The Phnom Penh Post Search

Search form




Logo of Phnom Penh Post newspaper Phnom Penh Post - ទោះ​ចាញ់​សិង្ហបុរី តែ​កម្ពុជា​ជឿជាក់​​អាច​បង្កើត​ការ​ភ្ញាក់​ផ្អើល ពេល​ជួប​ថៃ

ទោះ​ចាញ់​សិង្ហបុរី តែ​កម្ពុជា​ជឿជាក់​​អាច​បង្កើត​ការ​ភ្ញាក់​ផ្អើល ពេល​ជួប​ថៃ

Content image - Phnom Penh Post
ខ្សែ​ប្រយុទ្ធ សារ ទី បានព្យាយាមអូសបាល់រំលង​កីឡាកររបស់ឡាវ ពេល​ក្រុមកម្ពុជា ទទួលបានជ័យជម្នះ ៤-១ នៅថ្ងៃបើក​ឆាក។ រូបថត FFC

ទោះ​ចាញ់​សិង្ហបុរី តែ​កម្ពុជា​ជឿជាក់​​អាច​បង្កើត​ការ​ភ្ញាក់​ផ្អើល ពេល​ជួប​ថៃ

ភ្នំពេញៈ ​ក្រុម​ជម្រើស​ជាតិ​កម្ពុជា​អាយុ​ក្រោម ២៣ ​ឆ្នាំ នឹង​ត្រូវ​ធ្វើ​ការ​ប្រកួត​ជាមួយ​ក្រុម​ថៃ​នៅ​យប់​ម៉ោង ​៧ ថ្ងៃ​សៅរ៍​នេះ ហើយ​នេះ​ក៏​ជា​ការ​ប្រកួត​កំណត់​ជោគ​វាសនា​របស់​​ក្រុម​ទាំង​ ២​ ផង​ដែរ ថា​តើ​​ក្រុម​ណា​អាច​ដណ្តើម​បាន​ ៣ ពិន្ទុ​បន្ថែម ដើម្បី​បង្កើត​ឱ្យ​មាន​​ឱកាស​ឡើង​វិញ ក្នុង​ការ​ប្រជែង​ទៅ​វគ្គ​​ពាក់​កណ្តាល​ផ្តាច់ព្រ័ត្រ ហើយ​ក្រុម​ណា​ត្រូវ​បាត់បង់​ឱកាស។

តាមរយៈ​ការ​ប្រកួត​ ២ លើក​កន្លង​មក​នេះ ក្រុម​ជម្រើស​ជាតិ​ថៃ និង​កម្ពុជា បាន​បញ្ចប់​ការ​ប្រកួត​ដោយ​ឈ្នះ​ ១ ចាញ់​ ១ ​លើក និង​មាន​ ៣ ពិន្ទុ​ដូច​គ្នា ដោយ​ក្នុង​នោះ ថៃ បាន​ចាញ់​ក្រុម​ម៉ាឡេស៊ី ២-១ តែ​បាន​ឈ្នះ​ក្រុម​សិង្ហបុរី​ដល់​ ៥-០ ចំណែក​កម្ពុជា​បាន​ឈ្នះ​ក្រុម​ឡាវ ៤-១ តែ​មក​ចាញ់​ក្រុម​សិង្ហបុរី ១-០ វិញ យ៉ាង​ឈឺ​ចាប់​បំផុត កាល​ពី​យប់​ថ្ងៃ​ពុធ ហើយ​បើ​ប្រៀប​ធៀប​ទៅ​លើ​ការ​ជួប​ក្រុម​សិង្ហបុរី​ដូច​គ្នា គឺ​ត្រូវ​បាន​គេ​មើល​ឃើញ​ថា កម្រិត​លេង​របស់​កម្ពុជា​នៅ​ទាប​ជាង​ក្រុម​ថៃ។

តែ​ទោះបី​ជា​យ៉ាង​ណា គ្រូ​បង្វឹក​​ក្រុម​ជម្រើស​ជាតិ​កម្ពុជា លោក Ryu Hirose មិន​បាន​គិត​ថា ការ​ជួប​ក្រុម​ថៃ​នៅ​ថ្ងៃ​សៅរ៍​នេះ កម្ពុជា​នឹង​ជួប​សំណាង​អាក្រក់​ទៀត​នោះ​ទេ ដោយ​លោក​បាន​លើក​​ឡើង​ថា ការ​ជួប​ក្រុម​សិង្ហបុរី​កន្លង​មក​នេះ កម្ពុជា​មាន​ឱកាស​ជាច្រើន ប៉ុន្តែ​ពួក​គេ​មិន​អាច​ទាញ​យក​ប្រយោជន៍​ពី​ឱកាស​ទាំង​នោះ​បាន ខណៈ​ស្ថានភាព​ខ្លះ យើង​អាច​ស៊ុត​បញ្ជូល​​ទី​បាន​នោះ ហើយ​នេះ​ពិត​ជា​សំណាង​អាក្រក់​សម្រាប់​ក្រុម​កម្ពុជា ដែល​រឿង​នេះ​បាន​កើត​មាន​ឡើង។

