The Phnom Penh Post Search

Search form




Logo of Phnom Penh Post newspaper Phnom Penh Post - Inter ជូន​ដំណើរ Juve ហើយ​លើក​ពាន Italian Cup ក្រោយតម៉ោង​ពិសេស

Inter ជូន​ដំណើរ Juve ហើយ​លើក​ពាន Italian Cup ក្រោយតម៉ោង​ពិសេស

Content image - Phnom Penh Post
Perisic ស៊ុត​បាល់​ប៉េណាល់​ទី​សម្រេចឱ្យ Inter នាំ​មុខ Juve ៣-២ អំឡុងការប្រកួត Italian Cup ក្នុងវគ្គ​ផ្ដាច់​ព្រ័ត្រ កាលពីថ្ងៃពុធ​។

Inter ជូន​ដំណើរ Juve ហើយ​លើក​ពាន Italian Cup ក្រោយតម៉ោង​ពិសេស

ក្រុងរ៉ូម​: ក្រុម Inter Milan បាន​ឈ្នះ​ពាន ក្នុង​កម្មវិធី Italian Cup ជា​លើក​ទី៨​ កាល​ពី​ថ្ងៃ​ពុធ បន្ទាប់​ពី​មាន​ជ័យជម្នះ​លើ​ក្រុម​គូ​ប្រជែង​ចាស់ Juventus ក្នុង​​ម៉ោង​បន្ថែម​ពិសេស ៤-២ ខណៈ​ដែល​ការ​ប្រកួត​នេះ ​ពេញ​ទៅ​ដោយ​ការ​ប៉ះ​ទង្គិច​គ្នា និង​ភាព​ចម្រូង​ចម្រាស​។

ខ្សែបម្រើ​ប្រយុទ្ធ Ivan Perisic ជួយ​ឱ្យ​ក្រុម​ដណ្ដើម​បាន​នូវ​ជ័យជម្នះដ៏​គួរ​ឱ្យ​រំភើប ជាមួយ​នឹង​ការស៊ុត​បញ្ចូល​ទី ២គ្រាប់​ផ្ទួនៗ ក្នុង​រយៈ​ពេល​ប្រមាណ​ជា ៣​នាទី នៃ​វគ្គ​ទី១ ក្នុង​ម៉ោង​បន្ថែម​ពិសេស តែ​ការ​ប្រកួត​នេះ បាន​ចង​ភ្ជាប់​តែ​ជាមួយ​នឹង​ការ​ផ្ដល់​បាល់​ពិន័យ ១១ ម៉ែត្រ ដែល​មើល​ទៅ​ហាក់​ដូចជាមិន​​ធ្ងន់​ធ្ងរ ដោយ​​បង្ខំ​ឱ្យ​ហ្គេម​ត្រូវ​លេង​លើស​ពី ៩០ នាទី បន្ទាប់​ពី​ខ្សែ​បម្រើ Hakan Calhanoglu ទម្លុះ​សំណាញ់​ទី​ជាមួយ​ការទាត់​បាល់​ប៉េណាល់​ទី​លើកទី១ សម្រេច​។

យ៉ាង​ណា​ក្ដី ក្រុម Juve សម​នឹង​បានគ្រាប់​បាល់​នាំមុខ​ពិត​មែន តាម​រយៈ​ការស៊ុត​បញ្ចូលទី​យ៉ាង​លឿន​ពី​កីឡាករ Alex Sandro និង Dusan Vlahovic នៅ​ដើម​វគ្គ​ទី ២ នៃ​ម៉ោង​ធម្មតា ហើយ​ការ​សម្រេច​ចិត្ត​របស់​អាជ្ញា​កណ្តាល លោក Paolo Valeri ក្នុង​ការ​ផ្ដល់​បាល់​ពិន័យ ១១ម៉ែត្រ បន្ទាប់​ពី Lautaro Martinez បាន​ដួល​ ក្រោយ​មាន​ការ​ប៉ះ​បន្តិច​បន្តួច​ពី​ខ្សែ​ការពារ Leonardo Bonucci ​បណ្ដាល​ឱ្យ​ក្រុម​របស់​លោក Massimiliano Allegri ខឹង​សម្បា​។

«​ខ្ញុំ​តែង​តែ​គិត​ថា យើង​អាច​ធ្វើ​បាន​ជានិច្ច ទោះ​បី​ជា​នៅ​ពេល​ដែល​​យើង តាម​ពី​ក្រោយ ២-១​។ យើង​បាន​បាត់​បង់​ការ​គ្រប់​គ្រង​បន្តិច រយៈ​ពេល ១០ ឬ​ក៏ ១៥​ នាទី តែ​យើង​បាន​វាយ​បក​វិញ ហើយ​ខ្ញុំ​គិត​ថា យើង​ពិត​ជា​សម​នឹង​ទទួល​បាន​ជ័យជម្នះ​»។ នេះ​ជា​សម្ដី​របស់​កីឡាករ Perisic ដែល​បាន​​និយាយ​ទៅ​កាន់​ប្រព័ន្ធ​ផ្សព្វ​ផ្សាយ​ព័ត៌មាន Mediaset​។​​

