.jpg)
កីឡាកររបស់ Frankfurt នាំគ្នាអបអរលើកពាន Europa League ក្រោយឈ្នះ Rangers ក្នុងវគ្គផ្ដាច់ព្រ័ត្រ។ AFP
ក្រុងសេវីល: ក្រុម Eintracht Frankfurt បានយកឈ្នះក្រុម Rangers ក្នុងលទ្ធផល ៥-៤ ដោយការស៊ុតបាល់ប៉េណាល់ទីកាត់ក្ដី ដើម្បីឈ្នះពានរង្វាន់ Europa League កាលពីថ្ងៃពុធ បន្ទាប់ពីការប្រកួតវគ្គផ្ដាច់ព្រ័ត្រ ក្នុងទីក្រុងសេវីល បានបញ្ចប់ទៅដោយស្មើគ្នា ១-១ ក្រោយតម៉ោងបន្ថែមពិសេស ១៥ នាទី ២ ដង។
កីឡាករ Aaron Ramsey គឺជាអ្នកទាត់បាល់អត់ចូលទីសម្រាប់ក្រុម Rangers ក្នុងការស៊ុតបាល់បញ្ចូលទីកាត់ក្ដីនេះ បន្ទាប់ពីត្រូវបានដូរចូល ជាមួយនឹងការនៅសល់តែ ៣ នាទីទៀតនៃម៉ោងបន្ថែមនោះ មុនពេលកីឡាករ Rafael Borre បំប៉ោងសំណាញ់ទីគ្រាប់បាល់ជ័យជម្នះ ដើម្បីផ្ដល់នូវភាពជោគជ័យដ៏គួរឱ្យកត់សម្គាល់ដល់ក្រុមអាល្លឺម៉ង់ Frankfurt។
«ឥឡូវនេះ យើងនឹងធ្វើពិធីឆ្លងអបអរ សម្រាប់រយៈពេលប៉ុន្មានថ្ងៃខាងមុខ»។ នេះជាសម្ដីគ្រូបង្វឹករបស់ក្រុម Frankfurt លោក Oliver Glasner។
ខ្សែប្រយុទ្ធ Borre គឺជាវីរបុរសនៃការប្រកួតនារាត្រីនេះ ដោយសារមុននឹងស៊ុតបាល់ជ័យជម្នះនោះ រូបគេក៏ជាអ្នករកបាននូវគ្រាប់បាល់តាមស្មើ ចំពោះគ្រាប់បាល់បើកឆាករបស់ Rangers ដែលស៊ុតដោយកីឡាករ Joe Aribo ខណៈដែលក្រុម Frankfurt បានឈ្នះពាននៅអឺរ៉ុបជាលើកដំបូង គិតចាប់ពីឆ្នាំ ១៩៨០ និងបានកក់កៅអីនៅក្របខ័ណ្ឌ Champions League ក្នុងវគ្គ Group Stage (វគ្គសន្សំពិន្ទុតាមពូល) នារដូវកាលក្រោយ។
«ខ្ញុំបានសុបិនពីយប់នេះ ពោលជារាត្រីជាប្រវត្តិសាស្ត្រសម្រាប់ក្លិប និងសម្រាប់រូបខ្ញុំផ្ទាល់។ វាជាពានរង្វាន់លើកដំបូងរបស់ខ្ញុំនៅអឺរ៉ុប។ ខ្ញុំនឹងរក្សាការចងចាំនេះរៀងរហូត»។ នេះជាការនិយាយរបស់កីឡាករសញ្ជាតិកូឡុំប៊ី Borre។
អ្នកចាំទី Kevin Trapp របស់ក្រុម Frankfurt បាននិយាយថា៖ «យើង គឺជាវីរបុរសទាំងអស់គ្នា។ បើមិនមានអ្នកគាំទ្រទេ យើងនឹងមិនអាចសម្រេចបាននូវជោគជ័យនេះឡើយ»។
ក្លិបទាំង ២ កំពុងសម្លឹងដល់ការឈ្នះជើងឯកជាលើកទី២ ដូចគ្នានៅអឺរ៉ុបក្នុងប្រវត្តិសាស្ត្ររបស់ពួកគេ ដោយក្រុមរបស់ស្កុតឡេន Rangers គិតតាំងពីឈ្នះពាន Cup Winners'' Cup ក្នុងឆ្នាំ ១៩៧២ ហើយក្រុម Frankfurt គិតតាំងពីពេលដែលពួកគេលើកពាន UEFA Cup រយៈពេល ៤២ ឆ្នាំកន្លងទៅ៕ AFP/VN
