ក្រុង​ម៉ាឌ្រី​ដ​: កីឡាករ Rodrygo របស់​ក្រុម​អធិរាជ​ស Real Madrid ត្រូវបាន​សួរ កាលពី​ថ្ងៃ​អង្គា​រថា តើ​អ្វីគឺជា​ដំបូន្មាន​ដ៏​ល្អ​បំផុត ដែល​រូបគេ​ទទួលបាន​ពី​ខ្សែប្រយុទ្ធ Karim Benzema ហើយ​រូបគេ​បាន​ឆ្លើយតប​យ៉ាង​រហ័ស​ថា បញ្ជូន​បាល់​ឱ្យគេ (Benzema)​។​

​វា​ជា​យុទ្ធសាស្ត្រ​ដ៏​ស័ក្ដិសម របស់​ក្រុម Real ដែល​កីឡាករ​ពាក់​លេខ​ ៩ របស់​ពួកគេ នឹង​ក្លាយជា​អ្នកលេង​ដ៏​គ្រោះថ្នាក់​បំផុតលើ​ទីលាន ក្នុងការ​ប្រកួតនៅ​វគ្គ​ផ្តាច់ព្រ័ត្រ នៃ​ក្របខ័ណ្ឌ Champions League នា​យប់​ថ្ងៃ​សៅរ៍ ទល់​ក្រុម​ហង្ស​ក្រហម Liverpool និង​ដែល​ត្រូវបាន​អះអាងថា ជា​កីឡាករ​ដ៏​មាន​សមត្ថ​ភាពល្អ​បំផុត នៅលើ​ពិភពលោក​គ្រប់​រដូវ​កាល​។​

​គ្រាប់​បាល់​ចំនួន ៤៩​ គ្រាប់​របស់​កីឡាករ Benzema ក្នុង​​ចំណោម​ការចូល​លេង ៥២​ ប្រកួត ធ្វើឱ្យ ៣៣ ​គ្រាប់​របស់​ខ្សែប្រយុទ្ធ Mohamed Salah ពី​ការ​បង្ហាញខ្លួន ៥៩ ​លើក ក្លាយជា​ចំនួន​ដ៏​តិចតួច ខណៈ​ខ្សែប្រយុទ្ធ Kylian Mbappe ដែល​បាន​បដិសេធ​ចូលរួម​ជាមួយ Real និង​ដែលមាន​ប្រៀប​តាំងពី​ដើមដំបូង រហូតដល់​វគ្គ​ផ្តាច់ព្រ័ត្រនៅ​ក្រុងប៉ារីស មិនអាច​ផ្ទឹម​បានឡើយ ទោះ​ស៊ុត​បញ្ចូល​ទី​បាន ៤៣ ​គ្រាប់ ក្នុងចំណោម ៤៩​ ហ្គេម​ក៏ដោយ​។​

​បើ​ក្រុម Real អាច​យកឈ្នះ Liverpool ដើម្បី​បាន​លើក​ពាន​​រង្វាន់​ដ៏​ធំ​របស់​អឺរ៉ុបជា​លើក​ទី១៤ នោះ ការរំពឹងទុក គឺថា Benzema ក៏​នឹងមាន​ជ័យជម្នះ​លើ Salah និង Sadio Mane ដើម្បី​ឈ្នះ​ពាន​កីឡាករ​ឆ្នើម​ជាងគេ Ballon d''Or ជា​លើកដំបូង​របស់ខ្លួន​បានដែរ​។​

​រដូវ​កាល​នេះ Benzema ស៊ុត​បញ្ចូល​ទី​ច្រើនជាងគេ ក្នុង​អាជីព​ឱ្យ Real និង​ច្រើន​បំផុតក្នុង​អាជីពនៅ Champions League​។ រូបគេ​ក្លាយជា​កីឡាករ​វ័យ​ចំណាស់​បំផុត ដែល​ធ្វើបាន​ហ៊ែ​ត​ទ្រិ​ក (​ស៊ុត ៣ ​គ្រាប់​) នៅ Champions League និង​ព្រមទាំង​ជា​អ្នក​ទម្លុះ​សំណាញ់​ទី​ច្រើន​បំផុត​សញ្ជាតិ​បារាំង ក្នុង​ប្រវត្តិសាស្ត្រ​។​

​ប្រសិន​រូបគេ ធ្វើបាន​សម្រេច ២ ​គ្រាប់ នៅ​ចុង​សប្តាហ៍​នេះ នោះ​រូបគេ​នឹង​តាម​ស្មើ​កំណត់​​ត្រាគ្រាប់​បាល់នៅ Champions League របស់​ស៊ុប​ភើ​ស្តារ Cristiano Ronaldo ចំនួន ១៧ ​គ្រាប់ ពោល ​គឺជា​ចំនួន​ច្រើនជាងគេ​បំផុត​មិន​ធ្លាប់មាន ដែល​ធ្វើបាន​ដោយ​កីឡាករ​តែ​ម្នាក់ ក្នុង​កម្មវិធី​ប្រកួត​តែ ​១​។​

​លោក Zinedine Zidane ដែល Benzema ពិពណ៌នា​ថា ដូចជា​បងប្រុស​ម្នាក់និយាយថា កីឡាករ​មិត្ត​រួម​ជាតិ​រូបនេះ គឺជាអំណោយ​ដល់​នរណាម្នាក់ ដែល​ស្រឡាញ់​កីឡាបាល់ទាត់ កីឡាករ​បាល់ទាត់​ជារួម និង​ភាពល្អ​បំផុត​។​

​អតីត​ម្ចាស់​ពានរង្វាន់ Ballon d''Or លោក Jean-Pierre Papin ធ្លាប់បាន​លើកឡើងថា កីឡាករ Benzema មាន​ថាមពល​របស់​អតីត​កីឡាករ Ronaldo ល្បឿន​របស់​អតីត Ronaldinho កម្រិត​របស់​អតីត​កីឡាករ Henry និង​ចិត្ត​វិញ្ញាណ​របស់​អតីត​កីឡាករ David Trezeguet​។​

«​យើង​តែ​សម្លឹង​រកមើល​រូបគេ (Benzema)​។ គាត់​ពិត​ជាមាន​សមត្ថ​ភាព​ពិសេស​អស្ចារ្យ​ណាស់​»​។ នេះ​ជា​សម្ដី​របស់ Rodrygo ដែល​ពោល​សរសើរ​មិត្ត​រួម​ក្រុម​៕ AFP/VN

​