ក្រុងប៉ារីស: សហព័ន្ធបាល់ទាត់ពិភពលោក (FIFA) បានចាប់ផ្តើមដំណើរការនីតិវិធីផ្នែកវិន័យ បន្ទាប់ពីប្រទេសអេក្វាឌ័រ ត្រូវបានចោទប្រកាន់ថា បានដាក់កីឡាករ ដែលមិនមានសិទ្ធិឱ្យលេង ក្នុងអំឡុងពេលយុទ្ធនាការជម្រុះដ៏ជោគជ័យរបស់ពួកគេ សម្រាប់ព្រឹត្តិការណ៍ World Cup នៅប្រទេសកាតា។
ក្រុមជម្រើសជាតិស៊ីលី ដែលបានបរាជ័យ ក្នុងការឡើងទៅចូលរួមប្រកួតប្រជែង នៅប្រទេសកាតា នាចុងឆ្នាំនេះ បានដាក់ពាក្យបណ្តឹងទៅស្ថាប័នគ្រប់គ្រងបាល់ទាត់ពិភពលោក ដោយចោទប្រកាន់ថា ខ្សែការពារស្លាប Byron Castillo មិនមែនជាជនជាតិអេក្វាទ័រ និងកើតនៅប្រទេសកូឡុំប៊ី។
សហព័ន្ធបាល់ទាត់ នៃប្រទេសស៊ីលី បានចោទប្រកាន់ពីការប្រើប្រាស់សំបុត្រកំណើតក្លែងក្លាយ និងការប្រកាសពីអាយុ និងសញ្ជាតិក្លែងក្លាយ។
កីឡាករ Castillo វ័យ ២៣ ឆ្នាំ បានលេង ក្នុងវគ្គជម្រុះចំនួន ៨ ហ្គេម ក្នុងនោះរួមទាំងការប្រកួតរបស់ក្រុមអេក្វាទ័រទាំង ២ លើក ជាមួយនឹងក្រុមស៊ីលី ដោយលើកដំបូង ស្មើគ្នា ០-០ នៅទីក្រុងគីតូ កាលពីខែកញ្ញា ឆ្នាំ ២០២១ និងលើកទី ២ នា ២ ខែក្រោយមក អេក្វាទ័រ ឈ្នះ ២-០ ក្នុងទីក្រុងសាន់ត្យាហ្គោ។
ប្រសិនបើ FIFA សម្រេចថា ក្រុមអេក្វាទ័រពិតជាមានកំហុស ការប្រកួតទាំងនោះ អាចនឹងត្រូវចាត់ទុកជាមោឃ ដែលអនុញ្ញាតឱ្យក្រុមស៊ីលីហក់ឡើងទៅឈរ ក្នុងចំណាត់ថ្នាក់ ១ចុងក្រោយ ក្នុងការបានសិទ្ធិ សម្រាប់ព្រឹត្តិការណ៍ នៅប្រទេសកាតា ឆ្នាំ ២០២២។
ក្រុមស៊ីលី បានបញ្ចប់ក្នុងចំណាត់ថ្នាក់លេខ ៧ ក្នុងតារាងពិន្ទុ នៅជម្រុះ World Cup សម្រាប់តំបន់អាមេរិកឡាទីន (អាមេរិកខាងត្បូង) ដោយមានគម្លាត ៧ ពិន្ទុ ពីក្រោយក្រុមអេក្វាទ័រ ដែលឈរនៅលេខ ៤ ពោលគឺជាចំណាត់ថ្នាក់ចុងក្រោយ ក្នុងការបានសិទ្ធិស្វ័យប្រវត្តិ សម្រាប់ការហោះហើរទៅកាតា។
ជាមួយគ្នានេះ ក្រុមស៊ីលី មាន ៥ពិន្ទុ តាមពីក្រោយក្រុមលេខ ៤ ប៉េរូ ដែលឥឡូវនេះ ត្រូវប្រឈមមុខនឹងការប្រកួតជម្រុះចាញ់ធ្លាក់អន្តរទ្វីប ទល់នឹងក្រុមដែលឈ្នះ រវាងក្រុមអូស្ត្រាលី និងអេមីរ៉ាតអារ៉ាប់រួម ដើម្បីដណ្ដើមកៅអី នៅជុំចុងក្រោយ នៃព្រឹត្តិការណ៍ World Cup។
«FIFA បានសម្រេចបើកដំណើរការនីតិវិធីផ្នែកវិន័យ ពាក់ព័ន្ធនឹងការមិនមានសិទ្ធិគ្រប់គ្រាន់ ដែលអាចនឹងទំនងជាបែបហ្នឹងរបស់កីឡាករ Byron David Castillo Segura»។ នេះជាការឱ្យដឹងរបស់ស្ថាប័នគ្រប់គ្រងអន្តរជាតិ ក្នុងសេចក្ដីប្រកាសរបស់ខ្លួន។
សហព័ន្ធបាល់ទាត់របស់អេក្វាទ័រ បានឱ្យដឹងថា កីឡាករ Castillo ត្រូវបានចុះឈ្មោះយ៉ាងត្រឹមត្រូវជាមួយអាជ្ញាធរផ្នែកច្បាប់ និងមានឯកសារប្រចាំជាតិ ដែលមានភាពត្រឹមត្រូវស្របច្បាប់ទាំងអស់៕ AFP/VN
