ភ្នំពេញៈ កម្ពុជាតាមរយៈគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) និងគណៈកម្មាធិការជាតិអូឡាំពិកកម្ពុជា (NOCC) នឹងរៀបចំធ្វើជាម្ចាស់ផ្ទះ កិច្ចប្រជុំក្រុមប្រឹក្សាកីឡាអាស៊ីអាគ្នេយ៍ជាមួយតំណាងប្រទេសទាំងអស់របស់អាស៊ាន នៅរាជធានីភ្នំពេញ នាថ្ងៃទី ១១ ដល់ទី ១៣ ខែ កក្កដា ឆ្នាំ ២០២២ ហើយកិច្ចប្រជុំក្រុមប្រឹក្សាសហព័ន្ធកីឡាអាស៊ានប៉ារ៉ាហ្គេម សម្រាប់ប្រភេទកីឡាជនពិការ ក៏ត្រូវធ្វើក្នុងពេលជាមួយគ្នានោះផងដែរ។
សម្រាប់កិច្ចប្រជុំរបស់ក្រុមប្រឹក្សាកីឡាអាស៊ីអាគ្នេយ៍និងក្រុមប្រឹក្សាសហព័ន្ធកីឡាអាស៊ានប៉ារ៉ាហ្គេម នៅខែក្រោយនេះ ត្រូវបានមន្រ្តីជំនាញរបស់ CAMSOC អះអាងថា លោកនាយករដ្ឋមន្រ្តី ហ៊ុន សែន នឹងមានការថ្លែងការណ៍ពិសេស ទៅកាន់តំណាងប្រទេសនៅអាស៊ាន ដើម្បីធ្វើឱ្យប្រទេសទាំងនេះ កាន់តែមានការចាប់អារម្មណ៍ និងមានភាពកក់ក្តៅ ក្នុងការមកចូលរួមប្រកួតស៊ីហ្គេម-អាស៊ានហ្គេម ឆ្នាំ ២០២៣ នៅកម្ពុជាជាប្រវត្តិសាស្រ្តលើកដំបូងនេះ។
លោក វ៉ាត់ ចំរើន អគ្គលេខាធិការ CAMSOC បានថ្លែងថា៖ «ដើម្បីសម្របសម្រួលយន្តការ ធ្វើឱ្យយើងជាម្ចាស់ផ្ទះ បានពង្រឹងសមត្ថភាពខ្លួនឯងផង និងទទួលបានការគាំទ្រពេញទំហឹងផងនោះ គឺនៅថ្ងៃបើកកិច្ចប្រជុំផ្លូវការ នាថ្ងៃទី ១១ ខែកក្កដា ខាងមុខ សម្តេចតេជោនាយករដ្ឋមន្ត្រី ហ៊ុន សែន នឹងមានការថ្លែងការណ៍ពិសេស ព្រមទាំងផ្តល់នូវអនុសាសន៍ណែនាំដ៏សំខាន់បំផុត និងជាគន្លឹះបំផុត សម្រាប់ប្រទេសនៅអាស៊ីអាគ្នេយ៍ទាំងមូល ដែលជាសមាជិកស៊ីហ្គេម និងអាស៊ានប៉ារ៉ាហ្គេម ដើម្បីទទួលបាននូវភាពកក់ក្តៅ ហើយសម្តេចតេជោ នឹងបង្ហាញពីសក្តានុពលរបស់កម្ពុជា ក្នុងការធ្វើម្ចាស់ផ្ទះនេះផងដែរ»។
ជាមួយគ្នានេះ គណៈអចិន្ត្រៃយ៍ CAMSOC កាលពីទី ២១ មិថុនា ក្រោមការដឹកនាំផ្ទាល់របស់លោក ថោង ខុន ជាប្រធាន NOCC និងជាអនុប្រធានអចិន្ត្រៃយ៍ CAMSOC បានរៀបចំកិច្ចប្រជុំពិសេសមួយ ដើម្បីត្រៀមខ្លួនធ្វើជាម្ចាស់ផ្ទះ កិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ជាលើកទី២ ដោយមានបញ្ចូលកិច្ចប្រជុំរបស់ក្រុមប្រឹក្សាសហព័ន្ធកីឡាអាស៊ានប៉ារ៉ាហ្គេម ជាមួយគ្នា នៅខែក្រោយនេះ។
