.jpg)
លោក Casey Barnett លោក វ៉ាត់ ចំរើន និងគ្រូបង្វឹកកូរ៉េ ថតជាមួយម្ចាស់មេដាយរបស់កម្ពុជា។ សហការី
ភ្នំពេញៈ ក្រុមជម្រើសជាតិចំបាប់កម្ពុជាបានបំបែកភាពទាល់ច្រក ដើម្បីដណ្តើមបានមេដាយមាសនៅក្នុងការប្រកួតកីឡាស៊ីហ្គេមជាថ្មីវិញហើយ បន្ទាប់ពីក្រុមមួយនេះ បានខកខនទាំងការប្រកួត និងការឈ្នះបានមេដាយមាស សម្រាប់ការប្រកួតស៊ីហ្គេមអស់រយៈពេលជិត ១០ ឆ្នាំ កន្លងមកនេះ។
តាមប្រវត្តិនៃការប្រកួតរបស់ក្រុមជម្រើសជាតិចំបាប់កម្ពុជានៅក្នុងព្រឹត្តិការណ៍ស៊ីហ្គេមនេះ គឺក្រុមតំណាងឱ្យកម្ពុជានេះ បានបង្កើតកំណត់ត្រានៃការឈ្នះបានមេដាយមាសច្រើនបំផុត និងជាលើកដំបូងនៅពេលពួកគេចូលរួមការប្រកួតស៊ីហ្គេមនៅមីយ៉ាន់ម៉ាកាលឆ្នាំ ២០១៣ ដោយកាលនោះ ក្រុមចំបាប់កម្ពុជាបានឈ្នះមេដាយមាស ៤ ប្រាក់ ២ និងសំរឹទ្ធចំនួន ៤ ហើយមេដាយមាសទាំង ៤ នោះ រកបានដោយកីឡាករ ឌន សៅ ក្នុងទម្ងន់ ១២០ គីឡូក្រាម កៅ ចេងហុង ទម្ងន់ ៨៤ គីឡូក្រាម ព្រមទាំងកីឡាការិនី ចូវ សុធារ៉ា ទម្ងន់ ៤៤ គ.ក្រ និង និ សំណាង ក្នុងទម្ងន់ ៦៣ គីឡូក្រាម។
ប៉ុន្តែសម្រាប់ការប្រកួតស៊ីហ្គេម ឆ្នាំ ២០១៥ នៅសិង្ហបុរី និងស៊ីហ្គេម ឆ្នាំ ២០១៧ នៅម៉ាឡេស៊ី គឺម្ចាស់ផ្ទះទាំង ២ ប្រទេសនេះ មិនបានដាក់បញ្ចូលប្រភេទកីឡាចំបាប់ឱ្យចូលរួមប្រកួតនោះទេ។ ចំណែកការបង្ហាញខ្លួនជាថ្មី សម្រាប់ការប្រកួតស៊ីហ្គេមឆ្នាំ ២០១៩ នៅហ្វីលីពីន គឺក្រុមចំបាប់កម្ពុជាមិនមានលទ្ធភាពដណ្តើមបានមេដាយមាស និងប្រាក់ទៀតទេ ដោយពួកគេបានត្រឹមមេដាយសំរឹទ្ធចំនួន ៥ ប៉ុណ្ណោះ។
តែទោះបីជាយ៉ាងណា សម្រាប់ការប្រកួតស៊ីហ្គេមលើកទី៣១ ឆ្នាំ ២០២១ ដែលកំពុងធ្វើនៅប្រទេសវៀតណាមនាពេលនេះ ក្រុមចំបាប់កម្ពុជាបានបញ្ចប់ការប្រកួតទាំង ១៥ ប្រភេទទម្ងន់របស់ពួកគេ ជាមួយការឈ្នះបានមេដាយមាស ១ ប្រាក់ ១ និងសំរឹទ្ធ ៤ ដែលមានភាពប្រសើរជាងការប្រកួតនៅហ្វីលីពីន។
