​ដំណើរ​ឆ្ពោះ​ទៅ​មុខ​របស់​ក្រុម​គោព្រៃ​កម្ពុជា

សិង្ហបុរី បាន​បង្អាក់​ដំណើរ​ឆ្ពោះ​ទៅ​មុខ​របស់​ក្រុម​គោព្រៃ​កម្ពុជា

Content image - Phnom Penh Post
ខ្សែ​ប្រយុទ្ធរបស់​សិង្ហបុរី Saifullah ពេលតែត​បាល់បញ្ចូល​ទី​ទៅលើ​ក្រុម​កម្ពុជា កាលពី​ថ្ងៃ​ពុធ។ រូប CAMSOC

សិង្ហបុរី បាន​បង្អាក់​ដំណើរ​ឆ្ពោះ​ទៅ​មុខ​របស់​ក្រុម​គោព្រៃ​កម្ពុជា

ភ្នំពេញៈ ​ដំណើរ​ឆ្ពោះ​ទៅ​មុខ​ប្រកប​ដោយ​ភាព​ជឿជាក់​របស់​​​ក្រុម​កម្ពុជា​អាយុ​ក្រោម​ ២៣ ​ឆ្នាំ ត្រូវ​បាន​បង្អាក់​ ដោយ​ក្រុម​​ជម្រើស​ជាតិ​សិង្ហបុរី ខណៈ​​ក្រុម​ទើប​ចាញ់​ ២​ ប្រកួត​ជាប់ៗ​គ្នា​មួយ​នេះ បាន​ប្រើ​យុទ្ធសាស្រ្ត​​ការពារ​ បែប​ដាក់​ឡាន​ក្រុង​នៅ​មុខ​ទី ដើម្បី​រក្សា​ការ​នាំ​មុខ​​ក្រុម​កម្ពុជា ១-០ រហូត​ដល់​ចប់​ ៩០ ​នាទី​ពេញ​នោះ។

សម្រាប់​ការ​ប្រកួត​ជម្រុះ​ប្រចាំ​ពូល​B កាល​ពី​ថ្ងៃ​ពុធ​ម្សិលមិញ ក្រុម​គោ​ព្រៃ​ជំទង់​កម្ពុជា​បាន​ធ្វើ​ការ​ដាក់​សម្ពាធ​ទៅ​​លើ​ក្រុម​សិង្ហបុរី​ភ្លាមៗ ព្រោះ​ពួក​គេ​ចង់​បង្កើត​ភាព​ភ្ញាក់​ផ្អើល​តាមរយៈ​ការ​រក​គ្រាប់បាល់​ឱ្យ​បាន​លឿន ដូច​ពេល​យក​ឈ្នះ​ក្រុម​ឡាវ ៤-១ កាល​​ពី​ថ្ងៃ​ចន្ទ ប៉ុន្តែ​ភាព​រីករាយ​សម្រាប់​ក្រុម ដែល​ប្រើ​កីឡាករ​អាយុ​ក្រោម​ ២៣ ​ឆ្នាំ​ សុទ្ធសាធ​មួយ​នេះ មិន​បាន​កើត​មាន​នោះ​ទេ ព្រោះ​ក្រុម​សិង្ហបុរី បាន​ប្រើ​ទម្រង់​លេង​បិទ ដើម្បី​រារាំង​សម្ទុះ​ការ​វាយ​សម្រុក​នេះ​បាន។

ជាមួយ​គ្នា​នេះ ការ​ធ្វើ​ការ​វាយ​បក​លឿន​របស់​សិង្ហបុរី​បាន​​ធ្វើ​ឱ្យ​កម្ពុជា មាន​ការ​បារម្ភ​​​ផង​ដែរ ហើយ​​ការ​ស៊ុតបាល់​ឡង​ពី​ដៃ​ អ្នក​ចាំ​ទី ហ៊ុល គីមហ៊ុយ យ៉ាង​កៀក​បំផុត​របស់​កីឡាករ​សិង្ហបុរី Nicky បាន​​ធ្វើ​ឱ្យ​អ្នក​ទស្សនា​បុក​ពោះ​គ្រប់ៗ​គ្នា ប៉ុន្តែ​ការ​ស៊ុត​នោះ ខុស​គោល​ដៅ។

យ៉ាង​ណា​ក៏​ដោយ ក្រុម​កម្ពុជា​នៅ​តែ​បង្កើត​ឱកាស​បាន​ច្រើន​ជាង​​សិង្ហបុរី ហើយ​ការ​អូស​បាល់​រំលង​ខ្សែ​ការពារ​ទាំង​ ៣ ​នាក់ ពី​សំណាក់​ខ្សែ​ប្រយុទ្ធ​ជា​ប្រធាន​ក្រុម សៀង ចន្ធា គួរ​ណាស់​តែ​អាច​រក​បាន​គ្រាប់​បាល់​នាំ​មុខ​ឱ្យ​កម្ពុជា​នៅ​នាទីទី​២៤ ប៉ុន្តែ ចន្ធា មិន​អាច​ឆ្កឹះ​​បាល់​យ៉ាង​កៀក​នោះ ផុត​​ពី​ការ​ចេញ​មក​សង្គ្រោះ​របស់​អ្នក​ចាំទី​ក្រុម​សិង្ហបុរី Zaiful បាន​នោះ​ទេ​។