សម្រាប់​ក្រុម Inter វា​គឺ​ជា​ជោគជ័យ​ម្ដង​ទៀត លើ​ក្រុម Juve បន្ទាប់​ពី​ការ​ឈ្នះ​ដ៏​ចម្រូង​ចម្រាស ១ផ្សេងទៀត នៅទីក្រុង​ទូរីន កាល​ពី​ខែ​មុន បាន​​នាំឱ្យ​ពួកគេ​លើក​ពាន ក្នុង​កម្មវិធី Italian Super Cup កាល​ពី​ដើម​រដូវកាល​នេះ ហើយ​គឺ​ជា​ជ័យ​ជម្នះ ដែល​នឹង​ជួយ​ជំរុញ​ពួកគេ​ឱ្យមាន​ភាព​រឹង​មាំ ក្នុង​ការ​ការពារ​តំណែង​ជើង​ឯក នៅ​ក្របខ័ណ្ឌ Serie A របស់​ពួកគេ​។

Content image - Phnom Penh Post
កីឡាករ​របស់ Inter នាំ​គ្នា​អបអរ​លើក​ពាន​របស់​កម្មវិធី Italian Cup ក្រោយ​ឈ្នះ Juve ក្នុង​វគ្គ​ផ្ដាច់ព្រ័ត្រ កាល​ពី​ថ្ងៃ​ពុធ​។

ក្រុម Inter របស់​លោក Simone Inzaghi តាម​ពី​ក្រោយ​ក្រុម AC Milan ចំនួន ២​ពិន្ទុ ហើយ​អាច​នឹង​ប្រគល់​ពាន​ Scudetto (Serie A) ឱ្យ​ទៅ​ក្រុម​គូ​ប្រជែង​រួម​ក្រុង​ភ្លាម​ ប្រសិន​បើ​មិនអាច​យក​ឈ្នះ​ក្រុម Cagliari ដែល​កំពុង​ត្រូវ​បាន​គំរាម​កំហែង​ដោយ​ការ​កាត់​ចោល នៅ​ថ្ងៃ​អាទិត្យ​នេះ​ទេ​នោះ​។

ទន្ទឹម​នឹង​នោះ ក្រុម Juve មាន​តែ​ការ​ដណ្ដើម​យក​សិទ្ធិ​ទៅ​លេង ក្នុងវគ្គជម្រុះ នៅ​ក្របខ័ណ្ឌ Champions League ប៉ុណ្ណោះ ដើម្បី​ធ្វើ​ការ​សម្ងែង សម្រាប់​រដូវ​កាល​ឡើង​ចុះ​របស់​ពួក​គេ​តែ​​ពួកគេ បាន​ជ្រើស​រើស ក្នុង​ការ​មិន​និយាយ​អ្វី​ទាំង​អស់ ពាក់​ព័ន្ធ​នឹង​ការ​សម្រេច​ផ្ដល់​បាល់​ពិន័យ ១១ ម៉ែត្រ ដែល​ធ្វើ​ពួកគេ​មិន​បាន​ឈ្នះ​ពានរង្វាន់។

គ្រូបង្វឹក​របស់​ក្រុម​ Juve លោក Massimiliano Allegri បាន​លើក​ឡើង​ថា​៖ «​ក្រុម Inter កំពុង​ប្រជែង​ដណ្តើម​ពាន​លីគ ហើយ​យើង​កំពុង​តាម​ពីក្រោយពួកគេ។ យើង​ត្រូវ​បិទ​គម្លាត​នោះ ដោយ​ការ​ខិត​ខំ​ប្រឹង​ប្រែង និង​សម្លឹង​ដល់​ការ​រៀប​ចំ​ក្រុម​ឱ្យ​មាន​របៀប​រៀប​រយ​»​។

សម្រាប់​ការ​ប្រកួត​ ក្នុង​វគ្គ​ផ្ដាច់​ព្រ័ត្រ​នេះ ក្នុង​ម៉ោង​ធម្មតា ៩០​នាទី ក្រុម Inter គឺ​ជា​អ្នក​នាំ​មុខ​មុន នៅ​ប្រមាណ​ជា ៧​ នាទី ដោយ​កីឡាករ Nicolo Barella មុន​ពេល​ក្រុម​ Juve តាម​ស្មើ នៅ​នាទីទី​៥០ និង​នាំ​មុខ​វិញ​ម្ដង នៅ​នាទីទី​៥២ ហើយ​ក្រុម​ទាំង ២ ស្មើ​គ្នា ២-២ នៅ​នាទីទី​៨០ ដែល​គ្រាប់បាល់នោះ បាន​មក​ពី​ការ​ទាត់​បាល់​ប៉េណាល់​ទី​ ក្រោម​ការ​តវ៉ា​របស់​ក្រុម​សេះបង្កង់​៕ AFP/VN

អត្ថបទគួរចាប់អារម្មណ៍