នៅក្នុងការប្រកួតនេះកីឡាករកូនកាត់ខ្មែរ-អ៊ីរ៉ង់ ស៊ូ បាលី គឺជាបេក្ខភាពដែលបានឈ្នះមេដាយមាសឱ្យកម្ពុជា បន្ទាប់ពីកីឡាករចំបាប់សេរី ទម្ងន់ ១២៥ គីឡូក្រាមរូបនេះបាន យកឈ្នះលើកីឡាកររបស់វៀតណាម ដោយពិន្ទុដាច់ ១០-០ និងបានបន្តឈ្នះកីឡាករឡាវ ដោយពិន្ទុដាច់ ១០-០ ដូចគ្នានៅក្នុងការប្រកួតជម្រុះវិលជុំទាំង ២ លើករបស់ខ្លួននោះ។
ចំណែកមេដាយប្រាក់ រកបានដោយកីឡាករកូនកាត់ខ្មែរ-អ៊ីរ៉ង់ ម៉ូ សារី ក្នុងការប្រកួតក្នុងទម្ងន់ ៩៧ គីឡូក្រាម។ ម៉ូ សារី បានចាញ់កីឡាករវៀតណាមនៅវគ្គជម្រុះដំបូង ប៉ុន្តែគេបានយកឈ្នះកីឡាកររបស់ហ្វីលីពីនទើបដណ្តើមបានមេដាយប្រាក់នេះ។ រីឯកីឡាការិនី ឌិត សំណាង និងកីឡាការិនី ជា កញ្ញា រួមទាំងកីឡាករ សឿន សុភាស់ និង ហេង វុទ្ធី ដណ្តើមបានមេដាយសំរឹទ្ធដូចគ្នា។
ប៉ុន្តែអតីតម្ចាស់មេដាយមាស ៣ សម័យកាល ឌន សៅ ព្រមទាំងកីឡាករ កែវ សុភ័ក្រ្ត, អេង សេងលាង, ងួន មករា, យុន ប៊ុនណា, អុល សៅហ៊ាង, ជុន ធួន ព្រមទាំងកីឡាការិនី សឿន នឿន និង សម្បត្តិ វណ្ណៈ មិន ដណ្តើមបានមេដាយនោះទេ ហើយជាមួយការឈ្នះបានត្រឹមមេដាយ ១ នេះ បានបញ្ជាក់ថា ក្រុមចំបាប់មិនអាចសម្រេចគោលដៅ ដែលសហព័ន្ធកីឡាចំបាប់កម្ពុជាបានដាក់ចេញនោះទេ ព្រោះគ្រូបង្វឹកជម្រើសជាតិ លោក កាង ដែនពិសិដ្ឋ បានប្រាប់មុនការប្រកួតថា សម្រាប់ស៊ីហ្គេមលើកនេះសហព័ន្ធបានដាក់គោលដៅដណ្តើមឱ្យបានមេដាសមាស ២។
យ៉ាងណាក៏ដោយ ចំពោះលទ្ធផលនេះ លោក Casey Barnett អនុប្រធានសហព័ន្ធកីឡាចំបាប់កម្ពុជា និងជាប្រធានប្រតិភូដឹកនាំការប្រកួតនេះ បានថ្លែងថា៖ «តាមការប្រកួតយ៉ាងស្វិតស្វាញចំនួន ៣ ថ្ងៃនេះ យើងដណ្តើមបានមេដាយមាស ១ ប្រាក់ ១ និងសំរឹទ្ធ ៤។ លទ្ធផលនេះ វាកើតចេញពីការខិតខំប្រឹងប្រែងតស៊ូរបស់ក្រុមអត្តពលិកយើងជាពិសេសពួកគេ ត្រូវហ្វឹកហាត់បិទខ្ទប់នៅក្នុងរបត់កូវីដ ១៩ ដែលមិនបានជួបជុំគ្រួសារ ប្រពន្ធ កូន គឺពួកគាត់បានទ្រាំតស៊ូ និងជម្នះរាល់ការលំបាក ដើម្បីដណ្តើមយកមេដាយជូនដល់ប្រទេសជាតិ។ ហេតុនេះយើងពិតជារីករាយណាស់សម្រាប់លទ្ធផលការឈ្នះបានមេដាយនៅពេលនេះ»៕