នៅ​ក្រោយ​ការ​ខក​ឱកាស​នេះ ការ​វា​យក​បក​លឿនៗ​របស់​ក្រុម​សិង្ហបុរី ជា​ពិសេស​ការ​លើក​បាល់​យ៉ាង​ល្អ​របស់​ខ្សែ​ប្រយុទ្ធ Shah បាន​ផ្តល់​ឱកាស​ឱ្យ​កីឡាករ​លេខ​ ១០ Saifullanh ដែល​ឈរ​ចាំ​នៅមុខ​ទី​ស្រាប់​នោះ លោត​តែត​បញ្ចូល​ទី​បាន​យ៉ាង​ល្អ ដើម្បី​ជួយ​ឱ្យ​ក្រុម​​សិង្ហបុរី​នាំមុខ ១-០ នៅ​នាទីទី២៦ ហើយ​នៅ​នាទីទី​៤៩ ញាណ សុស៊ីដាន បាន​ស៊ុត​យ៉ាង​ពេញ​ជើង ប៉ុន្តែ​បាល់​នោះ បែរ​ជា​ហោះ​ទៅ​ប៉ះ​បង្គោល​ទី​ដ៏​គួរ​ឱ្យ​សោកស្តាយ​បំផុត។​​

ចូល​ដល់​តង់ទី​២ ​ក្រុម​កម្ពុជា​ក្រោម​ការ​​ដឹកនាំ​ផ្ទាល់​របស់​លោក Keisuke Honda បាន​​ធ្វើ​ការ​​ផ្លាស់ប្តូរ​សមាសភាព​នៅ​តំបន់​ប្រយុទ្ធ​ភាគ​ច្រើន ដោយ​ក្នុង​នោះ​ខ្សែ​ប្រយុទ្ធ សារ ទី, ម៉ៅ ពិសិដ្ឋ, មិន រតនៈ, គី រីណា និង វ៉ាំង ដាវីន សុទ្ធ​តែ​ត្រូវ​បាន​​ដាក់​ឱ្យ​លេង​ជាបន្ត​បន្ទាប់​គ្នា ហើយ​កម្លាំង​ថ្មី​នេះ បាន​រួម​សហការ​គ្នា​វាយ​សម្រុក​ទៅ​លើ​ក្រុម​សិង្ហបុរី​យ៉ាង​ខ្លាំង។

នៅ​ក្នុង​រយៈពេល​​ ៤៥ នាទី ក្នុង​តង់​ទី​២ នេះ សិង្ហបុរី​បាន​បាល់​ដាច់​តែ​ម្តង​​ទេ គឺ​នៅ​ពេល​ខ្សែ​ប្រយុទ្ធ Ryhan បាន​បាល់​កាត់​ពី​មុខ​អ្នក​ចាំទី គីមហ៊ុយ ទៅ​ឱ្យ Khairin នៅនាទី​៧៥ ប៉ុន្តែ​កីឡាករ​​ទើប​ដាក់​ឱ្យ​ចូល​លេង​រូប​នេះ ស៊ុត​បាល់​ដាច់​ម៉ាត់ ប្រហែល​ ២ ម៉ែត្រ ពី​ទី​នោះ​មិន​ចូល។

យ៉ាង​ណា​មិញ នៅ​ក្នុង​តង់​ទី២ ​នេះ ក្រុម​កម្ពុជា​បាន​វាយ​សម្រុក​​ទៅ​លើ​តំបន់​ការពារ​របស់​សិង្ហបុរី​យ៉ាង​ខ្លាំង ហើយ​​ក៏​បាន​បង្កើត​ឱកាស​ច្រើន​ដែរ បើ​ទោះបី​ជា សិង្ហបុរី​បាន​ប្រើ​យុទ្ធសាស្ត្រ​ដាក់​ឡាន​ក្រុង​ការពារ​​នៅ​មុខ​ទី​ក៏​ដោយ ប៉ុន្តែ​​រឿង​ដែល​គួរ​សោកស្តាយ​បំផុត​នោះ គឺ​ទាំង​ខ្សែ​ការពារ ជួន ចាន់ចាវ និង ម៉ៅ ពិសិដ្ឋ សុទ្ធតែ​បាន​តែត និង​ស៊ុត​​បាល់​​ទៅ​ប៉ះ​បង្គោល និង​របារទី ខណៈ​ការ​ស៊ុត​ច្រើន​គ្រាប់​ទៀត ពិសេស​ការ​ស៊ុត​ពេញ​ជើង​យ៉ាង​កៀក​​របស់ សារ ទី ត្រូវ​បាន​ជួយ​សង្គ្រោះ​ដោយ​អ្នក​ចាំទី​សិង្ហបុរី។

តាម​រយៈការ​ចាញ់​ក្រុម​សិង្ហបុរី ១-០ ​ដ៏​គួរ​ឱ្យ​សោកស្តាយ​នេះ បាន​ធ្វើ​ឱ្យ​កម្ពុជា កាន់​តែ​មាន​សម្ពាធ​ក្នុង​ការ​ប្រជែង​ស្វែងរក​ឱកាស​ឡើង​ទៅ​វគ្គ​បន្ត ព្រោះ ២ ​ប្រកួត ដែល​នៅ​សល់ ពួក​គេ​ត្រូវ​ប្រឈម​ជាមួយ​ក្រុម​ខ្លាំង ថៃ ដែល​ទើប​លត់ សិង្ហបុរី ៥-០ និង ម៉ាឡេស៊ី ដែល​បាន​យក​ឈ្នះ​ក្រុម​ថៃ ២-១៕

អត្ថបទគួរចាប់អារម្មណ៍