សម្រាប់ការធ្វើជាម្ចាស់ផ្ទះ ក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ លើកទី១ នៅខេត្តសៀមរាប កាលពីខែមេសា ឆ្នាំ ២០២២ កម្ពុជាបានទទួលជោគជ័យយ៉ាងធំធេង ក្នុងការដាក់ «កីឡាគុនល្បុក្កតោ» ចូលទៅក្នុងការប្រកួតស៊ីហ្គេម ជាប្រវត្តិសាស្រ្តលើកដំបូង នៅឆ្នាំ ២០២៣ ដោយមានការគាំទ្រភាគច្រើន ពីតំណាងប្រទេស នៅក្នុងតំបន់អាស៊ាន ហើយអង្គប្រជុំរបស់ក្រុមប្រឹក្សាកីឡាអាស៊ីអាគ្នេយ៍ នាពេលនោះ ក៏បានឯកភាព ដាក់ប្រភេទកីឡាចំនួន ៣៩ ទៀត ចូលទៅក្នុងការប្រកួតស៊ីហ្គេម ឆ្នាំ ២០២៣ ផងដែរ។
យ៉ាងណាក៏ដោយ សម្រាប់កិច្ចប្រជុំ ក្រុមប្រឹក្សាកីឡាអាស៊ីអាគ្នេយ៍លើកទី២ នៅរាជធានីភ្នំពេញ ខែក្រោយនេះ តំណាងប្រទេសទាំង១១ នៅក្នុងតំបន់អាស៊ាន រួមទាំងកម្ពុជា នឹងត្រូវពិភាក្សាគ្នា ដើម្បីអនុម័តចុងក្រោយ នូវប្រភេទកីឡា ដែលត្រូវដាក់ឱ្យប្រកួត ព្រមទាំងកំណត់ប្រភេទវិញ្ញាសា ចាំបាច់ភាគច្រើន សម្រាប់ការប្រកួតកីឡាស៊ីហ្គេម ឆ្នាំ ២០២៣ នៅកម្ពុជា។
ជាមួយគ្នានេះ កម្ពុជាក្នុងនាមជាម្ចាស់ផ្ទះ ក៏នឹងដាក់នៅរាល់សំណើ រួមទាំងអ្វីដែលខ្លួនចង់បាន និងចង់កែប្រែចូលទៅក្នុងអង្គប្រជុំនោះ ដើម្បីធ្វើការអនុម័យផងដែរ ប៉ុន្តែលោកឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ទៀ បាញ់ ជាប្រធាន CAMSOC បានប្រាប់ទៅគ្រប់ផ្នែកទាំងអស់ ត្រូវធ្វើការងារនេះ ឱ្យបានល្អ និងច្បាស់លាស់ ដើម្បីទទួលបានការគាំទ្រពីសមាជិករបស់ស៊ីហ្គេម និងអាស៊ានប៉ារ៉ាហ្គេម។
ជុំវិញបញ្ហានេះ លោក វ៉ាត់ ចំរើន បានបញ្ជាក់ថា៖ «ជាយុទ្ធសាស្រ្តការងាររបស់ CAMSOC នេះ យើងដឹងហើយថា សម្តេចពិជ័យសេនា ទៀ បាញ់ ជាប្រធាន CAMSOC បានផ្តល់អនុសាសន៍ដ៏ខ្ពង់ខ្ពស់ ក្នុងការពន្លឿនគ្រប់ផែនការសកម្មភាពការងារទាំងអស់។ មានន័យថា ទាំងកិច្ចការបច្ចេកទេស និងការងារទូតកីឡា ជាមួយនឹងបណ្តាប្រទេសអាស៊ីអាគ្នេយ៍ទាំងអស់ គឺសម្តេចពិជ័យសេនា ជំរុញថា យើងត្រូវធ្វើយ៉ាងណាឱ្យមានការគាំទ្រច្បាស់លាស់ពីប្រទេសជាសមាជិករបស់ស៊ីហ្គេម និងអាស៊ានប៉ារ៉ាហ្គេម»។
