ភ្នំពេញ: នៅទីបំផុត ក្រុមអត្តពលិកកាយសម្ព័ន្ធកម្ពុជា អាចបំបែកកំណត់ត្រាប្រវត្តិសាស្ត្រ សម្រាប់ការឈ្នះមេដាយជាលើកដំបូង នៅក្នុងព្រឹត្តិការណ៍ស៊ីហ្គេមរបស់ពួកគេបានហើយ បន្ទាប់ពីក្រុមអត្តពលិកវ័យក្មេងរបស់កម្ពុជាទាំងនេះ បានឈ្នះមេដាយប្រាក់ចំនួន ៣ និងសំរឹទ្ធ ១ ក្នុងការប្រកួតព្រឹត្តិការណ៍ស៊ីហ្គេមលើកទី៣១ ឆ្នាំ ២០២១ ដែលប្រព្រឹត្តទៅនៅទីក្រុងហាណូយ ប្រទេសវៀតណាម។
សម្រាប់ការប្រកួតកីឡាកាយសម្ព័ន្ធអេរ៉ូប៉ិច កាលពីថ្ងៃសៅរ៍ កន្លងមកនេះ ក្រុមអត្តពលិកវ័យក្មេងរបស់កម្ពុជាបានបង្ហាញឱ្យគ្រប់គ្នា មើលឃើញថា ការតស៊ូព្យាយាមហ្វឹកហាត់តាំងពីកុមារភាពរបស់ពួកគេ គឺនៅពេលនេះអាចទទួលបានផ្លែផ្កា ជូនប្រទេសជាតិហើយ បន្ទាប់ពីកីឡាករ ហាស់ សុខហ៊ កីឡាករ ត្រន ប៊ុនធឿន និងកីឡាការិនី ម៉ូ ស្រីពៅ បានរួមគ្នាបង្ហាញសមត្ថភាពប្រកួតយ៉ាងស្ទាត់ជំនាញលើវិញ្ញាសា Trio ដើម្បីឈ្នះបានមេដាយប្រាក់ដ៏គួរឱ្យភ្ញាក់ផ្អើលបំផុត។
ជាមួយគ្នានោះ កីឡាករ ជឿន ចាន់បូរី ក៏បានឈ្នះមេដាយសំរឹទ្ធលើវិញ្ញសាប្រកួតឯកត្តជនផងដែរ ចំណែកការប្រកួត កាលពីថ្ងៃអាទិត្យ កីឡាករ ហាស់ សុខហ៊ និងកីឡាការិនី ម៉ូ ស្រីពៅ បានសហការគ្នាយ៉ាងល្អ ដើម្បីឈ្នះមេដាយប្រាក់ ១ ទៀត ជូនជាតិនៅក្នុងលើវិញ្ញាសាកាយសម្ព័ន្ធជាគូបុរស-នារី (Mixed Pair) ហើយកីឡាករ ហាស់ សុខហ៊ និង ម៉ូ ស្រីពៅ ដដែលបានរួមគ្នាជាមួយកីឡាករ ជឿន ចាន់បូរី, ត្រន ប៊ុនធឿន និងកីឡាករ ង៉ែត តុលា ដើម្បីឈ្នះបានមេដាយប្រាក់ លើវិញ្ញាសាជាក្រុមផងដែរ។
អគ្គលេខាធិការសហព័ន្ធកីឡាកាយសម្ព័ន្ធកម្ពុជា លោក ណយ ផាណា បានវាយតម្លៃខ្ពស់ទៅលើការខិតខំប្រឹងប្រែងរបស់អត្តពលិករបស់លោក ដែលបានព្យាយាមតាំងពីមិនទាន់មានអ្វីជាដុំកំភួនសោះ រហូតទទួលបានជ័យជម្នះ គឺការឈ្នះបានមេដាយជាប្រវត្តិសាស្ត្រនៅស៊ីហ្គេមលើកនេះ បន្ទាប់ពីពួកគេបានរង់ចាំអស់រយៈពេលជិត ២០ ឆ្នាំ។
លោក ណយ ផាណា បានប្រាប់ ភ្នំពេញ ប៉ុស្តិ៍ថា៖ «កីឡាកាយសម្ព័ន្ធរបស់យើង ធ្លាប់បានចូលរួមក្នុងស៊ីហ្គេមនៅប្រទេសហ្វីលីពីន តាំងពីឆ្នាំ ២០០៥ ប៉ុន្តែនៅក្នុងកាលៈទេសៈនោះ គឺមានការលំបាកច្រើន ដោយសារកីឡាករ កីឡាការិនី និងធនធាននៃចំណេះដឹងផ្នែកកាយសម្ព័ន្ធរបស់យើង នៅមានកម្រិតតិចតួចបំផុត ហេតុនេះមេដាយ ដែលយើងទទួលបានពេលនេះ យើងពិតជាអរគុណចំពោះការលើកទឹកចិត្តពីថ្នាក់ដឹកនាំ ជាពិសេសសម្តេចតេជោនាយករដ្ឋមន្ត្រី ដែលបានដាក់ចេញនៅលក្ខណពិសេស ដល់ក្រុមអត្តពលិកជម្រើសជាតិរបស់យើង»។
