.jpg)
លោក ប៊ុយ សុភ័ណ្ឌ (កណ្តាល) ពេលថតជាមួយថ្នាក់ដឹកនាំ គ្រូបង្វឹក និងម្ចាស់មេដាយ នៅស៊ីហ្គេម។ សហការី
ភ្នំពេញៈ មន្ត្រីជំនាញរបស់សហព័ន្ធកីឡាប្រដាល់សកលកម្ពុជា បានចាត់ទុកការដណ្តើមបានមេដាយប្រាក់ ១ និងសំរឹទ្ធ ៣ ពីការប្រកួតស៊ីហ្គេម លើកទី៣១ ឆ្នាំ ២០២១ នៅប្រទេសវៀតណាម កាលពីពេលថ្មីៗនេះថា ជាជោគជ័យដែលសម្រេចបានទៅតាមផែនការបានដាក់ចេញ ហើយបច្ចុប្បន្នសហព័ន្ធមួយនេះ បាននិងកំពុងដាក់ចេញនូវគោលដៅ និងផែនការយុទ្ធសាស្ត្រថ្មី គឺធ្វើយ៉ាងណា ជំរុញឱ្យក្រុមប្រដាល់ជម្រើសជាតិសកលកម្ពុជា អាចទៅដណ្តើមបានមេដាយមាសជាប្រវត្តិសាស្ត្រនៅពេលកម្ពុជា ធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ ២០២៣។
លោក ប៊ុយ សុភ័ណ្ឌ ជាអគ្គលេខាធិការសហព័ន្ធកីឡាចំបាប់កម្ពុជាបានប្រាប់ថា៖ «ចំពោះលទ្ធផល ដែលយើងទទួលបាននៅស៊ីហ្គេម លើកនេះ វាជាភាពជោគជ័យរបស់យើង ព្រោះមុនទៅចូលរួម សហព័ន្ធបានដាក់ចេញនូវទិសដៅរបស់យើងថា ធ្វើយ៉ាងណា យើងប្រែពណ៌មេដាយ ដោយស៊ីហ្គេម ឆ្នាំ ២០១៩ នៅហ្វីលីពីន យើងបានមេដាយសំរឹទ្ធ ៥ មែន តែយើងអត់បានមេដាយប្រាក់ ឬមាសនោះទេ អ៊ីចឹង ស៊ីហ្គេមលើកនេះ យើងទទួលបានជោគជ័យ ដោយយើងបានមេដាយប្រាក់ ១ និងសំរឹទ្ធ ៣»។
សម្រាប់ការប្រកួតស៊ីហ្គេម នៅប្រទេសវៀតណាម លើកនេះ កីឡាករ អ៊ុង ភារាក់ បានឈ្នះមេដាយប្រាក់ បន្ទាប់ពីរូបគេបានចាញ់កីឡាករថៃនៅវគ្គផ្តាច់ព្រ័ត្រ ចំណែកកីឡាករទម្ងន់ ៧៥គីឡូក្រាម ហ៊ុន គឹមហ៊ាង កីឡាករទម្ងន់ ៥៧ គ.ក្រ សៅ រង្សី និងកីឡាការិនី វី ស្រីស្រស់ ដែលប្រកួតទម្ងន់ ៥៧ គីឡូក្រាម សុទ្ធតែបានចាញ់នៅវគ្គពាក់កណ្តាលផ្តាច់ព្រ័ត្រ និងបានមេដាយសំរឹទ្ធរៀងៗខ្លួន។ ប៉ុន្តែកីឡាករ ទូច ដេវីត, វី សុភ័ស, នៅ សុខទី និងកីឡាការិនី សឿន សុខលី មិនដណ្តើមបានមេដាយទេ ព្រោះអ្នកទាំង ៤ បានចាញ់ ក្នុងវគ្គជម្រុះដំបូងដូចគ្នា។
យ៉ាងណាក៏ដោយ លោក ប៊ុយ សុភ័ណ្ឌ បានបន្ថែមថា៖ «តាំងពីឆ្នាំ ២០១៧ ដែលជាអាណត្តិដំបូង របស់សហព័ន្ធកីឡាប្រដាល់សកលកម្ពុជានេះ យើងមិនដែលបានមេដាយប្រាក់ទេ គឺយើងបានត្រឹមសំរឹទ្ធ ដូច្នេះការឈ្នះបានមេដាយប្រាក់ ១ និងសំរឹទ្ធ៣ សម្រាប់ស៊ីហ្គេម លើកនេះ វាជាលទ្ធផលជោគជ័យរបស់សហព័ន្ធ ហើយយើងបានដាក់គោលដៅបន្ថែមទៀត សម្រាប់ស៊ីហ្គេម ឆ្នាំ២០២៣ គឺយើងត្រូវរកឱ្យបានមេដាយមាសយ៉ាងហោច ១»។
ជាមួយការដាក់គោលដៅ ដណ្តើមឱ្យបានមេដាយមាសនេះ លោក ប៊ុយ សុភ័ណ្ឌ បានប្រាប់ថា សហព័ន្ធមានទិសដៅច្រើន ដោយលោកបានរៀបរាប់ថា៖ «យើងនឹងធ្វើទំនាក់ទំនងជាមួយភាគីថៃ ក្នុងការបញ្ជូនក្រុមអត្តពលិករបស់យើងទៅទីនោះ ហើយបើសិនជាភាគីថៃ អនុញ្ញាតពាក់ព័ន្ធនឹងការហ្វឹកហាត់ និងការស្នាក់នៅនេះ គឺយើងនឹងទៅហាត់ជាមួយភាគីថៃ ចាប់ពីខែ ៧ ឆ្នាំ ២០២២ នេះ រហូតដល់ខែ ៥ ឆ្នាំ ២០២៣ ហើយមួយទៀត យើងបានស្នើសុំទៅ CAMSOC ដើម្បីជួលគ្រូបង្វឹកកម្រិតអន្តរជាតិ មកពីកាហ្សាក់ស្ថាន ដោយយើងសង្ឃឹមថា គាត់នឹងជួយបង្វឹកក្រុមអត្តពលិករបស់យើង ឱ្យមានសមត្ថភាពស្របតាមស្តង់ដាបច្ចេកទេស»។
អគ្គលេខាធិការរូបនេះ បានបញ្ជាក់បន្ថែមថា៖ «ជាមួយគ្នានេះ យើងនឹងព្យាយាមស្វែងរកកីឡាករជាកូនកាត់ខ្មែររស់នៅក្រៅប្រទេស ដែលមានទម្ងន់ធ្ងន់ ដើម្បីប្រកួតតំណាងឱ្យកម្ពុជា ព្រោះកីឡាករក្នុងស្រុក យើងមិនសូវមានប្រភេទទម្ងន់ទេ ហើយការផ្តោតរកអ្នកមានទម្ងន់ធ្ងន់នេះ វាក៏ជាយុទ្ធសាស្ត្រមួយផងដែរ សម្រាប់សហព័ន្ធ ព្រោះបន្ទាប់ពីការប្រកួតស៊ីហ្គេម នៅប្រទេសវៀតណាម យើងសង្កេតឃើញថា កីឡាករដែលមានទម្ងន់ធ្ងន់នៅក្នុងបណ្តាប្រទេសក្នុងអាស៊ាននេះ មិនសូវជាខ្លាំងណាស់ណាទេ ហេតុនេះបើសិនជាយើង រកបានកីឡាករដែលមានបច្ចេកទេស និងប្រសិទ្ធផលល្អ គឺយើងរំពឹង ដល់បានមេដាយមាស»៕