លោក វ៉ាត់ ចំរើន បានបន្ថែមថា៖ «អ៊ីចឹងនេះដំណាក់កាលសំខាន់ និងកិច្ចប្រជុំពិសេស ជាគន្លឹះ សម្រាប់ឱ្យប្រទេសជាសមាជិកទាំងអស់ហ្នឹង គាត់មានការគាំទ្រពេញទំហឹង ជាមួយគោលដៅរបស់កម្ពុជា ជាម្ចាស់ផ្ទះចង់បាន ថាតើ កម្ពុជា ចង់ដាក់ប្រភេទកីឡាប៉ុន្មាន ចង់ដាក់វិញ្ញាសាប្រកួតប៉ុន្មាន ចង់កែប្រែធម្មនុញ ទៅលើបញ្ហាអ្វីខ្លះ គឺកម្ពុជា នឹងដាក់ចូល និងអនុម័ត នាពេលនោះ ព្រោះកម្ពុជា ជាប្រធាន ហើយកម្ពុជា នឹងធ្វើឱ្យមានកិត្តិយសទាំងអស់គ្នា និងមានការស្រុះស្រួលគ្នា សម្រាប់ការឯកភាពគ្នា ជាឯកច្ឆន្ទ នៅក្នុងអាស៊ាន គឺមិនឱ្យមានសមាជិកណាមួយ មានបញ្ហា ក្នុងការមិនទទួលស្គាល់ចំណុចណាមួយ ដែលម្ចាស់ផ្ទះធ្វើនោះទេ»។
គួររំឭកថា សម្រាប់ប្រភេទកីឡាទាំង ៤០ ដែលត្រូវបានប្រកាស ជាផ្លូវការ នៅក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ជាលើកទី១ នៅកម្ពុជា កាលពីខែមេសា កន្លងមក រួមមានកីឡាអត្តពលកម្ម កីឡាទឹក (ហែលទឹក, លោតទឹក និងបាល់ទឹក) វាយសី បាល់បោះ (៥ ទល់ ៥ នាក់ និង៣ទល់៣នាក់) ប្រដាល់សកល ស្នូកឃ័រ ប្រណាំងកង់ (ផ្ទៃរាប និងប្រណាំងកង់លើភ្នំ) ទូកកានូ និងរ៉ូវីង កីឡាអុក កីឡារាំ គុនដាវ បាល់ទាត់ វាយកូនហ្គោល កាយសម្ព័ន្ធ ហុកគី យូដូ ការ៉ាតេ កីឡា Muay (គុនខ្មែរ) ប៉េតង់ ទូកក្តោង សីដក់ សូហ្វតិន្នីស វាយកូនបាល់ វាយកូនឃ្លីលើតុ តេក្វាន់ដូ (WT) ទ្រីយ៉ាត្លុង បាល់ទះ ចំបាប់ លើកទម្ងន់ វ៉ូស៊ូ កីឡា Arnis កាយវប្បកម្ម កីឡាអេឡិចត្រូនិក កីឡា Floorball ជូជីតស៊ូ គុនល្បុក្កតោ វ៉ូវីណាម ម៉ូតូទឹក ឃីកបុកស៊ីង និងសិល្បៈក្បាច់គុនកូរ៉េ (Martial Arts Korea)។
ចំណែកប្រភេទកីឡាមួយចំនួន រួមមានកីឡាគ្រីឃីត ប្រណាំងសេះ បញ្ចសិលា និងកីឡាឆ្លងកាត់ឧបសគ្គ ជាដើម នឹងត្រូវរង់ចាំ សម្រាប់ការសម្រេចលើកចុងក្រោយ នៅក្នុងកិច្ចប្រជុំក្រុមប្រឹក្សាកីឡាអាស៊ីអាគ្នេយ៍ ជាលើកទី២ នៅថ្ងៃទី ១១ ដល់ថ្ងៃទី ១៣ ខែកក្កដា ខាងមុខនេះ៕