បន្ថែមទៅលើការយកចិត្តទុកដាក់របស់ប្រមុខដឹកនាំប្រទេស ដែលបានផ្តល់ជូននៅយន្តហោះពិសេស សម្រាប់ដឹកជញ្ជូនក្រុមជម្រើសជាតិកម្ពុជា ទាំងទៅ និងត្រឡប់មកវិញ ក្នុងស៊ីហ្គេមលើកនេះ លោក ណយ ផាណា បានបន្តថា៖ «យើងពិតជាអរគុណលោកឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ជាប្រធាន NOCC និងជាប្រធានសហព័ន្ធកីឡាកាយសម្ព័ន្ធផ្ទាល់ និងលោកឧកញ៉ា សុខ ហុង ជាអនុប្រធាន ដែលតែងតែដាក់ចេញនូវយុទ្ធសាស្ត្រ និងអនុសាសន៍ ធ្វើឱ្យពួកខ្ញុំជាអ្នកកាន់ការងារខាងបច្ចេកទេស មានផែនការជាក់លាក់»។
លោកបានបន្ថែមថា៖ «ការទទួលបានមេដាយនេះ គឺជាប្រវត្តិសាស្ត្ររបស់ប្រភេទកីឡាកាយសម្ព័ន្ធកម្ពុជា ដែលយើងមិនធ្លាប់ទទួលបានមេដាយនោះទេ ហើយការទទួលបានមេដាយនេះ គឺស្ថិតនៅក្រោមផែនការជាក់លាក់ ដែលយើងបានដាក់ចេញជាយូរឆ្នាំមកហើយ។ យើងបានខិតខំ បើទោះបីជាស្ថិតនៅក្នុងវិបត្តិកូវីដ ១៩ ក៏យើងព្យាយាមរក្សាកីឡាករ កីឡាការិនី ហ្វឹកហាត់ឱ្យនៅក្នុងតំបន់បិទខ្ទប់ ហើយថ្នាក់ដឹកនាំរបស់យើង ក៏ដូចជារូបខ្ញុំផ្ទាល់ តែងតែបានទៅសួរសុខទុក្ខ និងលើកទឹកចិត្តដល់ពួកគេ»។
អគ្គលេខាធិការ លោក ណយ ផាណា បានប្រាប់ទៀតថា៖ «យើងមានផែនការជាក់លាក់ថា នៅឆ្នាំនេះ យើងត្រូវរកលទ្ធផលមេដាយជូនជាតិមាតុភូមិ និងដើម្បីឆ្ពោះទៅរកលទ្ធផលមួយ ដែលយើងរំពឹងទុកនៅក្នុងផែនការ គឺយើងត្រូវស្វែងរកមេដាយមាស ១ នៅពេលកម្ពុជា ធ្វើជាម្ចាស់ផ្ទះស៊ីហ្គេម ឆ្នាំ ២០២៣ អ៊ីចឹងបើផ្អែកទៅលើលទ្ធផលពេលនេះ យើងរំពឹងថា យើងនឹងធ្វើបានល្អនៅពេលកម្ពុជាធ្វើជាម្ចាស់ផ្ទះ»។
ចំណុចសំខាន់ ដែលជួយឱ្យក្រុមកាយសម្ព័ន្ធកម្ពុជា ឈ្នះបានមេដាយនៅស៊ីហ្គេមលើកនេះ ត្រូវបានលោក ណយ ផាណា ប្រាប់បន្ថែមថា ៖ «យើងក៏អរគុណចំពោះការផ្តល់គ្រូបង្វឹកអន្តរជាតិ ដែលខ្ញុំផ្ទាល់បានទំនាក់ទំនងក្នុងការហៅគ្រូបង្វឹកបរទេសម្នាក់មក ដើម្បីធ្វើការបង្វឹក និងធ្វើការសហការជាមួយគ្រូបង្វឹក និងគ្រូជំនួយកម្ពុជា ដោយគាត់បានជួយសម្រួលច្រើន និងធ្វើឱ្យយើងទទួលបានលទ្ធផលល្អនៅពេលនេះ ហើយដោយផ្អែកតាមផែនការជាក់លាក់ និងលទ្ធផលនៅពេលនេះ យើងសង្ឃឹមថា យើងនឹងខិតខំធ្វើឱ្យបាន (ឈ្នះមេដាយមាស) ទៅតាមផែនការ សម្រាប់ឆ្នាំ ២០២៣»៕
វីដេអូ៖