ក្នុង​សន្និសីទ​កាសែត ក្រោយ​​​ការ​ប្រកួត​ជាមួយ​សិង្ហបុរី កាល​ពី​យប់​ថ្ងៃ​ពុធ​នោះ បុរស​​ជនជាតិ​ជប៉ុន លោក Ryu Hirose បាន​និយាយ​ផ្តោត​ទៅ​ដល់​ការ​ជួប​ក្រុម​ថៃ​ថ្ងៃ​សៅរ៍​ថា៖ «យើង​នៅ​សល់ ២ ប្រកួត​ទៀត ហើយ​ជា​ពិសេស​ការ​ប្រកួត​ជាមួយ​ក្រុម​ U23 ថៃ នា​ពេល​ឆាប់ៗ​នេះ។ យើង​ទើប​​ទទួល​​បាន​​មេរៀន​​បន្ថែម​​ទៀត ហើយ​យើង​​នឹង​​លេង​ដោយ​ភាព​ល្អ​ឥត​ខ្ចោះ។ វា​នឹង​ក្លាយ​ជា​ការ​​ប្រកួត​ដែល​សន្យា​ថា នឹង​មាន​ការ​ភ្ញាក់​ផ្អើល ហើយ​នឹង​អ្វី​ដែល​គួរ​ឱ្យ​ចាប់​អារម្មណ៍​ជា​ច្រើន​សម្រាប់​​ថ្ងៃ​​នោះ»។

ជាមួយ​គ្នា​នេះ លោក Ryu Hirose ក៏​សង្ឃឹម​ថា ក្រុម​គោព្រៃ​ជំទង់​កម្ពុជា​នឹង​អាច​កែ​ប្រែ​ចំណុច​ខ្វះខាត ពេល​ពួក​គេ​បាន​បង្កើត​មាន​ឡើង​ក្នុង​ការ​ប្រកួត​ចាញ់​​សិង្ហបុរី ១-០ ផង​ដែរ។ លោក​បាន​បញ្ជាក់​ថា៖ «ភាព​យល់​ចិត្ត​គ្នា​រវាង​ខ្សែ​ការពារ​របស់​ក្រុម​កម្ពុជា​ក្នុង​ការ​ប្រកួត​ជាមួយ​សិង្ហបុរី មិន​សូវ​ល្អ​ទេ ហើយ​​នេះ​​គឺ​​ជា​អ្វី​ដែល​យើង​ព្រួយ​បារម្ភ​សម្រាប់​ការ​ប្រកួត​ក្រោយ តែ​សង្ឃឹម​​​ថា ​យើង​​នឹង​​យក​​ឈ្នះ​​លើ​​បញ្ហា​ទាំង​នេះ​បាន»។

ជាមួយ​គ្នា​នេះ គ្រូ​បង្វឹក​ក្រុម​ជម្រើសជាតិ​ថៃ លោក Mano Polking ក៏​បាន​ជំរុញ​កូន​ក្រុម​របស់​លោក​ឱ្យ​យក​ចិត្ត​​ទុក​ដាក់​ខ្លាំង​សម្រាប់​ការ​ប្រកួត ​២ លើក​ចុង​ក្រោយ ជាមួយ​កម្ពុជា និង​ឡាវ​ផង​​ដែរ។ លោក​បាន​និយាយ​ថា​៖ «​ខ្ញុំ​គិត​ថា​ ក្រុម​ទាំង ​២​ នេះ ​ខ្លាំង​ណាស់! យើង​តែងតែ​គោរព​ពួក​គេ ហើយ​ខ្ញុំ​តែងតែ​ណែនាំ​កីឡាករ​កុំ​ឱ្យ​​មាន​​អំនួត ដើម្បី​ចៀសវាង​កំហុស។ យើង​នឹង​ត្រូវ​តស៊ូ​គ្រប់​ការ​ប្រកួត ព្រោះ​ក្រុម​ U23 ​ថៃ​ នៅ​មាន​បញ្ហា​ជា​ច្រើន ​ដែល​ត្រូវ​ជម្នះ ​និង​កែ​លម្អ»។

លោក Mano Polking បន្ថែម​ថា៖ «U23 កម្ពុជា​ជា​ក្រុម​ក្មេងៗ ប៉ុន្តែ​រៀបចំ​បាន​ល្អ រួបរួម​គ្នា​មាន​ស្មារតី​រួម​ជា​ក្រុម ដោយ​​ពួក​គេ​មាន​ការ​ជួយ​ជ្រោមជ្រែង​ពី​ក្រុម​គ្រូ​បង្វឹក​ជនជាតិ​ជប៉ុន ​ដែល​​មាន​​បទពិសោធ​ ហើយ​ពួក​គាត់​ក៏​ជួយ​វិស័យ​បាល់ទាត់​​កម្ពុជា ឱ្យ​អភិវឌ្ឍ​ផង​ដែរ​ ដែល​អាច​និយាយ​បាន​ថា ​ជា​ការ​កែប្រែ​មួយ ព្រោះ​ពេល​​ប្រកួត​​​ជាមួយ​ឡាវ ពួក​គេ​រៀបចំ​បាន​ល្អ លេង​បាល់​ទាត់​មាន​គុណភាព»៕

អត្ថបទគួរចាប់អារម្មណ៍