.jpg)
វ៉ា មិថុនា បានលើកជើងទាត់ទៅលើករបស់គូប្រកួត កាលពីម្សិលមិញ។ រូបថតសហការី
ភ្នំពេញៈ កីឡាករតេក្វាន់ដូ WT វ៉ា មិថុនា បានក្លាយជាបេក្ខភាពម្នាក់ទៀត ដែលដណ្តើមបានមេដាយមាសទី៤ ឱ្យកម្ពុជា សម្រាប់ការប្រកួតប្រជែងនៅស៊ីហ្គេមលើកនេះ ចំណែកក្រុមចំបាប់ទើបដណ្តើមបានមេដាយសំរឹទ្ធ ហើយក្រុមប្រដាល់គុនខ្មែរ ក៏ដណ្តើមបានឱកាសឡើងទៅវគ្គ ១/២ ផ្តាច់ព្រ័ត្រ និងកក់មេដាយសំរឹទ្ធ រួចជាស្រេចដូចគ្នា។
តាមរយៈការប្រកួតកាលពីថ្ងៃពុធម្សិលមិញនេះ វ៉ា មិថុនា បានឈ្នះមេដាយមាសលើប្រភេទទម្ងន់ក្រោម ៧៤ គ.ក្រ បន្ទាប់ពីរូបគេបានយកឈ្នះកីឡាករហ្វីលីពីន ដោយពិន្ទុ ៣៥-១៤ នៅវគ្គផ្តាច់ព្រ័ត្រ ហើយនេះក៏ជាមេដាយមាសទី៤ ដែលកម្ពុជាដណ្តើមបានផងដែរ ខណៈមេដាយមាស ៣ ទៀត រកបានដោយកីឡាករឃីកបុកស៊ីង ព្រមទាំងក្រុមអត្តពលិកប៉េតង់ និងក្រុមវ៉ូវីណាម។ ចំណែកកីឡាការិនី ឈឿង អាលីហ្សា ក៏បានឈ្នះមេដាយសំរឹទ្ធ លើប្រភេទកីឡាតេក្វាន់ដូនេះ ក្នុងទម្ងន់ក្រោម ៥៧ គីឡូក្រាម។
សម្រាប់ការប្រកួត កាលពីម្សិលមិញនោះដែរ កីឡាការិនីចំបាប់ទម្ងន់ ៥៧ គីឡូក្រាម ឌិត សំណាង និងកីឡាការិនី ជា កញ្ញា ដែលប្រកួតក្នុងទម្ងន់ ៦២ គីឡូក្រាម សុទ្ធតែដណ្តើមបានមេដាយសំរឹទ្ធ លើវិញ្ញាសាចំបាប់សេរី ប៉ុន្តែកីឡាការិនី សឿន នឿន ប្រកួតទម្ងន់ ៥៧ គីឡូក្រាម និង សម្បត្តិ វណ្ណៈ ដែលប្រកួតទម្ងន់ ៥៣ គីឡូក្រាម មិនដណ្តើមបានមេដាយនោះទេ គឺអ្នកទាំង ២ បានចាញ់ដូចកីឡាករ ងួន មករា, យុន ប៊ុនណា, ឌន សៅ, កែវ សុភ័ក្រ្ត និងកីឡាករ អេង សេងលាង កាលពីថ្ងៃអង្គារដែរ។
យ៉ាងណាមិញ កីឡាករគុនខ្មែរ ឃុន បូរ៉ា (ឃីម បូរ៉ា) បានយកឈ្នះកីឡាករម៉ាឡេស៊ី ដោយពិន្ទុដាច់ ៣-០ ទាំង ៣ ទឹក ដើម្បីឡើងទៅកាន់វគ្គពាក់កណ្តាលផ្តាច់ព្រ័ត្រ ចំណែកកីឡាការិនី វី ស្រីឆាយ, សំ សំណាង, ម៉ឺយ ស៊ីង, ទួន ស្រីភីន និងកីឡាករទម្ងន់ធ្ងន់ រុំ សំណាង (ព្រំ សំណាង) សុទ្ធតែបានចាប់ឆ្នោតឡើងទៅវគ្គ ១/២ ផ្តាច់ព្រ័ត្រ ដោយស្វ័យប្រវត្តិដូចគ្នា ប៉ុន្តែកីឡាករ សុខ រិទ្ធិ បានចាញ់កីឡាករវៀតណាមដោយពិន្ទុ ហើយកីឡាការិនី ឆា ចាន់់ដែង ត្រូវបានថៃ វ៉ៃឱ្យសន្លប់នៅទឹកទី១៕
