ក្រុងទីរ៉ាណា​: លោក Jose Mourinho បាននិយាយ​ថា គាត់ និងក្រុម Roma បាន​បង្កើត​ប្រវត្តិសាស្ត្រ​ជាមួយ​គ្នា បន្ទាប់​ពី​បាន​ក្លាយ​ជា​ជើងឯក នៅ​ក្របខ័ណ្ឌ Europa Conference League កាល​ពី​ថ្ងៃ​ពុធ ដែល​ជា​ពាន​រង្វាន់ នៅ​អឺរ៉ុប​ដ៏​ធំ​ទី១ មិន​ធ្លាប់​មាន​របស់​ក្លិប​។

គ្រូ​បង្វឹក​ជា​អាយ​ដល​សញ្ជាតិ​ព័រទុយហ្គាល់ លោក Mourinho ព្យាយាម តែ​​មិន​អាច​ទប់​ទឹកភ្នែក​បាន​នោះ​ទេ បន្ទាប់​ពី​ក្រុម Roma បាន​យក​ឈ្នះ​ក្រុម Feyenoord ពី​ការ​ប្រកួត ក្នុង​វគ្គ​ផ្តាច់ព្រ័ត្រ ប្រចាំ​ទ្វីប​ជា​លើក​ដំបូង​របស់ពួកគេ ក្នុង​រយៈពេល​ជាង ៣​ទសវត្សរ៍ ហើយ​គាត់​នៅ​តែ​មាន​អារម្មណ៍​រំជួល​ចិត្ត នៅ​ពេល​ដែល​គាត់​បាន​សាទរ​ក្រុម​របស់​គាត់ បន្ទាប់​ពី​ចប់​ពិធី​ប្រគល់​ពាន​រង្វាន់​រួច​រាល់​។

អ្នក​គាំ​ទ្រ​ក្រុម Roma បាន​ពេញ​ចិត្ត​ពេញ​ថ្លើម​យ៉ាង​ខ្លាំង ចំពោះ​​លោក Mourinho ក្នុង​អំឡុង​រដូវកាល​ឡើង និង​ចុះ ដែលបាន​បញ្ចប់​យ៉ាង​បរិបូរណ៍ ជាមួយ​នឹង​ជ័យជម្នះ ១-០ កាល​ពី​ថ្ងៃ​ពុធ នៅទី​ក្រុង​ទីរ៉ាណា ដើម្បី​​បិទ​ឆាក នៃ​ភាព​រាំង​ស្ងួត (អត់​ឈ្នះ) ក្នុង​ការ​បាន​លើក​ពាន​រង្វាន់​ណា​មួយ រយៈ​ពេល ១៤​ឆ្នាំ សម្រាប់​ក្លិប ដែល​មាន​មូល​ដ្ឋាន នៅ​រដ្ឋធានី នៃ​ប្រទេស​អ៊ីតាលី​។

«​ខ្ញុំ​បាន​មក​នៅ Roma អស់​រយៈ​ពេល ១១​ខែ​ហើយ​។ ខ្ញុំ​បាន​ដឹង ពេល​ដែល​ខ្ញុំ​មក​ដល់ថា អ្វី ដែល​វា​មាន​ន័យ សម្រាប់មនុស្ស នៅ​ទី​នេះ។ ពួកគេ​បាន​រង់​ចាំ​អ្វីមួយ​ដូចនេះ (ពានរង្វាន់)​។ នេះ​មិន​មែន​ជា​សមិទ្ធផល​នោះ​ទេ តែ​នេះ​ជា​ប្រវត្តិសាស្ត្រ​។ យើង​ត្រូវ​តែ​កត់​ត្រា​​ចូល​ក្នុង​ប្រវត្តិសាស្ត្រ។ យើង​បាន​សរសេរ​វា​ហើយ​»​។ នេះ​ជាសម្ដី​របស់​លោក Mourinho ដែល​និយាយ​ទៅកាន់​ទូរទស្សន៍ Sky។

ជ័យជម្នះ កាល​ពី​ថ្ងៃពុធ គឺ​ជា​ពាន​រង្វាន់​ នៅ​អឺរ៉ុប ជា​លើក​ទី ៥ របស់​លោក Mourinho ហើយ​បាន​ធ្វើ​ឱ្យ​គាត់​ក្លាយ​ជា​គ្រូបង្វឹក​ដំបូង​គេ ដែលឈ្នះ​គ្រប់​កម្មវិធី​ប្រកួត​របស់​សហព័ន្ធ​បាល់​ទាត់​អឺរ៉ុប (UEFA) នា​ពេល​បច្ចុប្បន្ន។ ហើយ​គាត់​បាន​បញ្ជាក់​ថា គាត់​នឹង​បន្ត​នៅ​ក្រុម Roma ទៀត នា​រដូវកាល​ក្រោយ ដើម្បី​ពង្រឹង​ការងារ​ដ៏​រឹង​មាំ​នេះ ដែល​សម្រេច​បាន តាំង​ពី​​រដូវកាល​ដំបូង​របស់​គាត់។

លោក Mourinho បាន​ប្រាប់​ថា​៖ «​ខ្ញុំ​កំពុង​ស្នាក់​នៅ​បន្ត។ អត់​មាន​អ្វី​ត្រូវ​សង្ស័យ​ពី​រឿង​នោះ​ឡើយ​។ យើង​ត្រូវ​តែ​បាន​ឃើញ​នូវ​អ្វី ដែល​ម្ចាស់​ក្លិប ចង់​ធ្វើ​ នា​រដូវកាល​កក្រោយ ពីព្រោះ​នេះ​គឺ​ជា​ប្រវត្តិ​សាស្ត្រ ហើយ​យើង​អាច​សាង​នូវ​គម្រោង​ការ​ពិសេស​មួយ​បាន​។ ឥឡូវ​នេះ ខ្ញុំ​នឹង​ទៅ​សម្រាក​លំហែ ដោយ​ដេក​សំដិល នៅ​ឆ្នេរ​សមុទ្រ និង​គិត​ពី​រឿង​ទាំង​អស់ មួយ​រយៈ​ពេល​ខ្លី​»​៕ AFP/VN