ភ្នំពេញៈ អ្នកប្រយុទ្ធកីឡាជឺជីតស៊ូដ៏ឆ្នើម ខាន់ ចេសា បានសន្យាថា នឹងស្តារមុខមាត់ត្រឡប់មកវិញ និងមានការប្តេជ្ញាចិត្តទាំងស្រុង ដើម្បីបង្ហាញពីសមត្ថភាពរបស់ខ្លួន នៅឆ្នាំក្រោយ នៅពេលដែលកម្ពុជាធ្វើម្ចាស់ផ្ទះស៊ីហ្គេមជាប្រវត្តិសាស្ត្រលើកដំបូង ក្រោយពីកញ្ញាបានធ្លាក់ចេញពីការប្រកួតលើវិញ្ញាសាជឺជិតស៊ូ ទម្ងន់ ៤៨ គីឡូក្រាម ក្នុងទីក្រុងហាណូយ ទាំងមិនបានប្រកួត នាពេលកន្លងមក។
ក្រោយពីព័ត៌មានដ៏គួរឱ្យសោកស្តាយ ដែលត្រូវបានគណៈកម្មាធិការជាតិអូឡាំពិកកម្ពុជា (NOCC) ប្រកាសឡើង កាលពីថ្ងៃទី ១៤ ខែឧសភា ខាន់ ចេសា បានចេញមុខបកស្រាយជុំវិញហេតុការណ៍ដ៏គួរឱ្យភ្ញាក់ផ្អើលមួយនេះ ស្របពេលដែលកីឡាការិនីរូបនេះ ត្រូវបានគេរំពឹងទុកថា នឹងទទួលបានជ័យជម្នះម្តងទៀត ក្នុងការប្រកួតស៊ីហ្គេម នៅវៀតណាមនោះ ដោយ ចេសា បញ្ជាក់ថា ការត្រៀមខ្លួនរបស់នាង ពិតជាស្ថិតក្នុងស្ថានភាពយ៉ាងល្អ។
កីឡាការិនីវ័យ ២៩ ឆ្នាំរូបនេះ បានសរសេរលើបណ្តាញសង្គម Instagram របស់នាងថា៖ «ខ្ញុំបានប្រឹងអស់ពីសមត្ថភាព ដែលខ្ញុំអាចធ្វើបានហើយ។ ខ្ញុំបានអនុវត្តតាមរបបអាហារយ៉ាងយកចិត្តទុដាក់ ក៏ដូចជាបន្តហ្វឹកហាត់យ៉ាងស្វិតស្វាញ ធ្វើលំហាត់ប្រាណ និងធ្វើសូណាជាទៀងទាត់ និងពាក់សម្លៀកបំពាក់ហ្វឹកហាត់ ដើម្បីព្យាយាមធ្វើយ៉ាងណាឱ្យស្រកទម្ងន់ ប៉ុន្តែមិនទទួលបានជោគជ័យឡើយ។ ខ្ញុំស្ទើរតែលើសទម្ងន់តែបន្តិចប៉ុណ្ណោះ ហើយបញ្ហានេះ បានសម្លាប់ទឹកចិត្តខ្ញុំ»។
ម្ចាស់មេដាយមាសស៊ីហ្គេម ឆ្នាំ ២០១៩ ចេសា បានបន្ថែមទៀតថា៖ «ខ្ញុំមិនមានរាងកាយដូចកាលពី ២ ឆ្នាំមុន នៅពេលដែលខ្ញុំធ្វើទម្ងន់របស់ខ្ញុំឡើយ។ រាងកាយរបស់ខ្ញុំ មានការប្រែប្រួលយ៉ាងខ្លាំង។ នៅពេលដែលខ្ញុំមានអាយុកាន់តែច្រើន ខ្ញុំកាន់តែមានការលំបាកក្នុងការសម្រកទម្ងន់។ ខ្ញុំមានអារម្មណ៍ថា ខ្ញុំបានធ្វើរាល់អ្វីៗទាំងអស់ហើយ។ ខ្ញុំក៏បានប្រឹងប្រែងអស់ពីសមត្ថភាពរបស់ខ្ញុំដែរ»។
នៅពេលសួរថា តើការហ្វឹកហាត់ និងការត្រៀមលក្ខណៈនានា មានភាពខុសគ្នាយ៉ាងដូចម្តេច ពីយុទ្ធនាការមុនៗ? ចេសា បានឆ្លើយតបថា៖ «ខ្ញុំមានអារម្មណ៍ថា ការត្រៀមខ្លួនរបស់ខ្ញុំ មានលក្ខខណ្ឌដូចគ្នា។ ចំណុចខុសគ្នាដ៏គួរឱ្យកត់សម្គាល់តែមួយ នៅពេលនេះ បើធៀបទៅនឹងការត្រៀមខ្លួនរបស់ខ្ញុំកាលពីមុន គឺថា ខ្ញុំបានកត់សម្គាល់ឃើញថា កីឡាជឺជីតស៊ូ មានសាលាបង្វឹកជាច្រើននៅកម្ពុជា និងមានដៃគូហ្វឹកហាត់កាន់តែច្រើនផងដែរ»។
គួរបញ្ជាក់ថា ក្នុងពេលថ្លឹងទម្ងន់ផ្លូវការ សម្រាប់វិញ្ញាសា ៤៨ គីឡូក្រាម នៅស៊ីហ្គេមលើកនេះ ចេសា បានលើសទម្ងន់កំណត់ត្រឹម ២,៤ ក្រាម ហើយក្រោមបទបញ្ជាការប្រកួតរបស់សហព័ន្ធកីឡាជឺជីតស៊ូអន្តរជាតិ និងច្បាប់ស្តីពីបច្ចេកទេសកីឡាក្នុងស៊ីហ្គេម គឺ ចេសា មិនត្រូវបានអនុញ្ញាតឱ្យប្រកួតឡើយ។ ភ្លាមៗនោះ NOCC បានធ្វើលិខិតតវ៉ា ដោយស្នើសុំឱ្យ ចេសា ចូលរួមក្នុងទម្ងន់ ៦២ គ.ក្រ ប៉ុន្តែការតវ៉ានោះ ត្រូវបានច្រានចោលដដែល៕