ភ្នំពេញៈ លោកនាយករដ្ឋមន្រ្តី ហ៊ុន សែន បានចាត់ទុកការទទួលបានមេដាយច្រើនពីការប្រកួតស៊ីហ្គេម និងការទទួលទង់ស៊ីហ្គេម ពីម្ចាស់ផ្ទះវៀតណាម នៅទីក្រុងហាណូយ ដើម្បីដង្ហែយកមកតម្កល់ទុកនៅគណៈកម្មាធិការជាតិអូឡាំពិកកម្ពុជា (NOCC) ថ្មីៗនេះថា ជាចំណុចរបត់នៃប្រវត្តិសាស្ត្ររបស់វិស័យកីឡានៅកម្ពុជា ដែលបានឆ្លងកាត់នូវដំណាក់កាលដ៏ល្អ។
«យើងទើបទទួលបានទង់ នូវការធ្វើជាម្ចាស់ផ្ទះស៊ីហ្គេម ឆ្នាំ ២០២៣ ដែលសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ រួមជាមួយឯកឧត្តមរដ្ឋមន្ដ្រី ថោង ខុន រដ្ឋមន្ត្រីក្រសួងទេសចរណ៍ បានរួមគ្នាដង្ហែមកមាតុប្រទេសជាមួយនឹងគ្រឿងឥស្សរិយយសយ៉ាងច្រើន ជាមេដាយមាស មេដាយប្រាក់ មេដាយសំរឹទ្ធ ដែលកើនឡើងទ្វេដង បើប្រៀបធៀបនឹងស៊ីហ្គេមមុនៗ។ នេះជាចំណុចរបត់នៃប្រវត្តិសាស្ដ្រ ដែលកម្ពុជាយើងបានឆ្លងកាត់នូវដំណាក់កាលដ៏ល្អ ដែលពង្រឹងវិស័យកីឡា»។
ប្រមុខដឹកនាំប្រទេស លោក ហ៊ុន សែន បានថ្លែងសារពិសេសជូនជនរួមជាតិបែបនេះ ក្រោយពេលលោកបានបញ្ចប់កិច្ចប្រជុំប្រចាំឆ្នាំ ២០២២ របស់វេទិកាសេដ្ឋកិច្ចពិភពលោក (WEF) នៅទីក្រុងដាវ៉ូស ប្រទេសស្វ៊ីស កាលពីថ្ងៃទី ២៥ ខែឧសភា គឺបន្ទាប់ពីប្រតិភូកីឡាកម្ពុជា ដឹកនាំដោយលោកឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ ទៀ បាញ់ ជាប្រធាន CAMSOC បាននាំយកទង់ស៊ីហ្គេម បន្តពីម្ចាស់ផ្ទះវៀតណាម មកដល់មាតុប្រទេស កាលពីថ្ងៃអង្គារ។
ក្រោយការនាំយកទង់ស៊ីហ្គេម ឬទង់សហព័ន្ធកីឡាអាស៊ីអាគ្នេយ៍ មកដល់ព្រលានយន្តហោះអន្តរជាតិភ្នំពេញហើយនោះ លោក ថោង ខុន ជាប្រធាន NOCC និងលោក វ៉ាត់ ចំរើន ជានាយបេសកកម្មបានប្រគល់ទង់ស៊ីហ្គេមនេះ ទៅឱ្យលោក ទៀ បាញ់ ជាប្រធានគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) រួចទើបធ្វើពិធីដង្ហែទង់ស៊ីហ្គេមនេះ និងម្ចាស់ជយលាភី ដោយក្បួនរថយន្តតាមផ្លូវសហព័ន្ធរុស្ស៊ី ឆ្ពោះទៅកាន់វិមានឯករាជ្យ រួចដង្ហែត្រឡប់យកទង់ស៊ីហ្គេមនេះមកតម្កល់ទុកនៅទីស្នាក់ការ NOCC។
នៅក្នុងពិធីដង្ហែនោះមានប្រជាពលរដ្ឋបានចូលរួមអបអរសាទរនៅអមសងខាងផ្លូវយ៉ាងច្រើនពីផ្លូវមួយទៅផ្លូវមួយ ដែលរូបភាពនេះ កម្រនឹងបានឃើញណាស់ ព្រោះការប្រកួតស៊ីហ្គេមលើកទី៣១ ឆ្នាំ ២០២១ លើកនេះ វាមិនត្រឹមតែជាពេលដែលកម្ពុជាទទួលទង់ស៊ីហ្គេមនោះទេ ប៉ុន្តែក្រុមអត្តពលិកកម្ពុជា ក៏ដណ្តើមបានមេដាយច្រើន គឺសរុប ៦៣ (មេដាយមាស ៩ ប្រាក់ ១៣ និងសំរឹទ្ធ ៤១) ដើម្បីបំបែកឯតទគ្គកម្មការប្រកួតស៊ីហ្គេមកន្លងមកផងដែរ។
លោក ហ៊ុន សែន បានបន្ថែមថា៖ «ខ្ញុំព្រះករុណាខ្ញុំ សូមអរគុណ ចំពោះបងប្អូនជនរួមជាតិ ក៏ដូចជាកីឡាករ កីឡាការិនី ក៏ដូចជាថ្នាក់ដឹកនាំ ដែលបានធ្វើពិធីដង្ហែនូវទង់ស៊ីហ្គេម ហើយក៏ដូចជាដង្ហែ ចំពោះគ្រឿងឥស្សរិយយសទាំងឡាយ សម្រាប់ក្រោយការប្រកួតមកកាន់មាតុប្រទេសវិញ ហើយយកទៅទីស្នាក់ការ NOCC។ ស៊ីហ្គេមនឹងត្រូវប្រព្រឹត្តទៅនៅឆ្នាំ ២០២៣ ខាងមុខ ដែលជាការរៀបចំគ្រោងទុករបស់យើងអស់ជាច្រើនឆ្នាំមកហើយ»។
ចំណែកលោក ទៀ បាញ់ បានថ្លែងនៅក្នុងអំឡុងពេលដង្ហែទង់ស៊ីហ្គេមនោះថា៖ «ថ្ងៃនេះប្រជាពលរដ្ឋទូទាំងប្រទេស ពិតជាមានសោមនស្សរីករាយ និងមោទនភាព ដែលព្រះរាជាណាចក្រកម្ពុជាបានបើកទំព័រប្រវត្តិសាស្ត្រថ្មីមួយទៀត ទស្សនទានការទូតកីឡា និងកិត្យានុភាពជាតិ ក្នុងការនាំមកនូវទង់សហព័ន្ធកីឡាស៊ីហ្គេមលើកទី៣២ នៅព្រះរាជាណាចក្រកម្ពុជា»៕