.jpg)
ក្បួនរថយន្តដង្ហែទង់ស៊ីហ្គេម និងម្ចាស់ជយលាភីមេដាយមាស ដែលត្រូវបានធ្វើ កាលពីថ្ងៃអង្គារ។ ហេង ជីវ័ន
ភ្នំពេញៈ ថ្នាក់ដឹកនាំរបស់គណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ឆ្នាំ ២០២៣ (CAMSOC) និងគណៈកម្មាធិការជាតិអូឡាំពិកកម្ពុជា (NOCC) ព្រមទាំងប្រតិភូដឹកនាំ និងក្រុមអត្តពលិក ជាម្ចាស់ជយលាភី បាននាំយកមេដាយកិត្តិយស និងទង់ស៊ីហ្គេមមកដល់មាតុប្រទេសវិញ កាលពីថ្ងៃចន្ទ ដោយមានការទទួលស្វាគមន៍យ៉ាងកក់ក្តៅនៅព្រលានយន្តហោះអន្តរជាតិភ្នំពេញ។
សម្រាប់ការនាំយកមេដាយកិត្តិយស ជាពិសេសទង់ស៊ីហ្គេមពីម្ចាស់ផ្ទះវៀតណាម មកដល់កម្ពុជានេះ ត្រូវបានអគ្គលេខាធិការ CAMSOC និង NOCC លោក វ៉ាត់ ចំរើន ចាត់ទុកថា ជាការមកដល់នៃព្រឹត្តិការណ៍ស៊ីហ្គេម សម្រាប់កម្ពុជាដែលត្រូវធ្វើម្ចាស់ផ្ទះបន្តជាប្រវត្តិសាស្រ្តលើកដំបូង នៅឆ្នាំ ២០២៣។
នាយកបេសកកម្មស៊ីហ្គេម លោក វ៉ាត់ ចំរើន បានថ្លែងថា៖ «ការដង្ហែទង់ស៊ីហ្គេមមកដល់ព្រះរាជាណាចក្រកម្ពុជានេះ គឺហាក់បីដូចជាស៊ីហ្គេម បានមកដល់កម្ពុជាហើយ ដើម្បីយើងធ្វើជាម្ចាស់ផ្ទះស៊ីហ្គេមហ្នឹង អ៊ីចឹងសូមប្រជាពលរដ្ឋកម្ពុជានៅទូទាំងប្រទេសចូលរួមអបអរសាទរទាំងអស់គ្នាថា ស៊ីហ្គេមបានមកដល់កម្ពុជាហើយ គឺទង់ស៊ីហ្គេម បានដង្ហែមកដល់កម្ពុជានៅថ្ងៃទី ២៤ ខែឧសភានេះ»។
គួរបញ្ជាក់ថា លោកបណ្ឌិត ថោង ខុន ជាប្រធាន NOCC និងអនុប្រធានអចិន្ត្រៃយ៍ CAMSOC និងលោក វ៉ាត់ ចំរើន ជាអគ្គលេខាធិការ ក្រោមការដឹកនាំផ្ទាល់ដោយលោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ដែលជាប្រធាន CAMSOC គឺបានទៅទទួលទង់ស៊ីហ្គេម ពីម្ចាស់ផ្ទះវៀតណាម នៅក្នុងពិធីបិទការប្រកួតស៊ីហ្គេមលើកទី៣១ ឆ្នាំ ២០២១ នៅទីក្រុងហាណូយ កាលពីយប់ថ្ងៃចន្ទ។
យ៉ាងណាមិញ នៅក្នុងពិធីស្វាគមន៍ ការមកដល់ទង់ស៊ីហ្គេម ឬទង់សហព័ន្ធកីឡាអាស៊ីអាគ្នេយ៍ និងម្ចាស់ជយលាភីមេដាយនៅព្រលានយន្តហោះអន្តរជាតិភ្នំពេញ កាលម៉ោង ៥ ថ្ងៃអង្គារ ម្សិលមិញនេះ លោកបណ្ឌិត ថោង ខុន និង លោក វ៉ាត់ ចំរើន បានប្រគល់ទង់ស៊ីហ្គេមនេះបន្ត ទៅឱ្យលោក ទៀ បាញ់ ដើម្បីធ្វើការដង្ហែទង់នេះ តាមក្បួនរថយន្ត ដោយចាកចេញពីព្រលានយន្តហោះអន្តរជាតិភ្នំពេញ តាមផ្លូវសហព័ន្ធរុស្ស៊ី ឆ្ពោះទៅកាន់វិមានឯករាជ្យ រួចដង្ហែត្រឡប់ទៅកាន់ទីស្នាក់ការ NOCC វិញ។
ជាមួយការដង្ហែទង់ស៊ីហ្គេម កាលពីម្សិលមិញនេះ បានបញ្ជាក់ថា សមាជិកគណៈកម្មាធិការសហព័ន្ធកីឡាអាស៊ីអាគ្នេយ៍ តំណាងឱ្យប្រទេសទាំងអស់នៅក្នុងតំបន់អាស៊ាន បានប្រគល់ជូនឱ្យកម្ពុជានូវសិទ្ធិពេញលេញហើយ ដើម្បីរៀបចំធ្វើជាម្ចាស់ផ្ទះបន្តសម្រាប់ព្រឹត្តិការណ៍ស៊ីហ្គេមលើកទី៣២ ឆ្នាំ ២០២៣ ដោយការប្រកួតនេះ កម្ពុជាបានដាក់គោលដៅត្រូវដណ្តើមមេដាយមាសឱ្យបានច្រើនជាងការប្រកួតស៊ីហ្គេមនៅវៀតណាម ដែលទើបបានបញ្ចប់នេះ ដែលកម្ពុជាយើងដណ្តើមបានមេដាយសរុប ៦៣ ក្នុងនោះមានមេដាយមាស ៩ ប្រាក់ ១៣ និងសំរឹទ្ធ ៤១។
ទាក់ទងនឹងចំនួនមេដាយ ដែលបានឈ្នះនៅស៊ីហ្គេមលើកនេះ លោក វ៉ាត់ ចំរើន បញ្ជាក់ថា៖ «ការប្រកួតស៊ីហ្គេមលើកនេះ ចំនួនមេដាយ ដែលយើងទទួលបានសរុបចំនួន ៦៣ នេះ គឺយើងបានបំបែកឯតទគ្គកម្មចំនួនមេដាយច្រើនជាង កាលស៊ីហ្គេមមុនៗ ព្រោះបើធៀបចំនួនមេដាយមាសវិញ គឺស៊ីហ្គេម ឆ្នាំ ២០១៩ យើងបានតែ ៤ ទេ ហើយចំនួនមេដាយប្រាក់របស់យើងលើកនេះ បានកើនដល់ ១៣ និងមេដាយសំរឹទ្ធ ៤១ អ៊ីចឹងចំនួនមេដាយ ៦៣ នេះ គឺយើងមានបំណងចង់រុញវាឱ្យទៅជាមេដាយមាសទាំងអស់ សម្រាប់ការប្រកួតស៊ីហ្គេម ឆ្នាំ ២០២៣ ដែលកម្ពុជាយើងធ្វើជាម្ចាស់ផ្ទះ»៕
វីដេអូ៖
