ភ្នំពេញៈ សហព័ន្ធកីឡាចំបាប់កម្ពុជា ដែលទើបបានបង្កើតនូវកំណត់ត្រាថ្មីឡើងវិញ សម្រាប់ការឈ្នះបានមេដាយមាស ក្នុងការប្រកួតស៊ីហ្គេម លើកទី៣១ ឆ្នាំ ២០២១ នៅទីក្រុងហាណូយ ប្រទេសវៀតណាមនោះ បានដាក់ចេញនូវផែនការយុទ្ធសាស្រ្ត និងគោលដៅចម្បង ដើម្បីធ្វើយ៉ាងណាឱ្យក្រុមជម្រើសជាតិចំបាប់កម្ពុជា អាចមានលទ្ធភាពកាន់តែខ្ពស់ ក្នុងការដណ្តើមបានមេដាយច្រើនពីការប្រកួតស៊ីហ្គេមលើកទី៣២ ឆ្នាំ ២០២៣ នៅកម្ពុជា។
អនុប្រធានសហព័ន្ធកីឡាចំបាប់កម្ពុជា លោក Casey Barnett ដែលជាប្រធានប្រតិភូដឹកនាំក្រុមចំបាប់កម្ពុជា ក្នុងការប្រកួតស៊ីហ្គេមលើកនេះ បានធ្វើការកោតសរសើរទៅដល់ក្រុមចំបាប់កម្ពុជា ដែលបានខំប្រឹងតស៊ូរហូតដណ្តើមបានមេដាយមាស ១ ប្រាក់ ១ និងសំរឹទ្ធ ៤ ជូនជាតិ សម្រាប់ស៊ីហ្គេមលើកទី៣១ ឆ្នាំ ២០២១ ដែលទើបបានរៀបចំពិធីបិទ កាលពីយប់ថ្ងៃចន្ទ កន្លងមកនេះ។
យ៉ាងណាក៏ដោយ អតីតកីឡាករចំបាប់នៅអាមេរិក លោក Casey ចង់បង្កើតការប្រកួតទម្ងន់ស្រាលឱ្យបានកាន់តែច្រើន ព្រមទាំងដាក់អ្នកចំបាប់កម្ពុជាឱ្យប្រកួតទាំងចំបាប់ក្រិចកូរ៉ូម៉ាំង និង ចំបាប់សេរី សម្រាប់ការប្រកួតស៊ីហ្គេម ជាប្រវត្តិសាស្រ្តលើកដំបូងនៅកម្ពុជា នាឆ្នាំ ២០២៣។
នាយកវិទ្យាស្ថានខេមអេដ លោក Casey ថ្លែងថា៖ «ការប្រកួតស៊ីហ្គេមនៅវៀតណាមនេះ ក្រុមចំបាប់របស់យើងបានឈរនៅលេខ ៤ ក្នុងនាមជាអ្នកដណ្តើមបានមេដាយមាសច្រើន ឱ្យកម្ពុជា គឺបន្ទាប់ពីក្រុមវ៉ូវីណាម ប៉េតង់ និងប្រដាល់ឃីកបុកស៊ីង ហើយខ្ញុំពិតជារីករាយណាស់ ដែលក្រុមអត្តពលិករបស់យើងបានតស៊ូ ខិតខំ ឆ្លងកាត់ការលំបាកជាច្រើន ដើម្បីដណ្តើមយកមេដាយជូនដល់ប្រទេសជាតិក្នុងស៊ីហ្គេមនេះ»។
តាមរយៈការប្រកួតស៊ីហ្គេម ដែលទើបបានបញ្ចប់នេះ ក្រុមចំបាប់កម្ពុជាបានឈរនៅលេខ ២ បន្ទាប់ពីក្រុមចំបាប់របស់ម្ចាស់ផ្ទះវៀតណាម ដោយកម្ពុជា ដណ្តើមបានមេដាយមាស ១ ដែលរកបានដោយកីឡាករកូនកាត់ខ្មែរ-អ៊ីរ៉ង់ ស៊ូ បាលី ក្នុងទម្ងន់ ១២៥ គីឡូក្រាម និងមេដាយប្រាក់ ១ រកបានដោយកីឡាករកូនកាត់ខ្មែរ-អ៊ីរ៉ង់ ម៉ូ សារី ក្នុងទម្ងន់ ៩៧ គីឡូក្រាម ព្រមទាំងមេដាយសំរឹទ្ធ ៤ ទៀត រកបានដោយកីឡាការិនី ឌិត សំណាង, ជា កញ្ញា រួមទាំងកីឡាករ សឿន សុភាស់ និង ហេង វុទ្ធី ប៉ុន្តែអត្តពលិក ៩ នាក់ទៀត មិនដណ្តើបានមេដាយទេ។
យ៉ាងណាក៏ដោយ សម្រាប់ស៊ីហ្គេម ឆ្នាំ ២០២៣ នៅកម្ពុជា លោក Casey Barnett បាននិយាយថា៖ «ខ្ញុំមើលឃើញថា យើងមានឱកាសឈ្នះបានមេដាយច្រើន សម្រាប់ស៊ីហ្គេមឆ្នាំក្រោយ ដោយយើងនឹងបន្ថែមប្រភេទទម្ងន់ ព្រោះយើងមានកីឡាករ-កីឡាការិនីច្រើន ដែលមានទម្ងន់ស្រាល អ៊ីចឹងយើងនឹងបន្ថែមប្រភេទទម្ងន់ស្រាល ដោយសារកីឡាករ-កីឡាការិនី ដែលមានមាឌធំ យើងមិនមានច្រើននោះទេ»។
សាស្រ្តាចារ្យផ្នែកគណនេយ្យ មកពីសហរដ្ឋអាមេរិក លោក Casey Barnett បានបន្ថែមថា៖ «សម្រាប់កីឡាករខ្លាំងៗរបស់យើង គឺយើងនឹងឱ្យពួកគេវ៉ៃទាំងចំបាប់ក្រិចកូរ៉ូម៉ាំង និងចំបាប់សេរី ព្រោះស៊ីហ្គេមលើកនេះ គេបានចែកដាច់ ដោយអ្នកវ៉ៃក្រិចកូរ៉ូម៉ាំង មិនអាចវ៉ៃចំបាប់សេរីបាននោះទេ ប៉ុន្តែឥឡូវយើងសង្កេតឃើញថា អ្នកដែលឈ្នះបានមេដាយផ្នែកចំបាប់សេរី គេអាចវ៉ៃឈ្នះនៅក្រិចកូរ៉ូម៉ាំង ដែរ អ៊ីចឹងស៊ីហ្គេម ឆ្នាំ ២០២៣ នៅកម្ពុជា យើងអាចមានការកើនឡើងនូវចំនួនមេដាយច្រើនជាងការប្រកួតស៊ីហ្គេមលើកនេះ សម្រាប់ជាមោទនភាពជាតិ»៕